रामदास आठवलेंचं नवं दबाव तंत्र; महामंडळ आणि विधानपरिषदेसाठी मुख्यमंत्र्यांनी आश्वासन दिल्याची ग्वाही

केंद्रीय मंत्री रामदास आठवले यांनी मुख्यमंत्री देवेंद्र फडणवीस यांच्याकडून एक महत्त्वाचं आश्वासन मिळाल्याचं जाहीर केलं आहे. आरपीआय पक्षाकडून दोन महामंडळांचं अध्यक्षपद आणि विधानपरिषदेची एक जागा मागण्यात आली असून, याबाबत मुख्यमंत्र्यांनी आश्वासन दिल्याचं आठवले यांनी सांगितलं.

आम्ही स्वतःच्या ताकदीवर निवडून येत नाही, मात्र आरपीआय पक्ष महाराष्ट्रात सत्तेत नसला तरी कोणाला निवडून आणायचं आणि कोणाला पाडायचं ही ताकद आणि मतं आमच्याकडे आहेत, असं आठवले यावेळी म्हणाले. कार्यकर्त्यांची ताकद आपल्या मागे ठामपणे उभी असल्याचंही त्यांनी नमूद केलं.

मुख्य निवडणूक आयुक्तांनी राजीनामा द्यावा या मागणीवरून आठवले यांनी कॉक्रोज जनता पार्टीवर (CJP) टीका केली. फक्त राजीनामा मागणं हेच या लोकांचं काम आहे का, असा सवाल त्यांनी उपस्थित केला. तसंच या पक्षानं आपलं नाव बदलून राजीनामा जनता पार्टी असं ठेवावं, असा खोचक टोलाही त्यांनी लगावला.

रामदास आठवले यांच्या केंद्रीय मंत्रीपदाला दहा वर्षं पूर्ण होत असल्याच्या निमित्तानं रायगड जिल्ह्यातील पाली इथं त्यांचा भव्य सत्कार आयोजित करण्यात आला होता. याच सत्कार समारंभात ते बोलत होते, आणि याच व्यासपीठावरून त्यांनी वरील सर्व मुद्द्यांवर आपली मतं मांडली.

रायगड जिल्ह्यातील दुष्काळाच्या मुद्द्यावरही आठवले यांनी भाष्य केलं. सध्या रायगड जिल्ह्यातील फक्त श्रीवर्धन तालुक्याचाच दुष्काळी तालुका म्हणून समावेश करण्यात आला आहे. मात्र जिल्ह्यातील बाकीच्या तालुक्यांचाही विचार होणं गरजेचं आहे, असं मत त्यांनी मांडलं. भात शेतीचं कोठार म्हणून ओळखल्या जाणाऱ्या रायगड जिल्ह्यात अनेक तालुक्यांमध्ये पाऊस उशिरा आला, आणि त्यानंतर जास्त पडलेल्या पावसामुळे पुराच्या पाण्यात भात शेती वाहून गेली. या सगळ्या कारणांमुळे जिल्ह्यातील भातशेती अडचणीत सापडली आहे. त्यामुळे रायगडमधील अनेक तालुक्यांचा दुष्काळी तालुक्यांमध्ये विचार होणं गरजेचं असून, यासाठी आपण नक्की प्रयत्न करू, असं आश्वासन आठवले यांनी यावेळी दिलं.

आपण केंद्र सरकारमध्ये गेली दहा वर्षं काम करत असल्याचं सांगत आठवले म्हणाले की, या सरकारनं देशाच्या अर्थव्यवस्थेला मोठी चालना दिली आहे. सरकारच्या अनेक योजनांच्या माध्यमातून देशातील जनतेला मदत मिळत आहे. मागील दहा वर्षांत आपल्या आरपीआय पक्षाला वाढवण्यासाठी आपण अनेक प्रयत्न केल्याचंही त्यांनी यावेळी सांगितलं.

गोरगरिबांना न्याय देणं ही आपली भूमिका असल्याचं आठवले यांनी स्पष्ट केलं. देशाच्या प्रत्येक राज्यात आरपीआयची शाखा असल्याचं त्यांनी सांगितलं. महाराष्ट्रात यापुढे आरपीआयचे दोन खासदार निवडून आले, तर राज्यात आपल्या पक्षाला मान्यता मिळू शकते, असंही ते यावेळी म्हणाले.