सय्यद मुश्ताक अली टी-२० ट्रॉफीसाठी दिल्लीचा संघ जाहीर, नितीश राणाला वगळले; आयुष बडोनी कर्णधार

सय्यद मुश्ताक अली टी-२० ट्रॉफी २०२६ साठी ६ नोव्हेंबर २०२६ रोजी विविध राज्यांच्या संघांची घोषणा करण्यात आली. आगामी देशांतर्गत टी-२० स्पर्धेसाठी जाहीर झालेल्या या संघांमध्ये काही बड्या खेळाडूंना जागा मिळालेली नाही. नितीश राणा, मयंक अग्रवाल आणि श्रेयस गोपाळ यांना संघातून डच्चू देण्यात आला आहे.

दिल्लीनेही आपला संघ जाहीर केला असून हा संघ १६ सदस्यांचा आहे. या संघात मोठे बदल करण्यात आले आहेत. माजी कर्णधार नितीश राणाला मोठा धक्का बसला आहे, कारण त्याला या संघात स्थान देण्यात आलेले नाही. त्याची दिल्ली संघात निवड न झाल्याने क्रिकेट वर्तुळात चर्चा सुरू झाली आहे. दिल्लीच्या संघाचे कर्णधारपद आता आयुष बडोनीकडे सोपविण्यात आले आहे.

कर्नाटकच्या संघातूनही अनुभवी फलंदाज मयंक अग्रवाल आणि श्रेयस गोपाळ यांना स्थान देण्यात आलेले नाही. त्यामुळे आश्चर्य व्यक्त केले जात आहे.

बिहार क्रिकेट संघानेही या स्पर्धेसाठी आपल्या संघाची घोषणा केली आहे. विशेष म्हणजे बिहारच्या संघाचे कर्णधारपद वैभव सूर्यवंशीकडे सोपविण्यात आले आहे. त्यामुळे आता त्याच्यावर नवीन जबाबदारी आली आहे.

भारतातील प्रतिष्ठित मानली जाणारी ही देशांतर्गत टी-२० स्पर्धा १४ नोव्हेंबरपासून सुरू होणार आहे. या स्पर्धेत सर्वच राज्यांचे संघ आपापले कौशल्य सिद्ध करण्यासाठी सज्ज झाले आहेत, तर युवा खेळाडूंसाठी ही स्पर्धा एक मोठी संधी असणार आहे.

या आगामी हंगामात दिल्लीच्या संघाला एलीट ग्रुप-बीमध्ये स्थान देण्यात आले आहे. या ग्रुपमध्ये दिल्ली, बिहार, हरियाणा, जम्मू-काश्मीर, पंजाब, रेल्वे, सौराष्ट्र आणि तामिळनाडू हे संघ असणार आहेत. या ग्रुपचे सर्व सामने इंदूर येथे होणार आहेत. दिल्लीचा संघ आपल्या मोहिमेची सुरुवात १४ नोव्हेंबर रोजी जम्मू-काश्मीरविरुद्ध होणाऱ्या पहिल्या सामन्याने करणार आहे.

दिल्लीचा संघ असा आहे: आयुष बडोनी (कर्णधार), प्रियांश आर्य, सार्थक रंजन, यश ढुल, आयुष दोसजा, हिम्मत सिंह, मयंक रावत, केशव डबास, तेजस्वी, अनुज रावत, इशांत शर्मा, हर्षित राणा, मयंक यादव, सिमरजीत सिंह, सुयश शर्मा आणि दिग्वेश.