आंद्रे रसेलचा टी-२० मध्ये विश्वविक्रम: १०,००० धावा आणि ५०० विकेट्स करणारा पहिलाच खेळाडू

वेस्ट इंडिजचा माजी खेळाडू आंद्रे रसेल याने टी-२० क्रिकेटमध्ये असा पराक्रम केला आहे, जो आजपर्यंत कोणत्याही खेळाडूला जमलेला नाही. टी-२० मध्ये १०,००० धावा आणि ५०० विकेट्स अशी दोन्ही कामगिरी करणारा तो जगातला पहिलाच खेळाडू ठरला आहे. टी-२० क्रिकेटमध्ये आतापर्यंत अनेक आश्चर्यकारक मोठे विक्रम नोंदवले गेले आहेत, पण रसेलचा हा विक्रम त्यापेक्षा वेगळा आहे.

रसेल अजूनही फ्रँचायझी टी२० लीगमध्ये खेळतो आहे. सध्या तो नेपाळ प्रीमियर लीग २०२६ मध्ये धुमाकूळ घालतो आहे. या लीगच्या चालू हंगामात तो बिराटनगर किंग्स संघाकडून मैदानात उतरत आहे. त्याने नेहमीच आपल्या गोलंदाजीने आणि फलंदाजीने खळबळ माजवली आहे, आणि आता त्याने टी-२० मध्ये अनोखा इतिहास रचला आहे.

बिराटनगर किंग्सकडून खेळणारा रसेल आता टी-२० क्रिकेटमध्ये १०,००० धावा आणि ५०० विकेट्स घेणारा पहिला खेळाडू ठरला आहे. ५०० पेक्षा जास्त विकेट्स घेण्याचा विक्रम त्याने याआधीच प्रस्थापित केला होता. आता त्याने १०,००० धावाही पूर्ण केल्या आहेत. जगातील इतर कोणत्याही खेळाडूने ही कामगिरी केलेली नाही. टी-२० क्रिकेटमध्ये १०,००० धावा करणाऱ्या खेळाडूंच्या यादीत रसेल आता २१ व्या स्थानावर आहे.

या यादीत इंग्लंडचा जॉस बटलर पहिल्या क्रमांकावर आहे. त्याने १५,००० हून अधिक धावा केल्या आहेत. टी२० आंतरराष्ट्रीय सामन्यांमध्ये वेस्ट इंडिजच्या फलंदाजांत सर्वाधिक धावा करण्याचा विक्रम कायरोन पोलार्डच्या नावावर आहे. त्याने आजपर्यंत १४,९९९ धावा केल्या आहेत. रसेलसह फक्त सहा खेळाडूंनी टी२० आंतरराष्ट्रीय सामन्यांमध्ये ५०० किंवा त्याहून अधिक विकेट्स घेतल्या आहेत. तो लवकरच ५५० विकेट्सचा टप्पा गाठू शकतो.

रसेलची आतापर्यंतची कारकीर्द शानदार राहिली आहे. त्याने टी-२० क्रिकेटवर सातत्याने वर्चस्व गाजवले आहे. वेस्ट इंडिजसाठी तो ५६ एकदिवसीय सामने खेळला असून, त्यांत त्याने १०३४ धावा केल्या आहेत आणि ७० विकेट्स घेतल्या आहेत. याशिवाय ८५ टी-२० आंतरराष्ट्रीय सामन्यांत त्याच्या नावावर ११२२ धावा आणि ६१ विकेट्स आहेत. वेस्ट इंडिजसाठी तो फक्त एक कसोटी सामना खेळला आहे.

आयपीएलमध्येही रसेलने आपली छाप सोडली आहे. तिथे १३९ सामन्यांमध्ये त्याने २६५१ धावा केल्या आहेत आणि १२३ विकेट्स घेतल्या आहेत. त्याने प्रामुख्याने टी-२० क्रिकेटवर लक्ष केंद्रित केले असून, आतापर्यंत ६५० हून अधिक टी-२० सामने खेळले आहेत.