भांगडिया यांच्या चहापानानंतर चर्चा; "वडेट्टीवारच माझा पक्ष," सुरमवार यांचे स्पष्टीकरण

सावलीतील बाजार समितीचे संचालक आणि काँग्रेसचे युवा नेते निखिल सुरमवार यांनी पत्रकार परिषद घेऊन आपण काँग्रेससोबतच असल्याचे सांगितले. सुरमवार हे काँग्रेसचे आमदार विजय वडेट्टीवार यांचे निकटवर्तीय मानले जातात. भाजपचे आमदार कीर्तिकुमार भांगडिया त्यांच्या घरी येऊन गेल्यानंतर गेले चार दिवस सावलीच्या राजकीय वर्तुळात आणि समाजमाध्यमांवर वेगवेगळ्या चर्चा सुरू होत्या. त्यावर त्यांनी ही पत्रकार परिषद घेतली.

ब्रम्हपुरी विधानसभा क्षेत्राचे आमदार विजय वडेट्टीवार आणि चिमुरचे आमदार कीर्तिकुमार भांगडिया हे कट्टर विरोधक समजले जातात. अशा वेळी भांगडिया अचानक वडेट्टीवार यांचे कट्टर समर्थक मानल्या जाणाऱ्या सुरमवार यांच्या घरी गेले. विरोधकांनी या भेटीचे भांडवल केले आणि त्यामुळे सुरमवार चांगलेच चर्चेत आले. सावली येथील आमदार वडेट्टीवार यांच्या जनसंपर्क कार्यालयात त्यांनी पत्रकारांशी संवाद साधला.

"मी कायम काँग्रेस पक्षासोबत आहे आणि आमदार विजय वडेट्टीवार हाच माझा पक्ष आहे, असे म्हणत भविष्यातही त्यांच्यासोबतच राहणार आहे," असे सुरमवार यांनी स्पष्ट केले. पक्षांतराच्या चर्चांना त्यांनी ठामपणे नकार दिला.

भांगडिया यांच्या भेटीबद्दल सुरमवार म्हणाले की, भांगडिया यांनी स्वतः फोन करून आपण चहापानासाठी घरी येत असल्याचे सांगितले आणि त्यानंतर ते घरी आले. पाहुण्यांचे स्वागत करण्याची परंपरा काँग्रेसची आणि सुरमवार कुटुंबाची असल्याने आपण त्यांचे स्वागत केले, असे त्यांनी सांगितले. या भेटीला कोणताही राजकीय संदर्भ नव्हता, असेही त्यांनी स्पष्ट केले.

दरम्यान, अवेश पठाण हे आपले मित्र असून त्यावेळी त्यांचा वाढदिवस साजरा केला आणि कोणतीही राजकीय चर्चा झालेली नाही, असे सुरमवार यांनी सांगितले. समाजमाध्यमांवर 'भाजपमध्ये जाणार का?' अशा स्वरूपाच्या बातम्या आणि चर्चा सुरू झाल्याचा उल्लेख करून ते म्हणाले, "मी काँग्रेसमध्येच असून विजय वडेट्टीवार यांच्यासोबत कायम आहे."

आगामी जिल्हा परिषद निवडणुकीबाबतही त्यांनी आपली भूमिका मांडली. काँग्रेस पक्षाने कोणत्याही क्षेत्रातून निवडणूक लढण्याचा आदेश दिला, तर आपण पक्षाच्या आदेशानुसार निवडणूक लढवू, असे त्यांनी सांगितले.

"विरोधकांकडून पक्षात संभ्रम निर्माण करण्याचा प्रयत्न केला जात आहे. मात्र कार्यकर्त्यांनी अशा चर्चांवर विश्वास ठेवू नये," असे आवाहनही निखिल सुरमवार यांनी केले. भांगडिया यांच्या भेटीनंतर सुरू झालेल्या चर्चांवर या पत्रकार परिषदेत त्यांनी स्वतःची भूमिका स्पष्ट केली आणि आपण काँग्रेस आणि विजय वडेट्टीवार यांच्यासोबतच असल्याचा पुनरुच्चार केला.

पत्रकार परिषदेला तालुका काँग्रेसचे अध्यक्ष नितीन गोहणे, महिला तालुका अध्यक्ष उषा भोयर, सावलीच्या नगराध्यक्षा साधना वाढई, काँग्रेसचे शहर अध्यक्ष क्रिष्णा राऊत, बाजार समिती सभापती राजू ठाकरे, पंचायत समितीचे माजी सभापती विजय कोरेवार आणि बाजार समिती उपाध्यक्ष प्रमोद दाजगाये उपस्थित होते. नगरसेवक सचिन संगिडवार, प्रितम गेडाम, मुन्ना रस्से, प्रफुल वाळके, आशिष मनबत्तुवार, आशिष पुण्यपवार, प्रशांत राईंचवार यांच्यासह शेकडो काँग्रेस पदाधिकारी आणि कार्यकर्तेही हजर होते.