चंद्रपुरात फार्महाऊसवर छापा, तेलंगणातील ४० जुगारी पोलिसांच्या ताब्यात
विरुर पोलीस ठाण्याच्या हद्दीतील सोनुर्ली येथील फार्महाऊसमध्ये सुरू असलेल्या आंतरराज्यीय जुगार अड्ड्यावर पोलिसांनी छापा टाकून लाखो रुपयांची रोकड आणि साहित्य जप्त केले.
चंद्रपूर जिल्ह्यातील विरुर पोलीस ठाण्याच्या हद्दीत एक मोठा आंतरराज्यीय जुगार अड्डा सुरू असल्याचं पोलिसांच्या गुप्त माहितीतून समोर आलं आणि पोलिसांनी थेट कारवाई करत तो उघडकीस आणला. मौजा सोनुर्ली इथल्या एका फार्महाऊसमध्ये 'विनर्स सोशल क्लब'च्या नावाखाली हा अड्डा चालवला जात होता. रविवारी रात्री पोलिसांनी अचानक धाड टाकून या अड्ड्याच्या मॅनेजरसह तब्बल ४० जणांना ताब्यात घेतलं. यात लाखो रुपयांची रोख रक्कम आणि जुगारासाठी वापरलं जाणारं साहित्य जप्त करण्यात आलं. विशेष म्हणजे पकडलेले सगळे आरोपी शेजारच्या तेलंगणा राज्यातील वेगवेगळ्या जिल्ह्यांतले रहिवासी आहेत.
पोलिसांना मिळालेल्या खात्रीशीर माहितीनुसार, सोनुर्ली शिवारातल्या फार्महाऊसमध्ये बेकायदेशीरपणे ५२ पत्त्यांवर मोठी रक्कम लावून 'तीन पत्ती' हा हारजितचा जुगार खेळला जात होता. या माहितीच्या आधारे राजुरा उपविभागीय पोलीस अधिकारी कुमार सुशांत यांच्या मार्गदर्शनाखाली विरुरचे सहाय्यक पोलीस निरीक्षक राजेंद्र गायकवाड, पोलीस उपनिरीक्षक उमेश जोगदंड, पोलीस उपनिरीक्षक सूर्यवंशी, डीबी पथक आणि विरुर पोलीस स्टेशनच्या कर्मचाऱ्यांनी दोन पंचांसह २० सप्टेंबरच्या रात्री साधारण पावणेआठच्या सुमारास या क्लबच्या बंदिस्त हॉलवर छापा टाकला.
पोलिसांचं पथक हॉलमध्ये पोहोचलं तेव्हा तिथे १५ टेबलांवर आणि खाली बसून मोठ्या प्रमाणात जुगार सुरू असल्याचं धक्कादायक चित्र दिसलं. पोलिसांना बघून काही जुगाऱ्यांनी अंधाराचा फायदा घेत पळून जाण्याचा प्रयत्न केला, पण पोलिसांनी तत्परता दाखवत जागेवरच सगळ्या ४० जणांना घेराव घालून ताब्यात घेतलं.
ताब्यात घेतलेल्यांमध्ये जुगार अड्ड्याचा मॅनेजर अंजनेल्लु मलय्या पल्ले (रा. रामगुंडम, जि. आदिलाबाद) याच्यासह किशन केसन गोट, रविंदर प्रवताल देवसानी, मल्लेश लच्चया थुम्मा, सत्यनारायण लचय्या गुरम, संजिवा रेड्डी मधुगुल्ला, क्रीष्णय्या नारायणा वेनुला, थट्टी वेंकागम जेपाल, नविनकुमार सत्यनारायणा पेदापल्ली, पिटला लक्ष्मण, संपत दावा रेड्डी, मल्ला रेड्डी मुदगुल्ला, सुधागोणे भास्कर, मस्के तेजाराव, गुड्डम प्रसाद गौड, बेत्तु तिरुपती रेड्डी, गड्डा संतोष कुमार, बट्टु संबय्या गिरी कुमार, कोलीपक्का श्रिनिवास, बिंगी गुणेश कुमार, दामोदर महेंधर अनुमुल्ला, कन्ने बोइना महेश, टेकरला विजय, अक्कुला नरेश, कामपेल्ली बलराजु, कुप्पाला मलय्या रवी, आनंदबाबु शिवराजम टिप्पाणी, राजु मलय्या कोंडीला, महेश भिमला बानुत, विरन्ना राम बोडा, प्रभाकर भारत निम्मा, वासुदेव वदेलु सीरमला, प्रविण चंद्रय्या मुडीपी, महेश मलय्या कनेभोयीना, मोहम्मद समिरपाशा वली, नरेश नरसिंगराव रेनकुंटला, मुरलीधर व्यंकट रेड्डी, सत्यनारायण किष्टय्या अकलता, रजन्ना अंकुल टोटा आणि कन्नाप्रती नरसीम्मा छार्य यांचा समावेश आहे.
कारवाईदरम्यान पोलिसांनी जुगार अड्ड्याची आणि तिथल्या संशयितांची कसून झडती घेतली. आरोपींच्या अंगझडतीत ५६ हजार ७१० रुपये, टेबलच्या ड्रॉव्हरमधून ८४ हजार ४०० रुपये आणि मॅनेजरच्या केबिनमधल्या लोखंडी कपाटातून ५ लाख ८ हजार रुपये रोख असं एकूण मोठी रक्कम हाती लागली. याशिवाय जुगारासाठी वापरले जाणारे वेगवेगळ्या मूल्यांचे शेकडो प्लास्टिक कॉईन्स, नोटा मोजण्याचं 'ड्रॉप २ कार्ट' मशीन, ३ कॅल्क्युलेटर, ५४० हून जास्त पत्त्यांचे कॅट्स, जुगाराच्या हिशोबाची कागदपत्रं आणि मॅनेजरचा अँड्रॉइड मोबाईल फोन असा मिळून ६ लाख ७६ हजार ४७० रुपयांचा मुद्देमाल जप्त करण्यात आला.
या प्रकरणी विरुर पोलीस स्टेशनमध्ये सहाय्यक पोलीस निरीक्षक राजेंद्र गायकवाड यांच्या फिर्यादीवरून मॅनेजर अंजनेल्लु मलय्या पल्ले याच्यासह वरील सगळ्या ४० आरोपींविरुद्ध महाराष्ट्र जुगार प्रतिबंधक कायद्याचं कलम ४ व ५ आणि महाराष्ट्र पोलीस कायद्याचं कलम ३३(x), १३१ अन्वये गुन्हा दाखल करण्यात आला आहे. विरुर पोलीस या प्रकरणाचा पुढचा सखोल तपास करत आहेत.
