मराठवाडा पदवीधर मतदारसंघात प्रतापसिंह पाटील आघाडीवर, रविराज साबळे तिसऱ्या क्रमांकावर; "मी प्रस्थापित गिळलाय"

मराठवाडा पदवीधर मतदारसंघाच्या मतमोजणीत तिसऱ्या फेरीअखेर महाविकास आघाडीचे डॉ. प्रतापसिंह पाटील आघाडीवर आहेत. गेल्या तीन टर्म या मतदारसंघाचे आमदार राहिलेले महायुतीचे सतीश चव्हाण दुसऱ्या क्रमांकावर आहेत. पहिल्या फेरीपासूनच प्रतापसिंह पाटील यांनी आघाडी घेतली होती, असे दिसते.

तिसऱ्या फेरीअखेर विजयासाठीचा मतांचा कोटा निश्चित झाला असून विजयी उमेदवारास 88,558 मतांची आवश्यकता आहे. प्रतापसिंह पाटील यांना 73,931 मतं मिळाली आहेत, तर सतीश चव्हाण यांना 60,768 मतं मिळाली. म्हणजे पाटील जवळपास 13 हजार मतांनी पुढे आहेत. या मतदारसंघातील निवडणूक यंदा लक्षवेधी आणि चर्चेत राहिली.

तिसऱ्या क्रमांकावर आहेत अपक्ष उमेदवार रविराज साबळे. शेतकरीपुत्र आणि रिलस्टार अशी त्यांची ओळख आहे. त्यांना पहिल्या पसंतीची 20,450 मतं मिळाली आहेत. ठाकरेंच्या शिवसेनेचे उमेदवार दिलीप घुगे यांना 8,439 मतं मिळाली. तिसऱ्या फेरीअखेर एकूण मोजलेली मतं 1 लाख 77 हजार 115 आहेत, बाद झालेली मतं 16 हजार 540 आहेत आणि एकूण वैध मतं 1 लाख 93 हजार 655 इतकी आहेत.

शेतीच्या प्रश्नांवर आक्रमक असलेल्या रविराज साबळे यांनी या निकालानंतर पहिली प्रतिक्रिया दिली. "मी प्रस्थापित गिळलाय," असे ते म्हणाले. "मी 24 सप्टेंबर रोजी निवडणूक लढवणार असल्याची घोषणा केली होती, केवळ 28 दिवसांचा निवडणूक प्रचार मी केला," असे साबळे यांनी सांगितले.

साबळे म्हणाले, "विधानपरिषद पदवीधर मतदारसंघांची निवडणूक ही पक्षांची मक्तेदारी असते. मी पक्षांच्या मक्तेदारीमध्ये नसून मराठवाडा पदवीधर मतदारसंघात उमेदवारांना मिळालेल्या मतांमध्ये मी तिसऱ्या क्रमांकावर आहे. आता, मला मिळालेल्या मतांवरच येथील विजयाचा उमेदवार ठरणार आहे. माझ्या दुसऱ्या पसंतीची मतं म्हणजे दोन उमेदवारांचं भवितव्य आहे." तसेच, "मी एक प्रस्थापित गिळलाय, 18 वर्षांचा दुष्काळ संपवलाय," असेही त्यांनी निकालानंतर म्हटले.

यंदाच्या विधानपरिषद शिक्षक आणि पदवीधर निवडणुकीत दोन चेहरे चर्चेत राहिले. एक रविराज साबळे आणि दुसरे विदर्भातील मास्तर कराळे गुरुजी. दोघेही सोशल मीडियावर प्रसिद्ध असून त्यांचे फॉलोअर्स लाखोंमध्ये आहेत. त्यांना काही हजार मतं मिळाली असली, तरी प्रस्थापित उमेदवारांना धक्का देणारी कामगिरी त्यांनी केली, असे म्हटले जात आहे. साबळे यांच्या उमेदवारीमुळे मराठवाडा पदवीधर मतदारसंघात महायुतीच्या सतीश चव्हाण यांना पराभवाला सामोरे जावे लागले, असेही सांगितले जाते.