स्मृती मंधाना भारतीय महिला संघाची नवी कर्णधार, बीसीसीआयकडून घोषणा

स्मृती मंधानाकडे आता भारतीय महिला क्रिकेट संघाची कप्तानी आली आहे. बीसीसीआयने मंगळवारी उशिरा संध्याकाळी अधिकृत घोषणा करून तिन्ही फॉरमॅटसाठी तिची कर्णधारपदी निवड केल्याचे जाहीर केले.

हरमनप्रीत कौरने तिन्ही फॉरमॅटमधील कर्णधारपद सोडल्यानंतर अवघ्या काही तासांतच ही घोषणा झाली. बीसीसीआयच्या आढावा बैठकीनंतर एका दिवसाने हरमनप्रीतने राजीनामा दिला होता आणि त्यामुळे क्रिकेट जगतात मोठी खळबळ उडाली होती. आता संघाचे नेतृत्व कोण करणार, याची चर्चा सगळीकडे सुरू झाली होती. हरमनप्रीतने जड अंतःकरणाने कर्णधारपद सोडत असल्याचे सांगितले होते. मात्र खेळाडू म्हणून ती तिन्ही फॉरमॅटमध्ये संघात खेळत राहणार, हेही तिने स्पष्ट केले होते.

स्मृती आतापर्यंत संघाची उपकर्णधार होती. ती 2013 पासून भारतीय संघाचा मोठा आधार आहे आणि महिला क्रिकेटमध्ये सर्वाधिक धावा करणाऱ्यांच्या यादीत तिचे नाव येते. कप्तानी तिच्यासाठी नवी नाही. हरमनप्रीत संघात नसताना स्मृतीने 18 टी20 आंतरराष्ट्रीय आणि 4 एकदिवसीय सामन्यांत भारताचे नेतृत्व केले आहे.

देशांतर्गत आणि फ्रँचायझी क्रिकेटमध्येही तिने नेतृत्वगुण दाखवले आहेत. रॉयल चॅलेंजर्स बंगळुरूला तिने 2026 च्या महिला प्रीमियर लीगचे विजेतेपद मिळवून दिले. कर्णधार म्हणून तिचे हे दुसरे विजेतेपद ठरले. त्याआधी 2024 मध्येही तिच्याच नेतृत्वाखाली आरसीबीने ट्रॉफी जिंकली होती.

बीसीसीआयने मंगळवारी काढलेल्या अधिकृत पत्रकात म्हटले आहे, "ती २०१३ पासून भारतीय संघाचा एक महत्त्वाचा भाग आहे. या नव्या जबाबदारीसाठी तिच्याकडे प्रचंड अनुभव आहे. भारतीय महिला क्रिकेट संघ आता एका नव्या युगात प्रवेश करत असून, गेल्या काही वर्षांत झालेल्या प्रगतीला अधिक उंचीवर नेण्याची आणि संघाला पुढे घेऊन जाण्याची जबाबदारी आता स्मृतीवर असणार आहे."

निवडीनंतर स्मृती मंधाना म्हणाली, "भारताच्या कप्तानीची जबाबदारी मिळणे हा माझ्यासाठी अत्यंत मानाचा क्षण आहे. भारताचे प्रतिनिधित्व करणे माझ्यासाठी नेहमीच खूप महत्त्वाचे राहिले आहे आणि आता संघाचे नेतृत्व करण्याची संधी मिळणे माझ्यासाठी विशेष आहे. मी बीसीसीआय, निवड समिती, माझ्या सहकारी खेळाडू आणि माझ्या प्रवासात मला पाठिंबा देणाऱ्या तसेच माझ्यावर विश्वास ठेवणाऱ्या सर्वांची मनापासून आभारी आहे."

तिने आणखी एक भावना बोलून दाखवली, "भारतीय संघाचे नेतृत्व करण्याची संधी मिळणे हा माझ्यासाठी खूप मोठा आणि खास सन्मान आहे. भारताचे प्रतिनिधित्व करणे ही माझ्यासाठी नेहमीच अत्यंत मोलाची गोष्ट राहिली आहे आणि आता संघाचे नेतृत्व करण्याचा मिळालेला हा सन्मान देखील तितकाच महत्वाचा असणार आहे. माझ्यावर विश्वास दाखवल्याबद्दल मी निवड समिती, संघातील सर्व सहकारी खेळाडू आणि मला सतत पाठिंबा देणाऱ्या प्रत्येकाची अत्यंत आभारी आहे."

हरमनप्रीतबद्दल स्मृती म्हणाली, "एक कर्णधार म्हणून हरमनप्रीत कौरने भारतीय संघासाठी दिलेल्या योगदानाचा मी विशेष उल्लेख करू इच्छिते. तिने पूर्ण निष्ठेने संघाचे नेतृत्व केले आहे. या नवीन भूमिकेसोबत येणाऱ्या जबाबदारीची मला जाणीव आहे. संघासोबत काम करण्यासाठी, नवनवीन गोष्टी शिकण्यासाठी आणि भारतीय क्रिकेटला पुढे नेण्यासाठी माझे सर्वोत्तम योगदान देण्यास मी उत्सुक आहे."

बीसीसीआयचे अध्यक्ष मिथुन मिन्हास म्हणाले, "स्मृती मंधानाकडे भारतीय महिला क्रिकेट संघाचे कर्णधारपद सोपवण्यात आल्याबद्दल मी तिचे हार्दिक अभिनंदन करतो. तिचा दीर्घ अनुभव येणाऱ्या काळात संघासाठी अत्यंत मोलाचा ठरेल."

बोर्डाचे सचिव देवजीत सैकिया म्हणाले, "या महत्त्वाच्या जबाबदारीबद्दल स्मृतीचे मनापासून अभिनंदन. ती भारतीय संघातील सर्वात अनुभवी खेळाडूंपैकी एक बनली असून महिला क्रिकेटच्या प्रवासातील अनेक ऐतिहासिक क्षणांची ती साक्षीदार राहिली आहे. भारताचे प्रतिनिधित्व करण्याचे महत्त्व तिला उत्तम प्रकारे ठाऊक आहे आणि कर्णधार म्हणून ती ही जबाबदारी उत्तम प्रकारे पार पाडेल, असा मला पूर्ण विश्वास आहे."

हरमनप्रीत कौर ही भारतीय महिला क्रिकेटच्या इतिहासातील सर्वात यशस्वी कर्णधारांपैकी एक मानली जाते. तिच्या नेतृत्वाखाली गेल्या वर्षी भारतीय महिला संघाने पहिल्यांदाच वनडे वर्ल्ड कप जिंकला होता. आता संघ नव्या कर्णधारासह नव्या टप्प्याला सुरुवात करत आहे.