बर्म्युडाहून बोस्टनला निघालेली कॅनेडियन एअर अॅम्ब्युलन्स समुद्रात कोसळली, सहा जण बेपत्ता

बर्म्युडाहून अमेरिकेतील बोस्टनकडे रुग्णाला घेऊन निघालेल्या एका कॅनेडियन एअर अॅम्ब्युलन्सचा संपर्क अचानक तुटला आणि हे विमान अटलांटिक महासागरात कोसळल्याची माहिती समोर आली आहे. अमेरिकेच्या तटरक्षक दलाने (US Coast Guard) मॅसॅच्युसेट्स राज्यातील नॅन्टकेट (Nantucket) किनाऱ्याजवळ शोधमोहिमेदरम्यान विमानाचे अवशेष आणि ढिगाऱ्याचा भाग शोधून काढला आहे.

अधिकृत माहितीनुसार, कॅनेडियन नोंदणीचे हे विमान बर्म्युडातील एल.एफ. वेड आंतरराष्ट्रीय विमानतळावरून (L.F. Wade International Airport) रात्री बोस्टनच्या दिशेने निघाले होते. विमानात एकूण सहा जण होते. त्यात चार कॅनेडियन नागरिक आणि बर्म्युडाचे दोन स्थानिक रहिवासी होते. चार जण विमानाचे कर्मचारी होते आणि दोघे प्रवासी होते. प्रवासात अटलांटिकवर आलेले जोरदार वादळ आणि अचानक झालेला तांत्रिक बिघाड या विमानासाठी प्राणघातक ठरला, असे सांगितले जात आहे.

विमान बेपत्ता होण्याआधी एअर ट्रॅफिक कंट्रोल (ATC) आणि वैमानिक यांच्यात झालेल्या शेवटच्या संभाषणाची ऑडिओ क्लिप आता समोर आली आहे. शनिवारी सकाळी विमान आकाशात असताना त्यातील वीजपुरवठा अचानक खंडित झाला आणि विद्युत यंत्रणा पूर्णपणे कोलमडली. त्याच वेळी विमान मोठ्या सागरी वादळात सापडले होते.

वीजपुरवठा गेल्यामुळे विमानातील सर्व आधुनिक दिशादर्शक उपकरणे (Navigation Systems) बंद पडली. वैमानिकाने अत्यंत बिकट परिस्थितीत एटीसीला मे-डे (Mayday) हा आपत्कालीन संदेश दिला. एटीसी नियंत्रकाने वैमानिकाला विचारले, "रॉजर, तुम्ही म्हणालात का की तुम्ही डेड रेकनिंगनुसार (Dead Reckoning - कोणत्याही डिजिटल उपकरणांशिवाय केवळ अंदाजावर) उड्डाण करत आहात?" हाच वैमानिकाचा शेवटचा संवाद ठरला आणि काही क्षणांतच विमानाचा रडारशी असलेला संपर्क कायमचा तुटला.

फ्लाइटरडार२४ (Flightradar24) या फ्लाइट-ट्रॅकिंग संकेतस्थळाच्या प्राथमिक डेटानुसार, हे विमान सुमारे २४,००० फूट उंचीवर होते. वादळात सापडल्यानंतर आणि वीजपुरवठा खंडित झाल्यानंतर अवघ्या काही सेकंदांत ते सुमारे १०,००० फूट खाली आले.

परिवहन विभागाच्या माजी महानिरीक्षक आणि ज्येष्ठ विमानचालन तज्ज्ञ मेरी शियावो (Mary Schiavo) यांच्या मते, अशा वादळात विमानातील सर्व डिजिटल आणि नेव्हिगेशन उपकरणे अचानक बंद पडली, की वैमानिकांसमोर 'स्पेशियल डिसओरिएंटेशन' (Spatial Disorientation - अवकाशीय दिशाभूल) अशी स्थिती निर्माण होते. आकाशात किंवा ढगांत उडताना विमान कोणत्या दिशेने वळतेय, वर जातेय की वेगाने खाली येतेय, याचा अंदाज बांधणे माणसाच्या मेंदूला अत्यंत कठीण होते. याच मानसिक आणि तांत्रिक गोंधळामुळे विमान थेट समुद्रात कोसळले असावे, असा प्राथमिक अंदाज व्यक्त केला जात आहे.

घटनेची माहिती मिळताच अमेरिकन तटरक्षक दलाने मोठ्या प्रमाणावर शोध आणि बचावकार्य (Search and Rescue Operation) सुरू केले आहे. तटरक्षक दलाची गस्ती जहाजे आणि हेलिकॉप्टर रात्रंदिवस नॅन्टकेटच्या किनाऱ्याजवळील सागरी भागात शोध घेत आहेत. कॅनडाचे परिवहन मंत्री स्टीव्हन मॅकिनन (Steven MacKinnon) यांनी 'एक्स' (X) वर या घटनेबद्दल तीव्र दुःख व्यक्त केले असून कॅनेडियन सरकार अमेरिकन अधिकाऱ्यांच्या सतत संपर्कात असल्याचे म्हटले आहे.

यूएस नॅशनल ट्रान्सपोर्टेशन सेफ्टी बोर्ड (NTSB) देखील घटनेची संपूर्ण माहिती गोळा करत आहे. समुद्रातून विमानाचे उर्वरित अवशेष आणि ब्लॅक बॉक्स (Black Box) बाहेर काढल्यानंतरच अपघाताच्या अधिकृत आणि सखोल चौकशीची घोषणा केली जाईल. सध्या बेपत्ता असलेल्या सर्व सहा जणांच्या कुटुंबीयांना घटनेची माहिती देण्यात आली आहे.