मूलच्या खेळाडूंचे वेटलिफ्टिंगमध्ये वर्चस्व; ११ जणांची नागपूर विभागीय स्पर्धेसाठी निवड
चंद्रपूर जिल्ह्यातील मूल तालुक्यातील ११ खेळाडूंनी जिल्हास्तरीय शालेय वेटलिफ्टिंग स्पर्धेत सुवर्णपदक पटकावत नागपूर विभागीय स्पर्धेसाठी स्थान मिळवलं.
चंद्रपूर येथे रविवारी, २० सप्टेंबरला जिल्हास्तरीय शालेय वेटलिफ्टिंग स्पर्धा पार पडली. ही स्पर्धा क्रीडा व युवक सेवा संचालनालय, महाराष्ट्र राज्य (पुणे) यांच्या वतीने घेण्यात आली होती. या स्पर्धेत मूल तालुक्यातील खेळाडूंनी जबरदस्त कामगिरी करत निर्विवाद वर्चस्व गाजवलं. विविध वजन गटांत मूल तालुक्यातील तब्बल ११ खेळाडूंनी पहिला क्रमांक मिळवत सुवर्णपदकावर आपलं नाव कोरलं. हे सगळे खेळाडू आता नागपूर विभागीय शालेय क्रीडा स्पर्धेत चंद्रपूर जिल्ह्याचं प्रतिनिधित्व करणार आहेत.
मूल इथल्या क्रीडा संकुलात 'एनआयएस' कोच करण सुरेश कोसरे यांच्या मार्गदर्शनाखाली सराव करणाऱ्या नवभारत विद्यालय, कर्मवीर महाविद्यालय आणि माऊंट कॉन्व्हेंट या शाळा-कॉलेजच्या खेळाडूंनी या स्पर्धेत भाग घेतला आणि तालुक्याचं नाव मोठं केलं. या तिन्ही शाळा-कॉलेजातील मुलं-मुली गेल्या काही काळापासून एकत्रितपणे सराव करत आहेत, आणि त्याचंच फळ त्यांना या स्पर्धेत मिळालं.
१७ वर्षांखालील मुलींच्या गटात ४४ किलो वजनी गटात त्रिशा घोंगडे, ४८ किलो गटात ईशानी मोहूर्ले आणि ७७ किलोवरील गटात प्रणाली झरकर यांनी पहिला क्रमांक पटकावला. त्याच वयोगटातील मुलांमध्ये ५६ किलो गटात गुरविंदरसिंग बावरी, ६० किलो गटात अनिश राऊत आणि ७९ किलो गटात संस्कार नरेड्डीवार यांनी बाजी मारली. म्हणजेच १७ वर्षांखालील गटात मुली आणि मुली मिळून एकूण सहा खेळाडूंनी पहिला क्रमांक मिळवला.
१९ वर्षांखालील मुलींच्या गटात ४८ किलो वजनी गटात जसविंदर बावरी, ५३ किलो गटात श्रावणी आंबूलकर, ५८ किलो गटात शिवांगी वाढई आणि ८६ किलोवरील गटात नंदिनी चौधरी यांनी अव्वल स्थान मिळवलं. याच वयोगटातल्या मुलांच्या ६५ किलो वजनी गटात अमन शेखने प्रतिस्पर्ध्यांना मागे टाकत पहिला क्रमांक पटकावला. अशा प्रकारे १९ वर्षांखालील गटातूनही पाच खेळाडूंनी सुवर्णपदक मिळवलं.
गेल्या चार वर्षांपासून मूल इथल्या क्रीडा संकुलात खेळाडूंना वेटलिफ्टिंगचं मोफत प्रशिक्षण दिलं जातं. या सातत्यपूर्ण सरावाच्या जोरावर यंदाही जिल्ह्याच्या क्रीडा क्षेत्रात मूल शहराने आपलं अव्वल स्थान कायम राखलं आहे. दरवर्षी सारखंच यश मिळत असल्याने मूलच्या क्रीडा संकुलाकडे आता जिल्ह्यातील एक महत्त्वाचं केंद्र म्हणून पाहिलं जात आहे.
या यशाबद्दल जिल्हा क्रीडा अधिकारी विनोद ठिकरे, तालुका क्रीडा संयोजक नामदेव पिजुरकर, रूपचंद उराडे, आकाश चौधरी आणि स्वप्निल अवघडे यांनी सगळ्या विजेत्या खेळाडूंचं आणि प्रशिक्षक करण कोसरे यांचं अभिनंदन केलं असून, नागपूर विभागीय स्पर्धेसाठी शुभेच्छा दिल्या आहेत.
