सकाळी उठल्यावर डोके दुखते? माइग्रेन, स्लीप ॲप्निया आणि इतर कारणांची माहिती

सकाळी झोपेतून उठल्यावर काही जणांचे डोके दुखते किंवा अचानक चक्कर आल्यासारखे वाटते. या डोकेदुखीचा परिणाम एकाग्रतेवर, मूडवर आणि दिवसभराच्या सगळ्या कामावर होतो. अपुरी झोप, डिहायड्रेशन आणि बिघडलेली दिनचर्या अशा अनेक गोष्टींचा शरीरावर लगेच परिणाम दिसतो. त्यामुळे सकाळी उठल्यावर वारंवार डोके दुखत असेल, तर डॉक्टरांच्या सल्ल्याने वेळेवर उपचार करणे फार आवश्यक आहे, असे यात म्हटले आहे.

सकाळी डोके दुखण्यामागे वेगवेगळी कारणे असू शकतात. झोपेची वेळ ठरलेली नसणे, झोप अपुरी होणे आणि रात्री वारंवार झोपमोड होणे यामुळे संवेदनशील व्यक्तींना हा त्रास होण्याची शक्यता जास्त असते. रात्री उशिरापर्यंत स्क्रीनचा वापर, कॅफिन जास्त घेणे किंवा अचानक कॅफिन बंद करणे यामुळेही डोके दुखू शकते.

डिहायड्रेशनची समस्या फक्त उन्हाळ्यातच नाही, तर सगळ्याच ऋतूंमध्ये येते. शरीरातील पाण्याची पातळी कमी झाल्यामुळे, खूप घाम आल्यामुळे किंवा मद्यपान केल्यामुळे डोकेदुखी होते आणि दिवस खराब जातो. सकाळची डोकेदुखी वारंवार होणे, झोपेची वेळ, डोकेदुखी किती वेळ टिकते, तिची तीव्रता, घेतलेली औषधे आणि खाण्यापिण्याच्या सवयी यांमुळे हा त्रास वाढतो.

माइग्रेनचा त्रास सुरू झाला की तीव्र आणि धडधडणारी वेदना होते. त्यासोबत मळमळ, आवाजाची संवेदनशीलता आणि खाण्यापिण्याची इच्छा न होणे अशी लक्षणे दिसतात.

ऑब्स्ट्रक्टिव्ह स्लीप ॲप्निया हा झोपेशी संबंधित गंभीर आजार आहे. यात झोपेत असताना श्वसनमार्ग वारंवार आकुंचन पावतो किंवा बंद पडल्यासारखा होतो. श्वासोच्छवासात खंड पडल्यामुळे रक्तातील ऑक्सिजन आणि कार्बन डायऑक्साइडच्या पातळीत बदल होऊ लागतात. पुरेशी झोप घेऊनही खूप थकवा वाटणे, दिवसभर झोप येणे, घोरणे आणि झोपेत अचानक श्वास अडकून जाग येणे ही लक्षणे दिसू लागली, तर डॉक्टरांच्या सल्ल्याने वेळीच उपचार करणे आवश्यक आहे, असे सांगितले आहे.

झोपेत नकळत दात खाण्याच्या सवयीमुळे जबड्यावर आणि कण्यावर ताण येतो, त्यामुळे सकाळी उठल्यावर कपाळाच्या बाजूला वेदना होऊ शकतात. डोकेदुखी तीव्र झाली की अनेकदा मेडिकलमधून पेनकिलरच्या गोळ्या आणून घेतल्या जातात. पण या गोळ्या वारंवार घेतल्यास किडनीच्या आरोग्यावर परिणाम होण्याची शक्यता जास्त असते.

साधा किंवा मध्यम उच्च रक्तदाब सहसा डोकेदुखी निर्माण करत नाही. मात्र रक्तदाबाची पातळी जास्त वाढली, तर तीव्र डोकेदुखी होते आणि त्याचा परिणाम मेंदूच्या आणि हृदयाच्या आरोग्यावर होतो. ही माहिती फक्त सर्वसाधारण माहितीसाठी आहे. कोणताही उपाय करण्यापूर्वी आपल्या डॉक्टरांचा सल्ला घ्यावा, असेही यात नमूद केले आहे.