काँग्रेसला मोठा धक्का! माजी आमदार राहुल बोंद्रे भाजपच्या वाटेवर, फेसबुक पोस्टवरून भाजप प्रवेशाचा निर्णय जाहीर

विधानसभा निवडणुकीनंतर राज्याच्या राजकारणात पक्षांतरांची मालिका काही थांबायचं नाव घेत नाहीये. आता बुलढाणा जिल्ह्यात काँग्रेसला मोठा धक्का बसला आहे. चिखलीचे माजी आमदार आणि काँग्रेसचे माजी जिल्हाध्यक्ष राहुल बोंद्रे भाजपमध्ये जाणार असल्याची घोषणा त्यांनी स्वतः केली आहे. या निर्णयामुळे चिखलीसह अख्ख्या बुलढाणा जिल्ह्याच्या राजकारणात एकच खळबळ उडाली आहे.

बोंद्रेंनी सोशल मीडियावर पोस्ट टाकून आपला हा राजकीय निर्णय जाहीर केला. काँग्रेससोबतच्या आपल्या प्रवासातल्या आठवणींना उजाळा देताना त्यांनी लिहिलं की, पक्षाने सामाजिक आणि राजकीय वाटचालीत आपल्याला अनेक संधी आणि पदं दिली. काँग्रेससोबत काम करताना अनेक जिवाभावाची माणसं जोडली गेल्याचंही त्यांनी नमूद केलं. आपल्या राजकीय कारकिर्दीच्या अगदी सुरुवातीच्या काळात मुकुल वासनिक यांनी आपल्याला मार्गदर्शन केल्याचं बोंद्रेंनी आवर्जून सांगितलं. तसंच काँग्रेस प्रदेशाध्यक्ष हर्षवर्धन सपकाळ यांनी आपल्याला अगदी भावासारखं प्रेम दिल्याचंही त्यांनी आपल्या पोस्टमध्ये लिहिलं आहे.

मात्र आता आपल्या राजकीय वाटचालीला पूर्णपणे वेगळं वळण देण्याचा निर्णय घेतल्याचं बोंद्रेंनी स्पष्ट केलं. भारतीय जनता पक्षात प्रवेश करणार असल्याचं त्यांनी जाहीर केलं. त्याचवेळी काँग्रेसमधल्या आपल्या जुन्या सहकाऱ्यांना आपण कधीच विसरणार नसल्याचंही त्यांनी भावनिक होत नमूद केलं.

बोंद्रेंच्या या निर्णयामुळे चिखलीच्या स्थानिक राजकारणात नवं समीकरण तयार होण्याची चर्चा आता सुरू झाली आहे. बोंद्रे यापूर्वी चिखली मतदारसंघातून दोन वेळा आमदार म्हणून निवडून आले आहेत आणि त्यांनी बुलढाणा जिल्हा काँग्रेसचं अध्यक्षपदही सांभाळलं आहे. 2024 च्या विधानसभा निवडणुकीत चिखली मतदारसंघातून काँग्रेसकडून बोंद्रे रिंगणात होते, पण त्यावेळी भाजपच्या श्वेता महाले यांनी त्यांचा पराभव केला होता.

बोंद्रेंच्या भाजप प्रवेशाची चर्चा याआधीही एकदा रंगली होती. ऑगस्ट 2026 मध्ये त्यांच्या संभाव्य भाजप प्रवेशाबद्दल वृत्त समोर आलं होतं. आता मात्र बोंद्रेंनी स्वतःच हा निर्णय जाहीर केल्याने त्या जुन्या चर्चेला पूर्णविराम मिळाला आहे.

या घडामोडीचा काँग्रेस प्रदेशाध्यक्ष हर्षवर्धन सपकाळ यांच्या बुलढाणा जिल्ह्यातील राजकीय समीकरणांवर नेमका काय परिणाम होतो, हे पाहणं आता महत्त्वाचं ठरणार आहे. चिखलीसह जिल्ह्यातले काँग्रेस कार्यकर्ते आणि भाजपची स्थानिक संघटना या बदलाकडे कशा नजरेने बघते, याकडेही राजकीय वर्तुळाचं लक्ष लागलं आहे.