पैसा टिकत नाही? घरातील वास्तूतील या सोप्या गोष्टी बदलून बघा

बऱ्याच जणांना सतत पैशांची काळजी वाटत असते. चांगली कमाई असूनसुद्धा हातात पैसा टिकत नाही, अशी तक्रार अनेकांची असते. वास्तुशास्त्रानुसार अशा प्रकारच्या अडचणींमागे वास्तूतील दोष कारणीभूत असू शकतो. घरात निगेटिव्ह एनर्जी शिरण्याची अनेक कारणं असतात आणि त्यातून मोठ्या अडचणी उभ्या राहतात, असं वास्तुशास्त्र सांगतं. यावर उपाय म्हणून घरातील काही गोष्टी नीट ठेवल्या तर आर्थिक अडचणी कमी होण्यास मदत होऊ शकते, असं मानलं जातं.

सगळ्यात आधी लक्ष द्यायला हवं ते घराच्या मेन दरवाजाकडे. घरात एनर्जी येते तीच मुळात मेन दरवाजातून, त्यामुळे हा दरवाजा नेहमी स्वच्छ ठेवावा. दरवाजाजवळ कचरा, जुने बूट किंवा तुटलेल्या वस्तू पडलेल्या असतील तर त्या लगेच बाजूला कराव्यात, कारण त्यामुळे पॉझिटिव्ह एनर्जी घरात यायला अडथळा येतो असं वास्तुशास्त्र मानतं.

घरात तिजोरी ठेवायची असेल तर तिची दिशाही महत्त्वाची मानली जाते. वास्तुशास्त्रानुसार तिजोरीसाठी दक्षिण किंवा नैऋत्य दिशा सगळ्यात शुभ समजली जाते. तिजोरी दक्षिणेला अशा पद्धतीनं ठेवावी की तिचं तोंड उत्तरेकडे राहील. घराच्या रचनेप्रमाणे तिजोरीची मांडणी केली तर ते शुभ मानलं जातं.

उत्तर दिशेला वास्तुशास्त्रात खास महत्त्व दिलं जातं, कारण ही कुबेराची दिशा मानली जाते आणि ती धन व समृद्धीशी जोडलेली असते. त्यामुळे घराची उत्तर दिशा नेहमी स्वच्छ ठेवावी आणि तिथे निरुपयोगी किंवा न वापरलेल्या वस्तू ठेवणं टाळावं, असं सांगितलं जातं.

घरात दिवा लावण्यालाही वास्तुशास्त्रात खूप महत्त्व आहे. संध्याकाळी देवघरात दिवा लावणं शुभ मानलं जातं. तसंच मेन दरवाजावर दिवा लावला तर गरिबी दूर व्हायला मदत होते, असं मानलं जातं.

घरातील निगेटिव्हिटी घालवण्यासाठी वास्तुशास्त्रात आणखी एक उपाय सांगितला जातो, तो म्हणजे पाण्यात मीठ मिसळून फरशी पुसणं. यामुळे घरात पॉझिटिव्ह एनर्जी वाढते, असं मानलं जातं आणि ही पद्धत वास्तुशास्त्रानुसार खूप शुभ समजली जाते.

याशिवाय घरात तुटलेली घड्याळं, खराब झालेल्या इलेक्ट्रॉनिक वस्तू, फुटलेल्या मूर्ती किंवा वापरात नसलेल्या वस्तू साठवून ठेवू नयेत, असं वास्तुशास्त्र सांगतं. अशा वस्तूंमुळे घरातील पॉझिटिव्ह एनर्जी कमी होते असं मानलं जातं, त्यामुळे वेळोवेळी घरातील नको असलेल्या वस्तू काढून टाकाव्यात, असा सल्ला दिला जातो.

धर्म, ज्योतिष आणि वास्तुशास्त्राशी संबंधित या माहितीचा उद्देश फक्त वाचकांना माहिती देणं इतकाच आहे. यासंदर्भात कोणताही प्रयोग करण्याआधी तज्ज्ञांचा सल्ला घेणं गरजेचं आहे.