अंबाजोगाईत व्यापाऱ्याच्या घरातून ५३ तोळे सोने लंपास; दोघे अटकेत, डीव्हीआर तलावातून जप्त

बीड जिल्ह्यातील अंबाजोगाई शहरात एका व्यापाऱ्याच्या बंद घरात घुसून सोने-चांदीचे दागिने आणि रोकड लांबवणाऱ्या टोळीचा छडा स्थानिक गुन्हे शाखेने लावला आहे. या चोरीत तब्बल ५३ तोळे सोने, पावणेदोन किलो चांदी आणि साडेपाच लाख रुपयांची रोकड गायब झाली होती. पोलिसांनी या प्रकरणी दोन आरोपींना अटक केली असून त्यांच्याकडून २७ तोळे सोने आणि ८५८ ग्रॅम चांदी जप्त करण्यात आली आहे. या टोळीतील तिसरा आरोपी अजूनही फरार आहे.

या गुन्ह्यातील सगळ्यात मोठी गंमत म्हणजे आरोपींनी चोरीनंतर घटनास्थळाचे सीसीटीव्ही फुटेज असलेला डीव्हीआर पुरावा मिटवण्यासाठी थेट तलावात फेकून दिला होता. पण पोलिसांनी तोच डीव्हीआर तलावातून शोधून काढला आणि त्यामुळेच तपासाला योग्य दिशा मिळाली.

अंबाजोगाईतील व्यापारी सारडा यांच्या बंद घरात २० सप्टेंबर रोजी ही चोरी झाली होती. घरातून सोने-चांदीचे दागिने आणि रोख रक्कम गायब झाल्याचे लक्षात येताच पोलिसांनी तपास सुरू केला. स्थानिक गुन्हे शाखेच्या पथकाने परिसरातील ५० पेक्षा जास्त सीसीटीव्ही कॅमेऱ्यांचे फुटेज बारकाईने तपासले, तेव्हा तीन संशयित दुचाकीवरून फिरताना दिसले. या तांत्रिक धाग्यांच्या आधारे पोलिसांनी परळी परिसरात सापळा लावून अमर काकासाहेब थोरात आणि जगजितसिंग अचलसिंग दुधानी या दोघांना ताब्यात घेतले. चौकशीदरम्यान या तिघांनी चोरी केल्यानंतर तलावाकाठी बसून दागिन्यांची आपापसात वाटणी केल्याचे उघड झाले.

चोरी केल्यानंतर आरोपींनी वापरलेले हातमोजे, जॅकेट, कपडे आणि सीसीटीव्हीचा डीव्हीआर तलावात फेकून पुरावे नष्ट करण्याचा प्रयत्न केला होता. पण पोलिसांनी तलावात शोधमोहीम राबवून तो डीव्हीआर हस्तगत केला, आणि हाच पुरावा पुढच्या तपासासाठी कळीचा ठरला. पोलिसांनी दिलेल्या माहितीनुसार, आरोपी अमर थोरात रिक्षा चालवण्याचे काम करत होता आणि त्यानेच आधी व्यापाऱ्याचे घर हेरून ठेवले होते. त्यानंतर साथीदारांना सोबत घेऊन चोरीचा कट रचण्यात आला. कौटुंबिक आर्थिक अडचणीतून हा गुन्हा घडल्याचे प्राथमिक तपासात पोलिसांना आढळले आहे.

या प्रकरणातील तिसरा आरोपी मंगलसिंग बावरी अद्याप फरार असून त्याचा शोध घेण्यासाठी पोलिसांची स्वतंत्र पथके कामाला लागली आहेत. चोरीला गेलेली सुमारे साडेपाच लाख रुपयांची रोकड अजूनही सापडलेली नाही. पोलिसांनी सांगितले की, अटक आरोपी जगजितसिंग दुधानी याच्यावर याआधीही दरोडा, चोरी आणि घरफोडीसह दहापेक्षा जास्त गंभीर गुन्हे दाखल आहेत. परभणी आणि लातूर जिल्ह्यांतील काही चोरीच्या गुन्ह्यांतही तो फरार होता. या टोळीविरोधात मकोका, हद्दपारी आणि इतर लागू कायद्यांखाली कारवाई केली जाणार असल्याचे बीडचे पोलिस अधीक्षक नवनीत कावत यांनी सांगितले. पुढील तपास सुरू आहे.