ट्रम्प विरुद्ध मीडिया : दरवाजा बंद केला, आता कोर्टात भेटू; CNN-MSNOW-Politicoचा ट्रम्प प्रशासनाला झटका

अमेरिकेत १८ सप्टेंबरला ट्रम्प यांनी CNN, MSNOW आणि Politico या तीन माध्यमांना व्हाईट हाऊसमध्ये वार्तांकनासाठी बंदी घातली. या तिन्ही माध्यमांचे व्हाईट हाऊसमधील प्रवेशाचे पास रद्द करण्यात आले आणि त्यांचा आत जाण्याचा रस्ताच बंद करण्यात आला. ट्रम्प यांच्या मते ही तिन्ही माध्यमे त्यांच्याविरोधात खोटी माहिती आणि खोट्या बातम्या पसरवत आहेत आणि त्यांच्याविरोधात काम करत आहेत, त्यामुळेच ही कारवाई करण्यात आली असं सांगितलं जात आहे.

या घडामोडीमुळे आंतरराष्ट्रीय राजकारणात चर्चा सुरू झाली आहे की ट्रम्प यांच्या स्वभावाला हे अपेक्षितच होतं. यापूर्वीही ट्रम्प आणि पत्रकार यांच्यातील टोकदार संभाषणे अनेकदा समोर आली आहेत. ट्रम्प यांना फक्त त्यांच्या सोयीचे प्रश्न आवडतात, तर काही ठराविक माध्यमे त्यांची आवडती असल्याचंही बोललं जातं. मात्र अशा पद्धतीने माध्यमांवर बंदी घालणं हे अमेरिकेसाठीही योग्य नाही, कारण यामुळे जगभरात लोकशाहीबद्दल बोलण्याचा अमेरिकेचा नैतिक अधिकार कमी होऊ शकतो, किंवा अमेरिकेच्या लोकशाहीवादी भूमिकेची चेष्टाही होऊ शकते, असं म्हटलं जात आहे.

बंदी घातलेल्या या माध्यम संस्थांचं म्हणणं आहे की, सरकारला एखाद्या माध्यमाच्या रिपोर्टिंगशी असहमती असली तरी केवळ त्या आधारावर एखाद्या पत्रकाराचा प्रवेश रद्द करता येऊ नये. सरकार आणि एखादं माध्यम यांच्यातील मतभेद असू शकतात, पण त्यामुळे थेट प्रवेशच नाकारणं चुकीचं असल्याचं या माध्यमांचं म्हणणं आहे. त्यांच्या निवेदनानुसार या कारवाईमुळे प्रेसच्या स्वातंत्र्यावर आणि सरकारवर स्वतंत्रपणे नजर ठेवण्याच्या माध्यमांच्या भूमिकेवर परिणाम होऊ शकतो. याच मुद्द्यावरून, म्हणजे फर्स्ट अमेंडमेंट अंतर्गत मिळणाऱ्या अधिकारांच्या संरक्षणासाठी, या माध्यमांनी कोर्टात धाव घेतली आहे. त्यामुळे हा वाद आता वाढून ट्रम्प विरुद्ध मीडिया असं स्वरूप घेत आहे, आणि यावर कोर्ट काय भूमिका घेतं हे पाहणं महत्त्वाचं ठरणार आहे.

हा खटला वॉशिंग्टन डीसीतील यूएस डिस्ट्रिक्ट कोर्टात दाखल करण्यात आला असून, माध्यमांनी व्हाईट हाऊसचा प्रवेश तातडीने पुन्हा सुरू करावा अशी मागणी केली आहे. या प्रकरणावर लवकरच आपत्कालीन सुनावणी होण्याची शक्यता वर्तवली जात आहे, म्हणजे कोर्ट या प्रकरणाची दखल घाईने घेऊ शकतं असं दिसतं आहे. यापूर्वीही एपी आणि सीएनएनचे पत्रकार जिम अकॉस्टा यांच्या व्हाईट हाऊस प्रवेशावरून ट्रम्प प्रशासनाशी असाच न्यायालयीन संघर्ष झाला होता, त्यामुळे अशा प्रकारचा वाद अमेरिकेत नवा नाही. त्यामुळे सध्याचा हा खटला अमेरिकेत सरकार आणि पत्रकारितेच्या स्वातंत्र्याच्या मर्यादांबाबत एक महत्त्वाचा कायदेशीर वाद ठरू शकतो, आणि त्याचा निकाल पुढील काळात व्हाईट हाऊसमधील पत्रकारांच्या प्रवेशाबाबतच्या नियमांवरही परिणाम करू शकतो.