चंद्रपूरमध्ये प्रत्येक गाव आणि वॉर्डात बाल संरक्षण समिती, बालमजुरीविरोधात तपासणी मोहीम राबवण्याचेही आदेश

चंद्रपूर जिल्ह्यात लहान मुलांच्या संरक्षणाचं काम जास्त जोमाने व्हावं, यासाठी जिल्हाधिकारी वसुमना पंत यांनी यंत्रणेला स्पष्ट सूचना दिल्या आहेत. जिल्ह्यातल्या प्रत्येक गावात आणि शहरातल्या प्रत्येक वॉर्डात बाल संरक्षण समिती तयार करायची आणि तिचा अहवाल लगेच सादर करायचा, असं त्यांनी सांगितलं. बालकांवरील अत्याचार, बालविवाह, बालमजुरी आणि मुलांचं शोषण थांबवणं हा या समित्यांचा हेतू आहे.

जिल्हाधिकारी कार्यालयात दर तीन महिन्यांनी होणारी आढावा बैठक नुकतीच पार पडली. त्यात जिल्हा बाल संरक्षण कक्ष, जिल्हा आणि रेल्वे चाईल्ड हेल्पलाईन, बाल कल्याण समिती व बाल न्याय मंडळ यांच्या कामाचा हिशेब घेतला गेला. बैठकीच्या अध्यक्षस्थानी पंत होत्या. बाल संरक्षणाशी जोडलेल्या वेगवेगळ्या योजना आणि अडकून पडलेली प्रकरणं यांचीही त्यांनी बारकाईने माहिती घेतली.

बालकामगारांविरुद्धची धाड मोहीम नीट आणि जोरात राबवावी, असं पंत यांनी बजावलं. जिल्ह्यात जिथे जिथे मुलांना कामाला लावलं जाण्याची शक्यता आहे, अशा सगळ्या जागांची नियमित तपासणी करायची आहे. बालमजुरी पूर्ण बंद व्हावी म्हणून संबंधित विभागांनी एकमेकांशी बोलून, ताळमेळ ठेवून काम करावं, असंही त्यांनी सांगितलं.

मुलांचं संरक्षण, संगोपन आणि पुनर्वसन याला प्रशासनानं सगळ्यात पहिलं प्राधान्य द्यायला हवं, असं पंत म्हणाल्या. अनाथ मुलांना अनाथ प्रमाणपत्र देण्याची जी प्रकरणं रखडली आहेत, ती लगेच निकाली काढा, असा त्यांचा आदेश होता. बालगृहात राहणाऱ्या मुलांच्या पुनर्वसनाचं काम वेगानं करा आणि पात्र मुलांचं नियमानुसार शक्य तितक्या लवकर पुनर्वसन करा, असंही त्यांनी स्पष्ट केलं. त्यासाठी जिल्हा बाल संरक्षण कक्षानं सगळ्या संबंधित यंत्रणांशी बोलून झटपट कारवाई करायची आहे.

अडचणीत सापडलेल्या, तसंच काळजी आणि संरक्षणाची गरज असलेल्या मुलांना तातडीनं मदत मिळावी, म्हणून चाईल्ड हेल्पलाईनचा १०९८ हा आपत्कालीन क्रमांक जिल्ह्यातल्या प्रत्येक गावात आणि वॉर्डात मोठ्या प्रमाणावर पोहोचवा, अशी सूचना त्यांनी केली. बाल कल्याण समिती आणि बाल न्याय मंडळाकडे पडून असलेली सगळी प्रकरणं नियमानुसार तातडीनं मार्गी लावा, असेही आदेश त्यांनी दिले.

जिल्हा महिला व बाल विकास अधिकारी प्रकाश भांदककर यांनी सादरीकरण करून जिल्हा बाल संरक्षण कक्ष, चाईल्ड हेल्पलाईन १०९८, बाल कल्याण समिती आणि बाल न्याय मंडळ यांच्या कामाचा सविस्तर आढावा मांडला.

बैठकीला बाल कल्याण समितीच्या अध्यक्ष ॲड. क्षमा बासरकर, शिक्षणाधिकारी अश्विनी केळकर, परिविक्षा अधिकारी अतिश चव्हाण आणि सायली पाटील, जिल्हा बाल संरक्षण अधिकारी अजय साखरकर, मनोविकृती तज्ज्ञ संदीप भटकर आणि चाईल्ड हेल्पलाईनचे जिल्हा समन्वयक अभिषेक मोहूर्ले हजर होते. जिल्हा विधी सेवा प्राधिकरण आणि सहायक कामगार आयुक्त कार्यालयाचे प्रतिनिधी, बाल कल्याण समिती व बाल न्याय मंडळाचे सदस्य, तसंच विविध विभागांचे अनेक अधिकारी आणि कर्मचारीही बैठकीत उपस्थित होते.