सोन्याचे दर घसरून पुन्हा वाढले; MCX वर 24 कॅरेट 1,49,861 रुपये प्रति 10 ग्रॅम

सोन्याच्या बाजारात भावांची चढउतार सतत सुरू आहे. मंगळवारी बाजार उघडताच सोन्याचे दर खाली आले होते, पण दुपारनंतर बाजाराने पुन्हा उभारी घेतली आणि दर वाढायला लागले.

मल्टी कमोडिटी एक्सचेंजवर (MCX) 24 कॅरेट सोन्याचा वायदा भाव 0.36 टक्क्यांनी म्हणजेच 545 रुपयांनी वाढून 1,49,861 रुपये प्रति 10 ग्रॅमवर पोहोचला. आधीच्या कामकाजाच्या दिवशी हा भाव 1,49,316 रुपये प्रति 10 ग्रॅमवर बंद झाला होता. बुलियन्सच्या आकडेवारीनुसार 24 कॅरेट सोन्याची किंमत 1,49,940 रुपये प्रति 10 ग्रॅम नोंदवली गेली. आंतरराष्ट्रीय बाजारात सोन्याचा भाव 4,173.70 डॉलर प्रति औंस झाला आहे.

सराफा बाजारात मात्र मंगळवारी सोन्याच्या किमतीत 200 रुपयांची घसरण झाली आणि दर सर्व करांसह 1,49,600 रुपये प्रति 10 ग्रॅमवर आले. गुडरिटर्न्सच्या माहितीनुसार 24 कॅरेट सोन्याचा दर 149170 रुपये प्रति 10 ग्रॅम आहे. ग्राहकांना आपल्या शहरातील कॅरेटनुसारचे ताजे दर तपासता येतात.

IBJA नुसार सकाळचे सोन्याचे दर असे: 24 कॅरेट 148473 रुपये, 22 कॅरेट 136001 रुपये, 18 कॅरेट 111355 रुपये आणि 14 कॅरेट 86857 रुपये, सर्व प्रति 10 ग्रॅम. 24 कॅरेट सोन्याचा आजचा दर मुंबई, पुणे, नाशिक, नागपूर, कोल्हापूर, जळगाव, सांगली आणि छत्रपती संभाजीनगर या सर्व शहरांत 149170 रुपये प्रति 10 ग्रॅम आहे.

चांदीच्या दरांतही सतत चढउतार दिसत आहेत. मंगळवारी बाजार उघडल्यावर किमती खाली आल्या, पण दुपारनंतर पुन्हा वाढू लागल्या. MCX वर चांदीचा वायदा भाव 0.08 टक्क्यांनी म्हणजेच 183 रुपयांनी वाढून 2,26,270 रुपये प्रति किलो झाला. मागील सत्रात चांदी 2,26,087 रुपये प्रति किलोवर बंद झाली होती. बुलियन्सच्या मते चांदीचा दर 2,26,490 रुपये प्रति किलो आहे, तर आंतरराष्ट्रीय बाजारात तो 61.29 डॉलर प्रति औंसवर पोहोचला आहे. दिल्लीच्या सराफा बाजारात सलग दुसऱ्या सत्रात चांदी सर्व करांसह 2.27 लाख रुपये प्रति किलोवर स्थिर राहिली. गुडरिटर्न्सच्या माहितीनुसार चांदीचा भाव 2,35,000 रुपये प्रति किलो झाला आहे.

व्यापाऱ्यांच्या म्हणण्यानुसार स्थानिक बाजारात सोन्याचे दर एका ठरावीक मर्यादेतच राहिले. दागिने बनवणारे आणि किरकोळ विक्रेते यांच्याकडून मागणी मंद असल्याने मौल्यवान धातूंच्या किमतीत मोठी हालचाल झाली नाही.

एचडीएफसी सिक्युरिटीजचे वरिष्ठ विश्लेषक (कमोडिटीज) सौमिल गांधी यांनी सांगितले की परदेशी बाजारातील मजबूत स्थितीमुळे स्थानिक बाजारात सोन्याचे दर स्थिर राहिले. मात्र डॉलर मजबूत झाल्याने किमतींमधील ही वाढ मर्यादित राहिली.

मिरे एसेट शेरखानचे कमोडिटीज प्रमुख प्रवीण सिंग यांच्या मते कच्च्या तेलाच्या किमतीत झालेल्या सौम्य घसरणीमुळे स्पॉट गोल्डची किंमत किंचित वाढून 4,157 डॉलर प्रति औंस झाली. तसेच युरो क्षेत्रातील आर्थिक आणि राजकीय चिंतांमुळे अमेरिकन डॉलर इंडेक्स 102.50 चा स्तर ओलांडून 10 एप्रिलनंतरच्या उच्चांकी पातळीवर पोहोचला आहे.

मोनार्क पीएमएसचे सहाय्यक वित्त व्यवस्थापक ध्रुव जोगलेकर यांनी नमूद केले की सोने स्थिर होण्यासाठी आणि पुढे तेजी पकडण्यासाठी चांगल्या स्थितीत आहे. अमेरिकेतील महागाईच्या आकडेवारीबाबत स्पष्टता येणे, ऑक्टोबर आणि नोव्हेंबर या मुख्य सणासुदीच्या महिन्यांत प्रत्यक्ष मागणीत होणारी पारंपरिक वाढ आणि मध्यवर्ती बँकांकडून असलेली मागणी, या घटकांमुळे येत्या काळात सोन्याला बळ मिळू शकते, असे त्यांनी सांगितले.