ऊसदरासाठी ३ नोव्हेंबरला पुणे-बंगळुरू महामार्गावर दोन ठिकाणी स्वाभिमानीचा चक्का जाम

टिटवेवाडी : स्वाभिमानी शेतकरी संघटनेने मंगळवारी, ३ नोव्हेंबर रोजी पुणे-बंगळुरू राष्ट्रीय महामार्गावर एकाच दिवशी दोन ठिकाणी बेमुदत चक्का जाम आंदोलन करण्याचे जाहीर केले आहे. यंदाच्या हंगामातील पहिली उचल प्रतिटन ४५०० रुपये जाहीर करावी आणि शेतकऱ्यांच्या हक्काचे पाणी त्यांना मिळावे, अशा संघटनेच्या मागण्या आहेत. त्यासाठी संघटनेने आरपारच्या संघर्षाची भूमिका घेतली आहे.

संघटनेचे संस्थापक अध्यक्ष आणि माजी खासदार राजू शेट्टी यांच्या नेतृत्वाखाली कोल्हापूर आणि सांगली जिल्ह्यांतील शेतकरी किणी टोलनाक्यावर आंदोलन करणार आहेत. त्याच वेळी सातारा जिल्ह्यातील संघटनेचे सर्व पदाधिकारी, कार्यकर्ते आणि ऊस उत्पादक शेतकरी नागठाणे (ता. सातारा) येथे उरमोडी नदीच्या पुलाशेजारी महामार्गावर आंदोलन करणार आहेत. त्यामुळे ऊसदराच्या प्रश्नावर पश्चिम महाराष्ट्रात आंदोलनाची धग अधिक तीव्र होणार आहे.

गेल्या अनेक दिवसांपासून कारखानदारांना चर्चेतून मार्ग काढण्याची संधी देण्यात आली, असे संघटनेचे म्हणणे आहे. मात्र शेतकऱ्यांच्या उत्पादन खर्चाचा विचार करून प्रतिटन ४५०० रुपयांची पहिली उचल जाहीर करण्याबाबत अपेक्षित सकारात्मक भूमिका घेतली जात नाही, म्हणून शेतकऱ्यांमध्ये तीव्र नाराजी आहे.

सातारा जिल्ह्यात खटाव, कराड आणि कोरेगाव तालुक्यांत विविध ठिकाणी साखर कारखान्यांकडे जाणारी ऊस वाहतूक रोखण्यात आली आहे. गेल्या दोन दिवसांपासून शेतकरी आणि संघटनेचे कार्यकर्ते रस्त्यावरच मुक्काम करून आंदोलन सांभाळत आहेत. या संघर्षाची पुढची पायरी म्हणून आता नागठाणे येथे बेमुदत चक्का जाम पुकारण्यात आला आहे.

फक्त ऊसदरच नाही, तर कृष्णा, उरमोडी आणि तारळी नदीच्या पाण्याचा प्रश्नही या आंदोलनात जोरकसपणे मांडला जाणार आहे. धरणांमध्ये पाणीसाठा असतानाही सिंचनासाठी पाणी द्यायची वेळ आली की नियम, कायदे आणि कालवा सल्लागार समितीच्या बैठकांचे कारण पुढे केले जाते, असा संघटनेचा आरोप आहे. शेतकऱ्यांच्या हक्काचे पाणी दुसरीकडे वळवले जात असल्याचा गंभीर आरोपही संघटनेने केला आहे.

पाणी वळवताना नियमांची अडचण येत नाही, मग तेच पाणी शेतकऱ्यांना देताना कायद्याचे दाखले का दिले जातात, असा सवाल संघटनेने उपस्थित केला आहे. अधिकार आणि सत्तेचा गैरवापर करून कृत्रिम पाणीटंचाई निर्माण करायची, शेतकऱ्यांना पाण्याची भीती दाखवायची आणि त्यांचा ऊस कमी दरात कारखान्यांकडे वळवायचा, हे आता खपवून घेतले जाणार नाही, अशी आक्रमक भूमिका संघटनेने घेतली आहे. कृष्णा, उरमोडी आणि तारळी नदीतून शेतकऱ्यांच्या हक्काचे पाणी सोडावे, ही मागणीही नागठाणे येथील आंदोलनातून लावून धरली जाणार आहे.

ऊस उत्पादक शेतकरी जगला तरच गावातील बाजारपेठ, व्यापारी, दुकानदार, वाहतूकदार आणि ग्रामीण अर्थव्यवस्था टिकेल, असे संघटनेचे म्हणणे आहे. त्यामुळे सातारा जिल्ह्यातील सर्व शेतकरी, व्यापारी, दुकानदार, तरुण आणि सर्वसामान्य नागरिकांनी ३ नोव्हेंबर रोजी नागठाणे येथे होणाऱ्या आंदोलनात शेतकऱ्यांच्या न्याय्य हक्कासाठी एक दिवस सहभागी व्हावे, असे आवाहन करण्यात आले आहे.

कोल्हापूर-सांगलीतील शेतकरी किणी टोलनाक्यावर, तर सातारा जिल्ह्यातील शेतकरी नागठाणे येथे एकाच वेळी रस्त्यावर उतरून आपली एकजूट दाखवणार आहेत. शेतकऱ्यांच्या घामाची किंमत आणि पाण्याचा हक्क मिळेपर्यंत संघर्ष सुरूच राहील, असा ठाम निर्धार स्वाभिमानी शेतकरी संघटनेने व्यक्त केला आहे.