वीरेंद्र सेहवागचा मुलगा आर्यवीर दिल्लीच्या १९ वर्षांखालील संघाचा कर्णधार, विनू मांकड ट्रॉफीसाठी संघ जाहीर

भारताचा माजी स्फोटक फलंदाज वीरेंद्र सेहवाग यांचा मुलगा आर्यवीर सेहवाग याच्याकडे आता दिल्लीच्या १९ वर्षांखालील पुरुष संघाचे कर्णधारपद आले आहे. विनू मांकड ट्रॉफीसाठी त्याची नियुक्ती करण्यात आली आहे. दिल्ली आणि जिल्हा क्रिकेट असोसिएशनने (डीडीसीए) संघाची घोषणाही केली आहे.

आर्यवीर नुकताच ऑस्ट्रेलियाच्या १९ वर्षांखालील संघाविरुद्ध भारताच्या १९ वर्षांखालील संघाकडून खेळला. त्या मालिकेत त्याला मोठी खेळी करता आली नाही. तरीही डीडीसीएने आता त्याच्यावर ही महत्त्वाची जबाबदारी सोपवली आहे.

डीडीसीएच्या ज्युनियर पुरुष निवड समितीची बैठक झाली आणि त्यानंतर आर्यवीरच्या नेतृत्वाखालील १६ सदस्यीय संघ जाहीर करण्यात आला. या संघात अनेक युवा खेळाडू आहेत. रन्नव बुग्गा उपकर्णधार आहे. ही स्पर्धा ८ ऑक्टोबरपासून विशाखापट्टणम येथे खेळवली जाणार आहे. आता सगळ्यांचे लक्ष आर्यवीरकडे असेल.

ऑस्ट्रेलियाविरुद्धची ती तीन सामन्यांची एकदिवसीय मालिका होती. त्यात आर्यवीरने भारताच्या १९ वर्षांखालील संघाचे प्रतिनिधित्व केले आणि संघाला चांगली सुरुवात करून दिली. मालिकेत तो चांगल्या फॉर्ममध्ये दिसत होता, पण मोठी धावसंख्या उभारण्यात तो अपयशी ठरला. वीरेंद्र सेहवाग उपस्थित असलेल्या पहिल्या सामन्यात त्याने २८ धावा केल्या. दुसऱ्या सामन्यात त्याने ४७ धावा केल्या, पण त्याचे अर्धशतक हुकले. त्यानंतर तिसऱ्या सामन्यात त्याने ३४ धावांचे योगदान दिले.

वरिष्ठ पातळीवर क्रिकेट खेळण्याचा अनुभवही त्याच्या गाठीशी आहे. दिल्ली प्रीमियर लीगमध्ये तो वेस्ट दिल्ली लायन्सकडून खेळला होता. त्याला फक्त दोनच सामने खेळायला मिळाले आणि दोन्ही सामन्यांमध्ये मिळून त्याने २४ धावा केल्या. मात्र वरिष्ठ खेळाडूंसोबत ड्रेसिंग रूम शेअर करण्याची संधी त्याला मिळाली.

आर्यवीरने अलीकडेच सांगितले की त्याला क्रिकेटमध्ये मोठी कामगिरी करायची आहे. वीरेंद्र सेहवाग यांचा मुलगा असल्याचा दबाव त्याला जाणवत नाही. तो आपला नेहमीचा खेळ खेळतो, असेही त्याने सांगितले.

विनू मांकड ट्रॉफीसाठी दिल्लीचा १६ सदस्यीय संघ असा आहे: आर्यवीर सेहवाग (कर्णधार), तन्मय चौधरी, अर्णव बुग्गा (उपकर्णधार), धन्या नाकरा, उदय चावला, गर्व कुमार, अभिराज गगन सिंग (विकेटकीपर), तरुण सिंग (विकेटकीपर), आर्यन शर्मा, ओजसदीप सिंग, किरीट कौशिक, वरुण वंजानी, रुद्र देव यादव, प्रद्युम्न सानन, पार्थ राज आणि शांतनु यादव.