शेतातील विहिरीत पडून दोन सख्ख्या बहिणींचा दुर्दैवी मृत्यू

सेलू परिसरातील कोलगाव शिवारात बुधवारी (ता. २३) दुपारी घडलेल्या एका हृदयद्रावक घटनेत दोन सख्ख्या बहिणींचा शेतातील विहिरीत बुडून मृत्यू झाला. या घटनेमुळे कोलगाव गावासह संपूर्ण सेलू परिसरात शोककळा पसरली आहे.

सेलू शहरातील धान्य मार्केटसमोर राहणारे सचिन साटोने यांच्या कुटुंबावर हा दुर्दैवी प्रसंग ओढवला. त्यांच्या दोन मुली, गुड शेफर्ड आणि स्कूल ऑफ ब्रिलियंट या शाळांमध्ये शिकणाऱ्या दिव्या सचिन साटोने (वय ८) आणि उन्नती सचिन साटोने (वय १०) यांचा या घटनेत मृत्यू झाला. पालक सचिन यांनी बुधवारी बाहेरगावी जाण्याचे कारण सांगत दोघींना शाळेतून सुटी घेतली आणि त्यांना घेऊन कोलगाव शिवारातील शेतात नेले. त्या शेतात गेल्यानंतर काही वेळातच या दोघी शेतातील विहिरीत पडल्याचे उघडकीस आले.

पाणी पिण्यासाठी विहिरीजवळ गेल्या असता पाय घसरून त्या विहिरीत पडल्याचे सांगितले जात आहे. मात्र त्याचवेळी यामागे काही वेगळेच कारण असल्याचेही निदर्शनास येत असल्याची चर्चा परिसरात सुरू आहे. मुली विहिरीत पडल्याचे लक्षात येताच पालकांनी स्वतः विहिरीत उडी घेऊन त्यांना वाचवण्याचा प्रयत्न केल्याचेही बोलले जात आहे. या घटनेची माहिती मिळताच शिवारातील स्थानिक लोकांनी घटनास्थळी धाव घेतली. त्यानंतर रुग्णमित्र प्रज्वल लटारे यांच्यासह ठाणेदार पंकज वाघोडे, प्रशांत श्रीवास्तव, राकेश देवगडे, मंगेश राऊत आणि नितीन डाखोळे हे सेलू पोलीस स्टेशनचे कर्मचारी घटनास्थळी पोहोचले. नागरिकांच्या मदतीने दोघींचे मृतदेह विहिरीतून बाहेर काढण्यात आले.

सचिन साटोने यांना एकूण तीन मुली आहेत. त्यांची मोठी मुलगी देवयानी ही स्कूल ऑफ ब्रिलियंटमध्ये सहावीत शिकते. या घटनेच्या दिवशी ती गावातच सुरू असलेल्या गणपती कार्यक्रमात जेवणासाठी गेली होती. त्यामुळे ती या घटनेच्या वेळी पालकांसोबत शेतात नव्हती आणि त्यामुळे ती सुखरूप राहिली, असे सांगितले जाते.

दोन्ही मुलींचे मृतदेह विहिरीतून बाहेर काढल्यानंतर उत्तरीय तपासणीसाठी म्हणजेच पोस्टमॉर्टेमसाठी सेलू ग्रामीण रुग्णालयात पाठवण्यात आले. या घटनेची नोंद सेलू पोलीस स्टेशनमध्ये घेण्यात आली असून पुढील तपास सेलू पोलीस करत आहेत. घटनेची नेमकी परिस्थिती आणि इतर तपशील पोलिसांच्या तपासानंतरच स्पष्ट होणार आहेत. या हृदयद्रावक घटनेने सेलू परिसरात आणि कोलगाव गावात तीव्र शोक व्यक्त केला जात आहे.