अँटॉप हिलमध्ये मंत्रजपाच्या बहाण्याने ७० वर्षीय महिलेचे दागिने लंपास; तरुणीचा पोलीस शोध घेत आहेत

मुंबईतील अँटॉप हिल परिसरात एका ७० वर्षीय महिलेची मंत्रजपाच्या बहाण्याने फसवणूक करून तिचे सोन्याचे दागिने लंपास करण्यात आल्याची धक्कादायक घटना समोर आली आहे. कुलसुमबी काझी असे या महिलेचे नाव आहे.

कुलसुमबी काझी दूध घेऊन घरी परतत असताना एका अनोळखी तरुणीने त्यांचा पाठलाग केला. त्यानंतर ती त्यांच्या घरात शिरली आणि बहिणीच्या लग्नाची पत्रिका देण्यासाठी आल्याचे तिने सांगितले. अशा प्रकारे तिने महिलेचा विश्वास संपादन केला.

बोलता बोलता तरुणीने कुलसुमबी यांची तब्येत ठीक नसल्याचे सांगितले. आपल्याला मंत्रजपाच्या माध्यमातून आजारपण बरे करता येते, असा दावाही तिने केला. त्यानंतर मंत्रजपाचा बहाणा करून तिने महिलेच्या अंगावरील सोन्याचे मंगळसूत्र आणि दोन्ही कानांतील दागिने काढून घेतले.

पुढे तिने घरातील तांदूळ आणून ते त्या दागिन्यांवर ठेवले आणि काही मंत्र पुटपुटल्याचे नाटक केले. सर्व दागिने एका ओढणीत बांधून ही ओढणी काही तास उघडू नका, असा सल्ला तिने दिला.

'दोन-तीन तासांत तुम्हाला आजारातून फरक जाणवेल. तोपर्यंत ओढणी उघडू नका, मी पुन्हा येते,' असे सांगून ती तरुणी घरातून निघून गेली. मात्र अनेक तास उलटूनही ती परतली नाही.

त्यामुळे कुलसुमबी यांना संशय आला. त्यांनी ओढणी उघडून पाहिली, तेव्हा त्यातील दागिने गायब असल्याचे त्यांच्या लक्षात आले. परिसरात शोध घेऊनही तरुणीचा ठावठिकाणा लागला नाही. आपली फसवणूक झाल्याचे समजल्यानंतर त्यांनी तातडीने पोलिसांत तक्रार दाखल केली.

अँटॉप हिल पोलिसांनी या प्रकरणाचा तपास सुरू केला असून, परिसरातील सीसीटीव्ही फुटेजच्या आधारे संशयित तरुणीचा शोध घेतला जात आहे.

विशेष म्हणजे, मानखुर्द परिसरात गेल्या महिन्यात ६५ वर्षीय वृद्ध महिलेसोबतही अशाच पद्धतीने फसवणूक झाल्याची घटना घडली होती. त्यामुळे अँटॉप हिलमधील घटनेमागेही त्याच प्रकारचे गुन्हे करणाऱ्या टोळीचा सहभाग आहे का, याचा तपास पोलीस करत आहेत.