ताडोबात १ ऑक्टोबरपासून सफारी पुन्हा सुरू, नोव्हेंबर-डिसेंबरपर्यंत बुकिंगला मोठा प्रतिसाद

चंद्रपूर जिल्ह्यातील ताडोबा-अंधारी व्याघ्र प्रकल्पातील पर्यटन सफारी पावसाळ्यामुळे काही महिने बंद होती. आता १ ऑक्टोबरपासून ही सफारी पुन्हा सुरू होणार आहे. त्यामुळे जंगलप्रेमी, वन्यजीव छायाचित्रकार आणि पर्यटकांना पावसाळ्यानंतर हिरवाईने नटलेले ताडोबाचे नवे रूप पाहायला मिळणार आहे. सफारी सुरू होण्याआधीच पर्यटकांमध्ये मोठी उत्सुकता निर्माण झाली असून नोव्हेंबर आणि डिसेंबर महिन्यापर्यंतचे अनेक सफारी स्लॉट आधीच बुक झाल्याची माहिती आहे.

पावसाळ्याच्या काळात जंगलातील नैसर्गिक परिसंस्थेचे जतन व्हावे, वन्यजीवांच्या प्रजननाचा कालावधी विनाअडथळा पार पडावा आणि वनव्यवस्थापनाची विविध कामे व्हावीत, यासाठी कोअर क्षेत्रातील पर्यटन बंद ठेवले जाते. या विश्रांतीनंतर आता जंगल पुन्हा पर्यटकांच्या स्वागतासाठी सज्ज झाले आहे. पावसामुळे ताडोबातील गवताळ प्रदेश, जलसाठे, बांबूची बेटे आणि झाडाझुडपांना नवी उभारी मिळाली आहे. त्यामुळे यंदाच्या हंगामात ताडोबाचे हिरवेगार आणि निसर्गरम्य रूप पर्यटकांना अनुभवता येणार आहे. सफारीच्या प्रवेशद्वारांमधून जंगलभ्रमंती करता येते, जिथे वाघासोबतच बिबट्या, अस्वल, रानकुत्रे, सांबर, चितळ, गवा तसेच विविध पक्षी आणि इतर वन्यजीव पाहायला मिळतात.

पावसाळ्यानंतर जंगलातील पाणवठे, तलाव आणि गवताळ भागांत वन्यजीवांची हालचाल वाढते, त्यामुळे ऑक्टोबरपासून सुरू होणारा हा हंगाम वन्यजीवप्रेमींसाठी खास आकर्षणाचा ठरणार आहे. वाघाच्या दर्शनासोबतच ताडोबाची समृद्ध जैवविविधता अनुभवण्याची संधी पर्यटकांना मिळणार आहे. सफारीसाठी पर्यटकांकडून मोठ्या प्रमाणात प्रतिसाद मिळत असून येत्या नोव्हेंबर व डिसेंबर महिन्यातील बुकिंगलाही चांगला प्रतिसाद मिळाला आहे. यामुळे पर्यटन व्यवसायाशी जोडलेले हॉटेल, रिसॉर्ट, वाहनचालक, गाईड आणि स्थानिक व्यावसायिक यांच्यातही उत्साहाचे वातावरण आहे.

ताडोबामध्ये एकूण २२ सफारी गेट असून त्यापैकी बफर झोनमध्ये १६ आणि कोअर झोनमध्ये ६ गेट आहेत. कोअर प्रवेशद्वारांमध्ये मोहर्ली, कोलारा, खुटवंडा, नवेगाव, पांगडी आणि झरी यांचा समावेश होतो, तर बफर क्षेत्रात मोहर्ली, कोलारा, नवेगाव तसेच पांगडी-झरी परिसरातील विविध प्रवेशद्वारांमधून पर्यटकांना सफारीचा आनंद घेता येतो.

ताडोबा-अंधारी व्याघ्र प्रकल्पाचे प्रकल्प संचालक डॉ. प्रभूनाथ शुक्ला यांनी सांगितले की, सफारीदरम्यान वन विभागाने ठरवून दिलेले नियम, वेळा आणि मार्गदर्शकांच्या सूचनांचे काटेकोर पालन करावे. पर्यटकांना सुरक्षित आणि निसर्गपूरक अनुभव देणे हे वन विभागाचे मुख्य उद्दिष्ट असल्याचे त्यांनी नमूद केले. विदेशी पर्यटकांच्या सोयीसाठी यंदा २० गाईड्सना जर्मन भाषेचे तर २० गाईड्सना फ्रेन्च भाषेचे प्रशिक्षण देण्यात आले आहे. सफारीचा लाभ घेण्यासाठी वन विभागाच्या अधिकृत संकेतस्थळावरूनच बुकिंग करावे, असे आवाहनही त्यांनी केले आहे.