अर्जुन राजपूतचे शतक, बाकीचे ढेपाळले; भारताचे पाकिस्तानसमोर 209 धावांचे आव्हान

अंडर-19 आशिया चषक स्पर्धेतील भारत आणि पाकिस्तान यांच्यातील वनडे सामन्यात भारतीय अंडर-19 संघाचा डाव सर्वबाद 208 धावांत संपला. त्यामुळे भारताचा कट्टर प्रतिस्पर्धी असलेल्या पाकिस्तानसमोर जिंकण्यासाठी 209 धावांचे आव्हान आहे. भारताच्या फलंदाजांची पहिली फळी अक्षरशः ढेपाळली. पण पाचव्या क्रमांकावर आलेल्या अर्जुन राजपूतने एकट्याने किल्ला लढवला आणि दमदार शतक झळकावले. त्याचमुळे भारताला एवढी धावसंख्या उभारता आली.

भारताने नाणेफेक जिंकली, पण निर्णय घेण्याचा कल चुकला. पहिल्या फळीत मातब्बर फलंदाज होते, ते पाहून भारत मोठी धावसंख्या उभारेल असे वाटत होते. दिवाळीच्या पहिल्याच दिवशी मात्र तसे झाले नाही आणि अपेक्षा फुसक्या ठरल्या. कर्णधार लक्ष्य रायचंदानी आणि आर्यवीर सेहवाग यांना खेळपट्टीवर टिकून खेळता आले नाही.

कर्णधार लक्ष्य एकही धाव न करता माघारी परतला. अली रजाने त्याला लक्ष्य करत क्लीनबोल्ड केले. तिसऱ्या क्रमांकावर आलेला वि. के. विनित 8 धावांवर बाद झाला, तर यशबर्धन चौहानला फक्त 1 धाव करता आली. दोघेही आल्या पावली परतले. आर्यवीर सेहवागने एक चौकार आणि एक षटकार मारत 22 धावा केल्या आणि काही वेळ खिंड लढवली, पण तोही आपली विकेट टिकवू शकला नाही.

एकामागून एक अनेक फलंदाज येत होते आणि आल्या पावली परतत होते. त्यात फक्त अर्जुन टिकून राहिला. तो खेळपट्टीवर टिकलाच, शिवाय दुसऱ्या बाजूने कोणतीही मदत मिळत नसतानाही त्याने पाकिस्तानच्या गोलंदाजांचा वचपा काढायला सुरुवात केली. त्याने 85 चेंडूंत 11 चौकार आणि 5 गगनचुंबी षटकारांसह 107 धावांची शतकी खेळी केली. त्याची सरासरी 125 होती.

अर्जुनने मनल चौहानच्या साथीने 64 धावांची भागीदारी रचली. त्यात अर्जुनच्या 50 धावांचा समावेश होता, तर मनलने 11 धावा केल्या. अखेरच्या काळात काव्या पटेलने 23 धावांची दमदार फलंदाजी केली, ज्यामुळे भारताने 200 धावांचा आकडा पार केला.

पाकिस्तानच्या गोलंदाजांनीही मिळालेल्या प्रत्येक संधीचे सोने केले. अर्जुनचा अपवाद वगळता त्यांना हव्या तशा विकेट जवळपास मिळत गेल्या. अली रजाने सुरुवात करून दिली. त्याने 10 षटकांत 37 धावा देत 3 महत्त्वाचे फलंदाज बाद केले. नकीब सकीफ आणि रिझवानउल्लाह यांनी त्याला चांगली साथ दिली. या दोघांनाही प्रत्येकी 3 विकेट मिळाल्या. अशा प्रकारे या तिघांनी भारताच्या धावगतीवर अंकुश ठेवला.

आता विकेट घेण्याची भारतीय गोलंदाजांची पाळी आहे. भारताच्या गोलंदाजीलाही धार आहे, त्यामुळे सामन्याचे फासे पलटायला फार वेळ लागणार नाही. म्हणूनच दुसरा डाव पाहणे रोमहर्षक ठरणार आहे.