मरीन ड्राईव्हवरून दिपके यांना पोलीस स्टेशनात नेले, काही वेळाने ते बाहेर पडले; व्हिडीओ चर्चेत

CJP चे संस्थापक अभिजीत दिपके यांना मरीन ड्राईव्ह परिसरातून मुंबई पोलीस घेऊन गेल्याचा एक व्हिडीओ सोशल मीडियावर चर्चेत आला आहे. एका महिला पोलीस अधिकाऱ्याने "चला, चहा घेऊ" असे म्हणत त्यांना सोबत येण्यास सांगितल्याचे या व्हिडीओत दिसते. हा व्हिडीओ गुरुवारी सायंकाळचा असण्याची शक्यता व्यक्त केली जात आहे.

या घटनेमागची पार्श्वभूमी अशी की, मुख्य निवडणूक आयुक्त ज्ञानेश कुमार यांनी राजीनामा द्यावा, या मागणीसाठी CJP ने मुंबईत आंदोलनाची घोषणा केली आहे. दादर येथील छत्रपती शिवाजी महाराज पार्कच्या गेट क्रमांक ६ जवळ आज, २ ऑक्टोबरपासून आंदोलन सुरू होणार असल्याचे CJP ने जाहीर केले आहे. मुंबई पोलिसांनी या आंदोलनाला परवानगी नाकारली आहे. तरीही आंदोलनावर ठाम असल्याचे अभिजीत दिपके यांनी स्पष्ट केले आहे.

व्हिडीओत महिला अधिकारी दिपके यांना "चहा घेऊ आपण... चला," असे म्हणताना दिसतात. त्यावर दिपके म्हणतात, "मॅडम, मला पुढे जायचं आहे. मी चहा आधीच घेतलाय," आणि ते तिथून निघण्याचा प्रयत्न करतात. तरीही अधिकारी आग्रह धरतात, "तुम्ही आमचा शब्द नाही मानणार का? चला... आपण चहा घेऊया." दिपके पुन्हा सांगतात, "मॅडम, मी चहा पिला आहे. मला जायचंय. मी गाडी बोलावली आहे."

महिला अधिकारी पुन्हा सोबत येण्याचा आग्रह करतात, तेव्हा दिपके "डिटेन करायचं असेल तर ऑफिशियली सांगा," अशी मागणी करतात. आम्ही डिटेन करत नाही, फक्त आमच्यासोबत चहा घ्या, असे त्या अधिकारी सांगतात.

त्यानंतर दिपके आणि त्यांच्या काही सहकाऱ्यांना पोलिसांच्या गाडीतून मरीन ड्राईव्ह पोलीस स्टेशनात नेल्याचे व्हिडीओतून दिसते. गाडीत महिला अधिकारी दिपके यांना त्यांचे नाव आणि ते कुठे राहतात, हे विचारतात. "तुमचं नाव काय?" या प्रश्नावर ते "अभिजीत दिपके" असे उत्तर देतात. "तुम्ही कुठे राहता?" असे विचारल्यावर ते सांगतात, "मी संभाजीनगरचा आहे, आता मुंबईत राहतो."

स्टेशनात दिपके आणि त्यांच्यासोबतच्या कार्यकर्त्यांना काही काळ प्रतीक्षा कक्षात थांबवल्याचे दिसते. काही वेळाने तीच महिला अधिकारी फोनवर बोलून परत येतात आणि हसत हसत म्हणतात, "वरून कॉल आलाय... चहा पण नाही पाजायचा, साहेब बोले सरांना जाऊ द्या!" हे ऐकून सगळे हसायला लागतात आणि स्टेशनातून बाहेर पडतात.

बाहेर पडताना दिपके हसत प्रतिक्रिया देतात. ते म्हणतात, "वरून ऑर्डर आली असावी की यांचा फक्त वेळ वाया घालवा, पोलीस स्टेशनात बसवून ठेवा, बाहेर कुठे फिरू देऊ नका. म्हणून आम्हाला चहाच्या नावाखाली डिटेन केलं गेलं. आम्हाला चहासुद्धा पाजला नाही." मरीन ड्राईव्हकडे परत जाताना ते असेही म्हणतात, "आता आम्ही मरीन ड्राईव्हला जाऊनच चहा पिणार आणि तेही या पोस्टर्ससोबतच पिणार!" यावर त्यांच्या सहकाऱ्यांमध्ये हशा पिकतो.

त्यानंतर सगळेजण पुन्हा मरीन ड्राईव्हच्या दिशेने गेले. व्हिडीओ व्हायरल झाल्यानंतर सोशल मीडियावर कमेंट्सचा पाऊस पडत आहे. दरम्यान, CJP ने आज दुपारी ४ वाजता शिवाजी पार्क येथे 'जेल भरो आंदोलन' करण्याची घोषणा केली आहे. पोलिसांनी परवानगी नाकारली असली, तरी आंदोलन करण्याची भूमिका दिपके यांनी घेतली आहे.