शेख हसीना डिसेंबरमध्ये बांगलादेशात परतणार, पासपोर्ट सील असल्याचेही सांगितले

बांगलादेशच्या माजी पंतप्रधान शेख हसीना यांनी या वर्षी डिसेंबर महिन्यात मायदेशी परतण्याचा आपला निर्धार जाहीर केला आहे. २०२४ मधील हिंसक जनआंदोलनांनंतर त्यांना सत्ता सोडावी लागली होती आणि देशही सोडावा लागला होता. आता त्यांच्या या घोषणेमुळे बांगलादेशच्या राजकारणात पुन्हा एकदा खळबळ उडाली आहे.

'ग्लोबल सेंटर फॉर डेमोक्रॅटिक गव्हर्नन्स' या यूके-स्थित थिंक टँकने व्हर्च्युअल पत्रकार परिषद आयोजित केली होती. त्यात ७९ वर्षांच्या शेख हसीना यांनी सहभाग घेतला आणि डिसेंबरमध्ये बांगलादेशात परतणार असल्याचे सांगितले. या निर्णयामुळे ढाकासह संपूर्ण आशियाच्या राजकारणात मोठ्या घडामोडी सुरू झाल्या आहेत.

पत्रकार परिषदेत हसीना यांनी सांगितले की, सध्या त्यांचा पासपोर्ट सील करण्यात आलेला आहे. तरीही त्या कायदेशीर मार्ग शोधत आहेत आणि योग्य वेळ आल्यावर परतण्याचा निश्चित प्लॅन जाहीर करतील, असे त्यांनी म्हटले. त्यांच्या या घोषणेमुळे बांगलादेशातील सध्याचे अंतरिम सरकार आणि विरोधक यांच्या वर्तुळात चिंतेचे वातावरण पसरले आहे.

सत्तांतराच्या काळात आंदोलकांवर कठोर कारवाया झाल्या होत्या. त्या पार्श्वभूमीवर हसीना यांच्यावर अनेक गंभीर गुन्हे दाखल झाले आहेत. एका प्रकरणात तिथल्या न्यायालयाने त्यांना फाशीची शिक्षा सुनावली आहे. स्वतःवर गंभीर आरोप आणि अनेक खटले प्रलंबित असतानाही देशात परत जाऊन सर्व परिणामांना आणि शिक्षेला सामोरे जाण्यास आपण पूर्णपणे तयार आहोत, असे त्यांनी आवर्जून सांगितले.

न्यायालयाच्या या निर्णयाला हसीना यांनी तीव्र विरोध केला आहे. हा संपूर्ण खटला राजकीय सूडबुद्धीने प्रेरित असल्याचे त्यांनी म्हटले आहे. "अटक किंवा तुरुंगवासाची भीती मला माझ्या देशातील जनतेप्रती असलेल्या कर्तव्यापासून दूर ठेवू शकत नाही," असे त्या म्हणाल्या.

माजी पंतप्रधानांनी सांगितले की, त्यांचा परतण्याचा निर्णय केवळ स्वतःच्या राजकीय भवितव्यासाठी नाही, तर देशातील नागरिकांशी असलेल्या घट्ट नात्याशी जोडलेला आहे. यापूर्वी जुलै आणि ५ ऑगस्ट रोजी झालेल्या आंतरराष्ट्रीय पत्रकार परिषदांमध्ये आणि मुलाखतींमध्येही त्यांनी डिसेंबरमध्ये अवामी लीगच्या इतर सहकाऱ्यांसोबत देशात परतण्याचे संकेत दिले होते.

या वेळी हसीना यांनी अवामी लीगच्या राजकीय हक्कांचे खंबीर समर्थन केले. देशात खरी लोकशाही पुन्हा प्रस्थापित करायची असेल, तर अवामी लीग पक्षावरील बंदी तातडीने उठवली पाहिजे, असे त्यांनी ठासून सांगितले.

त्यांच्यासोबत त्यांचे पुत्र साजीब वाजेद जॉय आणि माजी शिक्षण मंत्री मोहिबुल हसन चौधरी नौफेल उपस्थित होते. दोघांनीही पक्षाची पुढील रणनीती आणि राजकीय दिशा स्पष्ट केली. सध्याच्या अंतरिम सरकारने आपल्याशी कोणताही थेट संपर्क साधलेला नाही, तरीही पक्ष आपल्या धोरणांवर ठाम राहून लढा देईल, असे जॉय यांनी सांगितले.

एकीकडे हसीना यांच्यावरील गंभीर आरोप आणि न्यायालयाने दिलेली शिक्षा आहे, तर दुसरीकडे पक्षाचे पुनरुज्जीवन करण्यासाठी त्यांनी दाखवलेले धाडस आहे. त्यामुळे डिसेंबरमध्ये बांगलादेशात काय घडते, याकडे आता संपूर्ण जगाचे बारकाईने लक्ष लागले आहे.