जरांगे यांच्या 500 कोटींच्या क्लिपची चौकशी: शैलेश बलकवडेंच्या नेतृत्वाखाली तीन जणांची SIT

मराठा आरक्षण आंदोलक मनोज जरांगे पाटील यांनी समोर आणलेल्या 500 कोटी रुपयांच्या कथित ऑडिओ क्लिपवरून राज्यात राजकीय वाद पेटला आहे. या प्रकरणाच्या तपासासाठी आता विशेष तपास पथक (SIT) स्थापन करण्यात आले आहे. मुख्यमंत्री देवेंद्र फडणवीस यांनी मुंबई पोलीस आयुक्तांना या प्रकरणाची सखोल चौकशी करण्यासाठी SIT स्थापन करण्याचे निर्देश दिले होते. त्यानंतर तीन स्तरांच्या या पथकाची अधिकृत घोषणा झाली.

या ऑडिओ क्लिपमध्ये खासदार श्रीकांत शिंदे यांच्या माध्यमातून मनोज जरांगे यांना 500 कोटी रुपये देण्यात आल्याचा खळबळजनक दावा करण्यात आला होता. क्लिपची निष्पक्ष चौकशी व्हावी आणि त्यामागे कोण आहे ते समोर यावे, अशी मागणी जरांगे यांनी सरकारकडे केली होती.

मुख्यमंत्र्यांच्या आदेशानंतर मुंबई पोलिसांनी लगेच तपासाला सुरुवात केली. या पथकाची पूर्ण जबाबदारी अप्पर पोलीस आयुक्त शैलेश बलकवडे यांच्याकडे दिली आहे. ते पथकाचे अध्यक्ष आहेत. पोलीस उपायुक्त विजयकांत सागर आणि पोलीस उपायुक्त बजरंग बनसोडे हे दोघे सदस्य आहेत.

पथक स्थापन झाल्यानंतर जरांगे पाटील यांनी पुन्हा सरकारवर जोरदार टीका केली. "फक्त एसआयटी गठीत करून छक्के-पंजे खेळू नका, तर या चौकशीच्या मुळाशी जाणे गरजेचे आहे," असा खोचक सल्ला त्यांनी मुख्यमंत्र्यांना दिला. ही ऑडिओ क्लिप एआयने बनवलेली नसून 100 टक्के खरी आहे, असे त्यांनी पुन्हा सांगितले. एवढी मोठी क्लिप एआयच्या माध्यमातून बनवताच येत नाही, असाही त्यांचा दावा आहे.

जरांगे पुढे म्हणाले की, "ही क्लिप संपूर्ण देशात व्हायरल होत आहे. या क्लिपमधील विचार अत्यंत विखारी असून हे प्लॅनिंग मोडीत काढले पाहिजे. एसआयटी प्रमुख शैलेश बलकवडे हे जालन्याचे एसपी राहिलेले आहेत, ते देवेंद्र फडणवीस यांचे खास असले तरी त्यांचे काम निष्पक्ष असले पाहिजे."

त्यांनी एक प्रश्नही उपस्थित केला. "एकनाथ शिंदे यांचे करिअर उद्ध्वस्त करण्याचा हा प्रयत्न होता का? शिंदे आणि फडणवीस यांच्यात मोठी खदखद आहे. जर या चौकशीच्या खोलात गेले तर फडणवीसांचाही गेम केला जाणार होता, हे उघड होईल," असे जरांगे म्हणाले.

दुसरीकडे, या 500 कोटींच्या ऑडिओ बॉम्बवरून राजकीय आरोप-प्रत्यारोप वाढले आहेत. ठाकरे गटाचे खासदार संजय राऊत यांनी केंद्रीय गृहमंत्री अमित शाह यांना पत्र लिहिले आहे. या प्रकरणाची अंमलबजावणी संचालनालयामार्फत (ED) किंवा आणखी मोठ्या केंद्रीय यंत्रणेमार्फत चौकशी व्हावी, अशी मागणी त्यांनी केली आहे.

भाजपने मात्र याला उलट उत्तर दिले आहे. ही ऑडिओ क्लिप पूर्णपणे एआयने तयार केलेली असून संजय राऊत यांचीच कसून चौकशी झाली पाहिजे, असे भाजपचे म्हणणे आहे. आता एसआयटीच्या फॉरेन्सिक तपासातून नेमके काय सत्य बाहेर येते, याकडे संपूर्ण महाराष्ट्राचे लक्ष लागले आहे.