हॅमिल्टनमध्ये भारताच्या ८ बाद १९१ धावा; न्यूझीलंडला जिंकण्यासाठी १९२ हव्यात

भारत आणि न्यूझीलंड यांच्यातल्या पाच सामन्यांच्या टी-२० मालिकेतला पाचवा आणि शेवटचा सामना आज हॅमिल्टनच्या सेडन पार्क स्टेडियमवर सुरू आहे. न्यूझीलंडने नाणेफेक जिंकली आणि आधी गोलंदाजी करायचा निर्णय घेऊन भारताला फलंदाजीला बोलावले.

भारताने २० षटकांत ८ विकेट्स गमावून १९१ धावा केल्या. म्हणजेच आता न्यूझीलंडला हा सामना जिंकण्यासाठी १९२ धावांची गरज आहे.

भारताची सुरुवात मात्र फारशी चांगली झाली नाही. अभिषेक शर्मा आणि संजू सॅमसन यांनी डावाची सुरुवात केली. दुसऱ्या षटकाच्या पहिल्याच चेंडूवर ॲडम मिल्नेला मोठा फटका मारायच्या नादात अभिषेक शर्मा विकेटकीपरकडे झेल देऊन बाद झाला. त्याने फक्त १ धाव केली. त्यानंतर मिल्नेनेच संजू सॅमसनला ४ धावांवर बाद केले. त्यामुळे भारताच्या दोन्ही सलामीवीरांना स्वस्तात परतावे लागले.

या अडचणीतून श्रेयस अय्यर आणि ईशान किशन यांनी भारताला बाहेर काढले. या दोघांनी तिसऱ्या विकेटसाठी ९३ धावांची भागीदारी केली. ईशान किशनने ३२ चेंडूंत ५ चौकार आणि ५ षटकारांच्या जोरावर ६१ धावा केल्या. त्याला ब्लेअर टिकनरने बाद केले. श्रेयसनेही एका बाजूने झकास खेळ करत अवघ्या २२ चेंडूंत ५० धावा पूर्ण केल्या. मात्र अर्धशतक झाल्यावर लगेचच तो बाद झाला. कर्णधार श्रेयस अय्यरला नॅथन स्मिथने तंबूत पाठवले.

पाचव्या क्रमांकावर आलेला तिलक वर्मा फक्त ५ धावा करून परतला आणि त्याची विकेटही नॅथन स्मिथनेच घेतली. भारताची सहावी विकेट नमन धीरच्या रूपाने पडली. टिकनरने त्याला ३३ धावांवर बाद केले. धीरने आपल्या खेळीत ४ चौकार आणि एक षटकार मारला.

शेवटच्या षटकात नितीश रेड्डी २२ धावा करून ॲडम मिल्नेच्या चेंडूवर बाद झाला. त्यानंतर लगेचच भुवनेश्वर कुमारही ४ चेंडूंत ६ धावा करून तंबूत परतला. न्यूझीलंडकडून ॲडम मिल्नेने सर्वाधिक ४ विकेट्स घेतल्या. ब्लेअर टिकनर आणि नॅथन स्मिथ यांनी प्रत्येकी २ विकेट्स घेतल्या.

या सामन्यासाठी भारतीय संघात दोन बदल झाले आहेत. भुवनेश्वर कुमार आणि वरुण चक्रवर्ती यांना अंतिम ११ मध्ये घेण्यात आले असून मयंक यादव आणि अक्षर पटेल यांना वगळले आहे. वैभव सूर्यवंशीला सलग दुसऱ्या सामन्यात संघात जागा मिळाली नाही. न्यूझीलंडने मॅथ्यू फिशरच्या जागी ब्लेअर टिकनरला संधी दिली आहे.

भारताचा संघ असा: अभिषेक शर्मा, संजू सॅमसन (विकेटकीपर), ईशान किशन, श्रेयस अय्यर (कर्णधार), तिलक वर्मा, नितीश रेड्डी, नमन धीर, भुवनेश्वर कुमार, अर्शदीप सिंग, प्रिन्स यादव, वरुण चक्रवर्ती.

न्यूझीलंडचा संघ असा: फिन ऍलन, टिम सेफर्ट (विकेटकीपर), डॅरिल मिचेल, ग्लेन फिलिप्स, बेवन जेकब्स, मायकल ब्रेसवेल, मिचेल सँटनर (कर्णधार), नॅथन स्मिथ, ऍडम मिल्ने, जेकब डफी, ब्लेअर टिकनर.