उद्धव ठाकरे, एकनाथ शिंदे यांना कोर्टाचा दिलासा; वसंत डावखरे मानहानी प्रकरणात चौघांची निर्दोष मुक्तता

दिवंगत नेते वसंत डावखरे यांनी दाखल केलेल्या मानहानी खटल्याचा तब्बल 17 वर्षांनंतर निकाल लागला आहे. कल्याण न्यायालयाने उद्धव ठाकरे, उपमुख्यमंत्री एकनाथ शिंदे, माजी खासदार आनंद परांजपे आणि रमाकांत देवळेकर या चौघांचीही निर्दोष मुक्तता केली आहे. 23 सप्टेंबर 2026 रोजी हा निकाल जाहीर करण्यात आला. राज्याच्या राजकीय वर्तुळाचे लक्ष या निकालाकडे लागले होते.

हे संपूर्ण प्रकरण 2009 च्या लोकसभा निवडणुकीशी जोडलेले आहे. त्यावेळी कल्याण लोकसभा मतदारसंघातून राष्ट्रवादी काँग्रेसकडून वसंत डावखरे आणि शिवसेनेकडून आनंद परांजपे हे निवडणुकीच्या रिंगणात होते. कल्याण पूर्वेतील कोळसेवाडी भागात शिवसेनेची प्रचारसभा झाली होती. 22 एप्रिल 2009 रोजी झालेल्या याच सभेत, म्हणजे आनंद परांजपे यांच्या प्रचारासाठी आयोजित सभेत, तत्कालीन शिवसेना कार्याध्यक्ष उद्धव ठाकरे यांनी एक व्हिडिओ किंवा सीडी सार्वजनिकरीत्या दाखवली होती. ही सीडी डावखरे यांच्याशी संबंधित असल्याचा दावा करण्यात आला होता. या व्हिडिओत डावखरे हे कार्यकर्त्यांना निवडणूक जिंकण्यासाठी पोलीस आणि निवडणूक अधिकाऱ्यांची भीती न बाळगता प्रयत्न करण्यास सांगत असल्याचे दाखवण्यात आले होते.

मात्र वसंत डावखरे यांनी त्या व्हिडिओतील वक्तव्य आपले नसल्याचा दावा केला होता. आपली बदनामी करण्यासाठी व्हिडिओ निवडक पद्धतीने एडिट करण्यात आल्याचा आरोपही त्यांनी केला होता. यानंतर उद्धव ठाकरे, एकनाथ शिंदे, आनंद परांजपे आणि रमाकांत देवळेकर यांच्याविरोधात मानहानीचे प्रकरण न्यायालयात दाखल झाले होते.

जवळपास 17 वर्षे चाललेल्या या खटल्यात 20 हून अधिक साक्षीदारांची साक्ष नोंदवण्यात आली. उद्धव ठाकरे आणि एकनाथ शिंदे यांचे जबाब व्हिडिओ कॉन्फरन्सिंगच्या माध्यमातून नोंदवले गेले. आरोपींनी सुरुवातीपासूनच हे आरोप फेटाळले होते. न्यायालयीन प्रक्रिया पूर्ण झाल्यानंतर 23 सप्टेंबर रोजी अंतिम निकाल देण्यात आला, ज्यात न्यायालयाने चौघांचीही निर्दोष मुक्तता केली. यामुळे 2009 च्या निवडणुकीपासून सुरू असलेल्या या प्रदीर्घ प्रकरणावर न्यायालयीन पातळीवर पडदा पडला आहे.

निकालानंतर आनंद परांजपे यांनी समाधान व्यक्त केले. गेल्या 17 वर्षांपासून सुरू असलेल्या या केसमध्ये आता न्याय मिळाल्याचे ते म्हणाले. त्याचबरोबर वसंत डावखरे हे तेव्हाही आपल्यासाठी आदरणीय होते आणि आजही आदरणीय आहेत, अशी प्रतिक्रियाही परांजपे यांनी दिली.