चालत्या बसमध्ये तरुणीवर बलात्काराचा प्रयत्न, कंडक्टरविरोधात छेडछाडीचा गुन्हा

रात्रीच्या वेळी एकट्या प्रवास करणाऱ्या महिला प्रवाशांची सुरक्षा किती कमकुवत आहे, हे दाखवणारी घटना नागपुरात घडली आहे. नागपूरहून आपल्या मध्यप्रदेशातील गावी जाणाऱ्या एका तरुणीवर धावत्या बसमध्ये बलात्काराचा प्रयत्न झाला. तरुणीने प्रसंगावधान राखत धाडस दाखवल्यामुळे ती या प्रसंगातून बचावली आणि तिचा जीव वाचला. नागपूरला परतल्यानंतर या घटनेचा उलगडा झाला असून, तिच्या तक्रारीवरून सीताबर्डी पोलिसांनी छेडछाडीचा गुन्हा दाखल केला आहे.

ही तरुणी वय वर्षे 21 असून सीताबर्डी परिसरातील एका व्यापाऱ्याच्या बंगल्यावर काम करते. 7 सप्टेंबर रोजी ती आपल्या मध्यप्रदेशातील गावी जाण्यासाठी निघाली होती. रात्रीच्या वेळी एमपी स्टँडवरून विजयंत ट्रॅव्हल्सच्या बसमध्ये ती चढली. बसमध्ये इतरही प्रवासी सोबत असल्यामुळे तरुणी आपल्या बर्थवर जाऊन झोपी गेली. तिच्या तक्रारीनुसार, रात्री साडेदहा वाजता प्रवासादरम्यान ती झोपेत असताना तिला कोणीतरी स्पर्श केल्यासारखे जाणवले. त्यावेळी तिला बसचा कंडक्टर तिथून जाताना दिसला. चुकून स्पर्श झाला असेल असे समजून तरुणीने त्यावेळी कोणतीही प्रतिक्रिया दिली नाही. तिच्या सीटभोवती प्रवाशांची संख्या कमी असल्याचे लक्षात आल्यामुळे कंडक्टरचा धीर आणखी वाढला.

मध्यरात्रीच्या सुमारास तरुणी पुन्हा झोपेत असताना कंडक्टर तिच्या सीटजवळ आला आणि तिच्याशी अभद्र वर्तन करू लागला. यावेळी मात्र तरुणीने धैर्य दाखवत त्याचा जोरदार प्रतिकार केला. कंडक्टरने तिचे पाय पकडले, तेव्हा तरुणी आरडाओरडा करू लागली. गोंधळ उडेल या भीतीने कंडक्टरने तिला सोडून दिले. त्या वेळी बसमध्ये एकटी असल्यामुळे तरुणीने शांत राहणेच योग्य समजले आणि पुढे काही बोलली नाही. तिच्या घरचे लोक तापट स्वभावाचे असल्यामुळे गावात ही घटना सांगितल्यास घरात वाद निर्माण होईल, अशी भीती तिला सतावत होती, त्यामुळे तिने काही काळ ही घटना लपवून ठेवली.

16 सप्टेंबर रोजी नागपूरला परतल्यावर तिने आपल्या मालकाला घडलेला प्रकार सांगितला. मालकाच्या मदतीने ती सीताबर्डी पोलीस स्टेशनला जाऊन तक्रार दाखल करू शकली. पोलिसांनी छेडछाडीचा गुन्हा दाखल करून तपास सुरू केला आहे. गुन्हा दाखल होऊन दोन दिवस उलटूनही आरोपी कंडक्टर अद्याप पोलिसांच्या हाती लागलेला नाही. रात्रीच्या वेळी अनेक महिला एकट्याच ट्रॅव्हल्स बसने प्रवास करतात, हे या घटनेतून पुन्हा एकदा समोर आले. अशा बसमध्ये महिलांवर बलात्कार झाल्याच्या घटना यापूर्वीही वेळोवेळी समोर आल्या आहेत. या घटनेमुळे ट्रॅव्हल्स बसमधील महिला प्रवाशांच्या सुरक्षेचा प्रश्न पुन्हा एकदा ऐरणीवर आला आहे. सीताबर्डी पोलीस स्टेशनचे निरीक्षक सुहास राऊत यांनी या घटनेला दुजोरा देत आरोपीचा शोध सुरू असल्याचे सांगितले.