वरोऱ्यात बोलेरो पिकअपमधून एमडी ड्रग्ज जप्त, चालकाला अटक
मोहबाळा ते जीएमआर कंपनीकडे जाणाऱ्या रस्त्यालगत वरोरा पोलिसांनी ६५ हजार रुपयांचे मेफेड्रॉन आणि बोलेरो पिकअप जप्त केले. चालकाला अटक झाली आहे.
वरोरा पोलिसांनी मोहबाळा ते जीएमआर कंपनीकडे जाणाऱ्या रस्त्यालगत कारवाई करून सुमारे ६५ हजार रुपये किमतीचे एमडी म्हणजेच मेफेड्रॉन ड्रग्ज जप्त केले आहे. ड्रग्जसोबतच पोलिसांनी बोलेरो पिकअप गाडीही ताब्यात घेतली आणि गाडीच्या चालकाला अटक केली.
अटक केलेल्या आरोपीचे नाव दीपक मधुकर खारकर असे आहे. त्याचे वय ४५ वर्षे असून तो वरोरा तालुक्यातील टाकळी येथील रहिवासी असल्याचे त्याने सांगितले. त्याच्याविरुद्ध वरोरा पोलीस स्टेशनमध्ये एनडीपीएस कायद्यान्वये गुन्हा दाखल झाला आहे.
पोलिसांना याची खबर कशी लागली, याचीही माहिती समोर आली आहे. वरोरा पोलीस स्टेशनमधील डायल ११२ च्या मदत कक्षाला मोहबाळा परिसरात एका पांढऱ्या रंगाच्या गाडीत अमली पदार्थ असल्याची गोपनीय माहिती मिळाली होती. त्यानंतर पोलिसांच्या पथकाने लगेच शोध सुरू केला. मोहबाळा गावाबाहेर, जीएमआर कंपनीकडे जाणाऱ्या रस्त्याच्या कडेला असलेल्या एका गोठ्याजवळ संशयित पांढरे बोलेरो पिकअप उभे दिसले. त्या गाडीचा क्रमांक एम.एच. २७ बी.एक्स. ५७०३ असा आहे.
स्टेशनचे ठाणेदार आणि पोलीस निरीक्षक ओमप्रकाश सोनटक्के यांच्या मार्गदर्शनाखाली सहाय्यक पोलीस निरीक्षक शरद भस्मे यांचे पथक घटनास्थळी पोहोचले. या पथकात शासकीय पंच, फोटोग्राफर आणि वजन करणारी व्यक्तीही होती. पोलिसांनी गाडीला वेढा घातला आणि जवळ उभ्या असलेल्या चालकाला ताब्यात घेऊन चौकशी केली. तेव्हा त्याने आपले नाव दीपक मधुकर खारकर असे सांगितले.
एनडीपीएस कायद्याच्या कलम ५०(१) नुसार पोलिसांनी आरोपीला त्याच्या अधिकारांची कायदेशीर माहिती दिली. त्यानंतर पंचांच्या समोर गाडीची सखोल झडती घेतली. गाडीच्या कॅबिनवरील कॅरियरमध्ये स्टेपनी टायरच्या वर एका काळ्या प्लास्टिक पन्नीत झिप पाऊच लपवून ठेवलेला आढळला. पाऊच उघडून पाहिला असता त्यात पांढरट-भुरकट रंगाची पावडर होती. उपस्थितांसमोर तिचे वजन केले तेव्हा ते ६ ग्रॅम ५२० मिग्रॅम एमडी म्हणजेच मेफेड्रॉन ड्रग्ज असल्याचे स्पष्ट झाले. बाजारात त्याची किंमत सुमारे ६५ हजार रुपये आहे.
पोलिसांनी ६५ हजार रुपयांचे एमडी ड्रग्ज आणि गुन्ह्यात वापरलेली ५ लाख रुपये किमतीची बोलेरो पिकअप, असा एकूण ५ लाख ६५ हजार रुपयांचा माल पंचांसमोर सील करून जप्त केला. या सगळ्या कारवाईचे व्हिडिओ शूटिंग आणि फोटो ई-साक्ष ॲपद्वारे घेण्यात आले.
सहाय्यक पोलीस निरीक्षक शरद श्यामजी भस्मे यांनी दिलेल्या फिर्यादीवरून आरोपी दीपक मधुकर खारकर याच्याविरुद्ध वरोरा पोलीस स्टेशनमध्ये गुंगीकारक औषधी द्रव्ये आणि मनोव्यापारावर परिणाम करणारे पदार्थ अधिनियम १९८५ (एनडीपीएस ॲक्ट) च्या कलम ८(क) आणि २१(ब) अन्वये गुन्हा नोंदवण्यात आला आहे. पुढील तपास वरोरा पोलीस करत आहेत. हे ड्रग्ज कुठे विकले जाणार होते आणि या तस्करीमागे मोठे रॅकेट आहे का, याचा पोलीस शोध घेत आहेत.
