शेवगावमधील वृक्षतोडीवरून वन अधिकाऱ्यांवर कारवाईची मागणी, वंचितचा राज्यव्यापी आंदोलनाचा इशारा

अहिल्यानगर जिल्ह्यातील शेवगाव तालुक्यात हजारो झाडांची बेकायदेशीर कत्तल झाल्याचे समोर आले आहे. या प्रकरणातील दोषी वन अधिकाऱ्यांवर तात्काळ सदोष मनुष्यवधाचा गुन्हा दाखल करावा आणि त्यांना सेवेतून निलंबित करावे, अशी मागणी वंचित बहुजन आघाडीने केली आहे. आघाडीचे जिल्हाध्यक्ष योगेश साठे यांच्या नेतृत्वाखाली याबाबतचे निवेदन जिल्हाधिकारी आणि जिल्हा वनसंरक्षक अधिकारी धर्मवीर सालविठ्ठल यांना देण्यात आले.

निवेदनात म्हटले आहे की, संपूर्ण राज्यासह अहिल्यानगर जिल्हा सध्या भीषण दुष्काळ, वाढते तापमान आणि पाण्याच्या तीव्र तुटवड्याचा सामना करत आहे. अशा नाजूक परिस्थितीत निसर्गाचे रक्षण करणाऱ्या हिरव्यागार झाडांची बेसुमार कत्तल होणे आणि जबाबदार यंत्रणांनी त्याकडे जाणीवपूर्वक दुर्लक्ष करणे ही अतिशय संशयास्पद आणि निषेधार्ह गोष्ट आहे, असा आरोप करण्यात आला आहे.

शेवगाव परिसराचे दप्तर, प्रत्यक्ष पाहणी, देखरेख आणि संरक्षण यांची प्राथमिक जबाबदारी असतानाही कर्तव्यात गंभीर कसूर केल्याबद्दल काही अधिकाऱ्यांच्या भूमिकेवर निवेदनात प्रश्न उपस्थित केले आहेत. त्यात वनक्षेत्र अधिकारी मिलिंद गोवेकर, वनपाल संदीपकुमार एकशिंगे, फिरत्या पथकातील वनपाल सचिन शिंदे, वनरक्षक बालकृष्णा बडे, फिरत्या पथकातील वनरक्षक अर्जुन खेडकर, वनरक्षक सागर साळवे आणि वनरक्षक विजय पावले यांचा समावेश आहे.

शेवगाव येथील अनेक लाकूड वखारींमध्ये हजारो झाडे तोडून, वनरक्षक आणि वनपाल यांच्या संगनमताने लाकडाचा मोठा अवैध साठा करण्यात आल्याचा आरोपही निवेदनात आहे.

हा प्रकार उघडकीस येऊन १० दिवसांपेक्षा जास्त काळ लोटला, तरीही वन विभागाने दोषींवर कोणतीही ठोस प्रशासकीय किंवा कायदेशीर कारवाई केलेली नाही, असे निवेदनात नमूद आहे. स्थानिक वन कर्मचाऱ्यांच्या वरदहस्ताशिवाय एवढ्या मोठ्या प्रमाणावर लाकडाची तोड, वाहतूक आणि साठवणूक होणे शक्य नाही, असेही त्यात म्हटले आहे.

शेवगावमधील या प्रकरणाच्या पार्श्वभूमीवर, राज्यातील अतिशय संवेदनशील मानल्या जाणाऱ्या भीमाशंकर अभयारण्य परिसरातही अशाच प्रकारे वृक्षतोड होत असल्याच्या बातम्या येत आहेत. यावर प्रशासनाने अधिकृत स्पष्टीकरण द्यावे, अशी मागणीही निवेदनात केली आहे.

पर्यावरणाचा विनाश करून नागरिकांचे जीवित धोक्यात आणल्याबद्दल सर्व संबंधित दोषी वन अधिकाऱ्यांवर सदोष मनुष्यवधाचा गुन्हा दाखल करावा, त्यांना शासकीय सेवेतून निलंबित करावे आणि यामागील लाकूड माफिया, सॉमिल मालक आणि मुख्य सूत्रधारांचा पर्दाफाश करावा, असे निवेदनात स्पष्ट म्हटले आहे.

प्रशासनाने या गंभीर विषयाची तात्काळ दखल घेऊन कठोर कारवाई न केल्यास वंचित बहुजन आघाडीच्या वतीने लोकशाही मार्गाने राज्यव्यापी आंदोलन छेडले जाईल, असा इशारा यावेळी देण्यात आला.