नागपुरात दर्जीकाम करणाऱ्या व्यक्तीला मारहाण करून आरोपींनी मागितला महिना २० हजारांचा हप्ता

नागपूरच्या तहसील पोलीस स्टेशन हद्दीत दर्जीकाम करणाऱ्या एका व्यक्तीला काही अनोळखी तरुणांनी मारहाण करून महिन्याला २० हजार रुपये खंडणी मागितल्याची घटना समोर आली आहे. ही घटना नागपुरातील तहसील पोलीस स्टेशन हद्दीतील पांचपावली येथील पहिल्या रेल्वे फाटकाजवळच्या भागात घडली.

संजय खरबीकर हे पांचपावलेश्वर मंदिरात दर्शनासाठी गेले होते. दर्शन घेऊन तिथून दुचाकीवरून परतत असताना पांचपावली येथील पहिल्या फाटकाजवळ असलेल्या चंद्रशेखर भिसीकर यांच्या चहाच्या टपरीसमोर अचानक तीन तरुण त्यांच्या बाइकसमोर आले. खरबीकर यांनी या तरुणांना रस्त्यातून बाजूला होण्यास सांगितले, त्यावरून त्यांच्यात वाद सुरू झाला. वाद वाढल्यावर तरुणांनी शिवीगाळ करत खरबीकर यांना मारहाण करायला सुरुवात केली. एवढ्यावरच न थांबता त्यांनी रस्त्यावरचा मोठा दगड उचलून तो खरबीकर यांच्या बाइकवर भिरकावला.

खरबीकर यांची चहाची टपरी चालवणाऱ्या भिसीकर यांच्याशी आधीपासून ओळख आणि मैत्री आहे. मारहाणीनंतर घाबरलेले खरबीकर भिसीकर यांच्या टपरीवर जाऊन पोहोचले. तिथे ते चहा पीत असतानाच आरोपी तरुण पुन्हा तिथे परत आले आणि त्यांनी खरबीकर यांना पुन्हा एकदा मारहाण करायला सुरुवात केली. यावेळी भिसीकर मध्ये पडून हा वाद मिटवण्याचा प्रयत्न करत होते, मात्र आरोपींनी उलट त्यांनाच चाकू दाखवून धमकावले. चहाची टपरी चालवण्याच्या बदल्यात दर महिन्याला २० हजार रुपये हप्ता द्यावा लागेल, असे आरोपींनी भिसीकर यांना स्पष्टपणे सांगितले. एवढेच नाही, तर हप्ता न दिल्यास जिवे मारण्याची धमकीही आरोपींनी त्यांना दिली.

या संपूर्ण प्रकारानंतर संजय खरबीकर यांनी तहसील पोलीस स्टेशनमध्ये जाऊन तक्रार दाखल केली. पोलिसांनी तक्रारीच्या आधारे गुन्हा दाखल करून तपास सुरू केला आणि सोहम उर्फ सोनू निमजे आणि अक्षय धकाते या दोन आरोपींना अटक केली आहे. या प्रकरणातील तिसरा आरोपी मात्र अद्याप फरार असून पोलीस त्याचा शोध घेत आहेत. तपासादरम्यान आरोपी सोहम निमजे याच्याविरोधात याआधीही एनडीपीएस कायद्याखाली तसेच बेकायदेशीर शस्त्र बाळगल्याप्रकरणी गुन्हे दाखल असल्याचे समोर आले आहे. दुसरा आरोपी अक्षय धकाते यालाही जुना गुन्हेगारी रेकॉर्ड असल्याचे पोलिसांनी सांगितले.