चंद्रपुरात गणेश विसर्जनात एकाच पक्षाचे दोन-दोन स्वागत मंडप, गटबाजी पुन्हा समोर

चंद्रपूर शहरात २५ सप्टेंबर रोजी गणेश विसर्जनाचा सोहळा मोठ्या उत्साहात पार पडला. शहरातील लाखो नागरिकांनी बाप्पाला भक्तिभावाने निरोप दिला. पण या मिरवणुकीत यंदाही राजकीय पक्षांमधली अंतर्गत गटबाजी स्पष्टपणे दिसून आली. भाजपचे दोन, काँग्रेसचे दोन आणि उद्धव बाळासाहेब ठाकरे शिवसेनेचे दोन असे मिळून एकूण सहा स्वागत मंडप नागरिकांनी बघितले.

लोकमान्य टिळकांनी नागरिकांनी एकत्र येऊन हा उत्सव साजरा करावा या उद्देशाने गणेशोत्सवाची सुरुवात केली होती. आज हा उत्सव थोड्या वेगळ्या, आधुनिक पद्धतीने साजरा होतो. विसर्जन मिरवणुकीत गणेश मंडळांचं आणि नागरिकांचं स्वागत करण्यासाठी राजकीय पक्ष पुढे येतात. पण गेल्या काही वर्षांपासून एकाच पक्षातले नेते आपापली वेगळी चूल मांडताना दिसत आहेत, आपला राजकीय दबदबा दाखवण्यासाठी.

आमदार सुधीर मुनगंटीवार आणि आमदार जोरगेवार यांच्यातला वाद तसा जुना आहे. काँग्रेस पक्षातही अनेक वर्षांपासून गटबाजी सुरू आहे, तर शिवसेना पक्ष फुटल्यानंतर, सत्तेसाठी काहींनी पक्षाची साथ सोडल्यानंतर, त्या फुटलेल्या गटातही एकी दिसत नाही.

जोरगेवार आणि मुनगंटीवार हे दोन्ही नेते कधी एकाच मंचावर दिसतातही, पण गणेश विसर्जन सोहळ्यात मात्र त्यांचे स्वागत मंडप एकमेकांशेजारी उभे राहिले आणि मंडप उभारणीच्या परवानगीवरून नेहमीचा वाद यंदाही दिसला. दोन्ही नेत्यांच्या मंडपांत त्यांचे त्यांचे समर्थक हजर होते.

दुसरीकडे काँग्रेसचे विजय वडेट्टीवार आणि खासदार प्रतिभा धानोरकर यांचेही मंडप वेगवेगळे उभारण्यात आले होते. वडेट्टीवार गटाच्या मंडपात त्यांचे समर्थक नेते आणि नगरसेवक होते, तर दुसऱ्या मंडपात खासदार प्रतिभा धानोरकर स्वतः त्यांच्या समर्थकांसह आणि नगरसेवकांसह उपस्थित होत्या.

शिवसेना आणि युवासेना यांचे वेगवेगळे मंडप बघून यंदा समर्थकांनाही आश्चर्य वाटलं. एकीकडे महानगरपालिकेतली सत्ताधारी शिवसेना, तर दुसरीकडे युवासेना, अशी दोन्ही मंडपं यंदा नागरिकांच्या कुतूहलाचा विषय ठरली. मात्र सर्वाधिक गर्दी आणि कल युवासेनेचे जिल्हाप्रमुख विक्रांत सहारे आणि महानगर प्रमुख सुरेश पचारे यांच्या मंडपाकडे दिसला. या विसर्जन सोहळ्यात सर्व धर्मांचे नागरिक उपस्थित होते आणि सगळ्यांनी मिळून बाप्पाला निरोप दिला.

या सगळ्या गडबडीत सगळ्यात जास्त आनंदात दिसले ते गणेश मंडळाचे अध्यक्ष. कारण एकाच पक्षाकडून त्यांना दोनदा स्वागत आणि सत्कार स्वीकारावा लागला, फक्त गट वेगवेगळे होते. या राजकीय गटबाजीचा हा तमाशा बघण्यासाठी सर्वसामान्य नागरिकांबरोबरच पक्षांचे निष्ठावंत कार्यकर्तेही मोठ्या संख्येने हजर होते.