भोरच्या शेतकऱ्याची लेक वैष्णवी बाठे पुणे मेट्रोची सारथी

पुण्याच्या भोर तालुक्यातील केंजळ गावची वैष्णवी गणेश बाठे आता पुणे मेट्रोची गाडी चालवत आहे. हिंजवडी मार्गावर नुकत्याच सुरू झालेल्या पिंक मेट्रोचे सारथ्य करण्याची संधी तिला काल मिळाली. तिचे वडील गणेश बाठे शेतकरी आहेत, आणि एका शेतकऱ्याची मुलगी मेट्रो चालवते आहे, ही गोष्ट सध्या सगळ्यांच्या कौतुकाचा विषय ठरली आहे.

पंतप्रधान नरेंद्र मोदी यांनी दूरदृश्य प्रणालीद्वारे पुणे मेट्रो मार्गिका ३ चे उद्घाटन केले. हिंजवडी ते शिवाजीनगर अशी ही सेवा आजपासून पुणेकरांच्या सेवेत दाखल झाली आहे. पुण्यातील आयटी हबला यामुळे चांगली कनेक्टिव्हिटी मिळाली असून पुणेकरांना मोठा दिलासा मिळाला आहे. याच वेळी भोर तालुक्यातील शेतकरी कन्येच्या हाती मेट्रोचे सारथ्य आल्याची बातमीही समोर आली. ही बातमी पुणेकरांची मान ताठ करणारी आणि महाराष्ट्रासाठी अभिमानाची ठरली आहे.

परिस्थिती अनुकूल नसतानाही वैष्णवीने इंजिनिअरिंगचे शिक्षण पूर्ण केले आणि तिथून इथपर्यंत झेप घेतली. पुढचे शिक्षण सुरू असतानाच तिची प्लेसमेंट झाली आणि तिला मेट्रोत नोकरीची संधी मिळाली. त्यानंतर तिने सहा महिन्यांचे विशेष प्रशिक्षण पूर्ण केले. आज ती मेट्रो चालक, म्हणजेच मेट्रो ड्रायव्हर आहे. तिच्यासोबत प्रशिक्षण घेतलेल्या अनेक मुलीही आता मेट्रो चालक म्हणून काम करत आहेत.

वैष्णवी किओलिस इंडिया प्रायव्हेट लिमिटेड या कंपनीत ट्रेन पायलट आणि मेट्रो ऑपरेटर म्हणून काम करते. पुणे मेट्रोच्या वेगवेगळ्या चाचण्या आणि ट्रेन ड्रायव्हिंगचे काम तिने सांभाळले आहे. जिद्द आणि चिकाटीच्या जोरावर तिने भोर तालुक्यात यशाचे नवे शिखर गाठले आहे.

तिच्या या कामगिरीमुळे बाठे कुटुंबातील सर्वांना आनंद झाला आहे. केंजळ गावाची मान अभिमानाने उंचावली आहे. गावातून तसेच आसपासच्या पंचक्रोशीतून तिचे कौतुक होत आहे. महिला सक्षमीकरणाच्या दृष्टीनेही हे यश महत्त्वाचे मानले जात आहे.

पुणे मेट्रोच्या माण-हिंजवडी ते शिवाजीनगर या पिंक मेट्रो मार्गिका ३ ची लांबी २३.२ किलोमीटर आहे. तिचे उद्घाटन काल पंतप्रधान नरेंद्र मोदी यांच्या हस्ते झाले. त्यानंतर मुख्यमंत्री देवेंद्र फडणवीस यांनी पहिले तिकीट काढून या मेट्रोतून प्रवास केला. ही पिंक मेट्रो आहे, असे मुख्यमंत्र्यांनी कालच सांगितले होते.

या मार्गिकेवर एकूण २३ स्टेशन आहेत. पिंक मेट्रोचे संचालन महिला ट्रेन पायलटकडे आहे, आणि लीड ट्रेन पायलट म्हणून प्रगती बिरादार काम पाहतात. या मार्गावर ९० महिला चालक आहेत, तर एकूण कर्मचाऱ्यांपैकी ५० टक्के कर्मचारी महिला आहेत.