गणवेशात दारू पिऊन गाडी फुटपाथवर चढवली, व्हिडीओ व्हायरल होताच पुण्यातील महिला पोलीस कर्मचारी निलंबित

पुण्यात गणवेशात असताना दारू पिऊन गाडी चालवल्याच्या आरोपावरून एका महिला पोलीस कर्मचाऱ्याला निलंबित करण्यात आले आहे. अश्विनी केकान असे त्यांचे नाव असून, त्या ३९ वर्षांच्या आहेत आणि पुणे पोलीस दलात काम करतात. पोलीस विभागाने त्यांच्यावर कारवाई केली असून मांजरी पोलीस स्टेशनमध्ये त्यांच्याविरोधात गुन्हाही दाखल झाला आहे.

मांजरी परिसरात घडलेल्या या प्रकाराचा व्हिडीओ सोशल मीडियावर व्हायरल झाला. त्यानंतर पोलीस प्रशासनाने तातडीने ही कारवाई केली. २७ ऑक्टोबर रोजी पोलीस कर्मचारी रामेश्वर थोरात यांनी तक्रार दिली आणि त्यांच्या तक्रारीवरून मांजरी पोलीस स्टेशनमध्ये गुन्हा नोंदवण्यात आला.

मिळालेल्या माहितीनुसार, ही महिला कर्मचारी काळेपडळ पोलीस स्टेशनमध्ये कार्यरत आहे. शेवाळवाडी येथील रामानंद हॉटेलसमोरच्या रस्त्यावर त्या गणवेशात असताना दारू पिऊन गाडी चालवत होत्या, असा आरोप आहे. नंबर प्लेट नसलेली राखाडी रंगाची मारुती सुझुकी बलेनो गाडी त्यांनी रस्त्यावर विरुद्ध दिशेने (रॉन्ग साईड) चालवली. समोरून येणाऱ्या गाड्यांना कट मारत त्यांनी गाडी थेट फुटपाथवर चढवली. गाडीवरील नियंत्रण सुटल्यामुळे हा धोकादायक प्रकार घडला.

यानंतर त्यांनी वाहनचालकांना आणि नागरिकांना शिवीगाळ केल्याचेही समोर आले आहे. या सगळ्या घटनेची व्हिडीओ क्लिप सोशल मीडियावर मोठ्या प्रमाणात व्हायरल झाली. व्हायरल व्हिडीओमध्ये ही महिला कर्मचारी गणवेशात दिसते. तिथे जमलेल्या नागरिकांनी विचारणा केली असता, त्यांनी दारू प्यायल्याचे मान्य केल्याचेही त्यात ऐकू येते.

या घटनेची गंभीर दखल घेत पोलीस उपायुक्त जीवन बेनिवाल यांनी महिला कर्मचाऱ्याविरोधात गुन्हा दाखल करून तिला निलंबित केल्याची माहिती दिली. ससून रुग्णालयात केलेल्या वैद्यकीय तपासणीच्या अहवालात त्यांनी दारू प्यायल्याचे निष्पन्न झाले आहे, आणि निलंबनाच्या आदेशातही तसा स्पष्ट उल्लेख करण्यात आला आहे.

पोलिसांच्या प्राथमिक माहितीनुसार, ही कर्मचारी घटनेआधी रविवारी आणि सोमवारी कर्तव्यावर नव्हती. घटनेपूर्वी त्या पुण्यातील बंड गार्डन परिसरात मित्रमैत्रिणींसोबत पार्टीसाठी गेल्या होत्या का, या दिशेनेही तपास सुरू आहे. त्यांनी नेमकी कुठे आणि कधी दारू प्यायली, याचाही पोलीस शोध घेत आहेत.

कायद्याची अंमलबजावणी करण्याची मुख्य जबाबदारी असलेल्या पोलीस दलातील कर्मचाऱ्याकडूनच अशा प्रकारे नियमांचे उल्लंघन झाल्याने तीव्र संताप व्यक्त होत आहे. व्हिडीओतील दृश्ये, प्रत्यक्षदर्शींचे जबाब आणि उपलब्ध पुराव्यांच्या आधारे मांजरी पोलीस या प्रकरणाचा पुढील तपास करत आहेत. गणवेशात असताना दारू पिऊन गाडी चालवल्याचा हा आरोप सिद्ध करण्यासाठी पोलीस सर्व बाजूंनी माहिती गोळा करत आहेत.