सावंगी मेघेत मोटारपंप चोरणाऱ्या टोळीचा पर्दाफाश, पाच आरोपी पोलिसांच्या जाळ्यात
शेतातील विहिरींवरचे मोटारपंप चोरणाऱ्या टोळीला सावंगी मेघे पोलिसांनी अटक केली असून, अल्पवयीन मुलाच्या माहितीवरून तपासाला दिशा मिळाली.
सावंगी मेघे पोलीस स्टेशनच्या हद्दीत गेल्या काही दिवसांपासून शेतकऱ्यांच्या शेतातील विहिरींवरचे मोटारपंप चोरीला जाण्याच्या घटना वाढल्या होत्या. या प्रकरणी पोलिसांनी तपास करून पाच जणांच्या टोळीला अटक केली आहे.
पडेगाव येथे राहणारे राजेंद्र गोविंदराव डायगव्हाणे यांनी पोलिसांत तक्रार दिली होती की, १६ सप्टेंबर २०२६ रोजी संध्याकाळी सहा वाजल्यापासून ते १७ सप्टेंबरच्या सकाळी सात वाजेपर्यंत त्यांच्या शेतातून सिल्व्हर कंपनीची पाच एचपी मोटार आणि केबल कोणीतरी चोरून नेली. त्यांच्याच शेतशेजारी असलेल्या दिलीप शामराव मसराम (रा. पडेगाव) यांच्या शेतातून किर्लोस्कर कंपनीची तीन एचपी मोटार व केबल, तर सुनील पुरुषोत्तम रेवतकर यांच्या शेतातून टर्गो कंपनीची तीन एचपी मोटार व केबलही याच काळात चोरीला गेली. या तक्रारीवरून पोलिस स्टेशनला अपराध क्रमांक ७२४/२६ नुसार भारतीय न्याय संहितेच्या कलम ३०३(२) खाली गुन्हा नोंदवण्यात आला. या घटनेआधी, गेल्या महिनाभरात याच परिसरात आणखी चार मोटारपंप चोरीला गेले होते. सेलसुरा रोडवरील देवळीचे चंद्रकांत भैयाजी भारती यांच्या शेतविहिरीतील एक मोटार, वडद रोडवरील मोरेश्वर ज्ञानेश्वर वडतकर आणि प्रज्वल वासुदेव डफरे यांच्या शेतातील एक मोटार, तसेच नागठाणा शिवारातील वर्ध्याच्या वंजारी चौकात राहणारे स्वप्नील खुशालराव झाडे यांच्या शेतातील एक मोटार अशा या चार चोऱ्यांचा समावेश होता.
या सगळ्या घटनांचे गांभीर्य लक्षात घेऊन सावंगी पोलिस स्टेशनचे ठाणेदार पोलिस निरीक्षक विनोद गिरी यांनी गुन्हे शोध पथकाला चोरीचा माल आणि आरोपींचा शोध घेण्याचे निर्देश दिले. या तपासादरम्यान पोलिसांना खबऱ्यामार्फत माहिती मिळाली की, या चोऱ्यांमध्ये एका अल्पवयीन मुलाचा सहभाग आहे. पोलिसांनी या मुलाला विश्वासात घेऊन चौकशी केली असता, त्याने सालोड टी पॉइंटचा ओम पठाडे, देवळीचा समयक भरणे, आगरगावचे किष्णा राऊत व जितेंद्र कांबळे आणि धोत्रा रेल्वेचा आशिष आत्राम या मित्रांच्या मदतीने शेतातील मोटारपंप चोरल्याचे सांगितले. पोलिसांनी या माहितीवरून ओम दिगंबर पठाडे (वय २२, रा. सालोड हिरापूर), समयक दीपचंद भरणे (वय १९, रा. देवळी), कुणाल उर्फ किष्णा राजेंद्र राऊत (वय १९, रा. आगरगाव, ता. देवळी), जितेंद्र गरिबरावजी कांबळे (वय २८, रा. आगरगाव, ता. देवळी) आणि आशिष अनंता आत्राम (वय १९, रा. धोत्रा रेल्वे, ता. वर्धा) या पाच जणांना अटक केली. न्यायालयाकडून पोलिस कोठडी घेऊन चौकशी केली असता, आरोपींनी चोरलेल्या मोटारी राजीव नगर सावंगी येथील भंगार विक्रेता गोविंद गदई याला विकल्याचे कबूल केले.
याशिवाय, याच आरोपींनी १३ ते १४ सप्टेंबर २०२६ च्या रात्री सावंगी मेडिकल चौक ते सावंगी दवाखाना रोडवरील सिमेंट रोड बांधकामाच्या मशीनचीही केबल चोरल्याची कबुली दिली. याबाबत पोलिस स्टेशनला अपराध क्रमांक ७२२/२६ नुसार भारतीय न्याय संहितेच्या कलम ३०३(२) खाली स्वतंत्र गुन्हा नोंद आहे. आरोपींनी ही केबल जाळून त्यातील तांबे वेगळे काढून एका ठिकाणी लपवून ठेवले होते. आरोपीने ती जागा दाखवल्यानंतर पंचनाम्यानुसार पाच किलो तांब्याची तार, किंमत ७५०० रुपये, जप्त करण्यात आली.
भंगार विक्रेत्याकडून पोलिसांनी सिल्व्हर कंपनीची पाच एचपी मोटार (किंमत ९ हजार रुपये), किर्लोस्कर कंपनीची तीन एचपी मोटार (चार हजार रुपये), टर्गो कंपनीची तीन एचपी मोटार (सात हजार रुपये) तसेच वडद, सेलसुरा आणि नागठाणा शिवारातून चोरलेल्या व तोडून-फोडून वेगवेगळ्या केलेल्या चार मोटारींचे भाग (किंमत दहा हजार रुपये) जप्त केले. गुन्हा करताना वापरलेली हिरो होंडा स्प्लेंडर (क्रमांक एमएच ३१ बीवाय ३७००, किंमत ५० हजार रुपये) आणि होंडा शाइन (क्रमांक एमएच ३२ एडब्ल्यू ३६३९, किंमत ८० हजार रुपये) ही दोन दुचाकी वाहने, एक ओप्पो मोबाईल (दहा हजार रुपये), एक पोको अँड्रॉइड मोबाईल (दहा हजार रुपये), एक कीपॅड मोबाईल (१५०० रुपये) आणि जाळलेल्या केबलमधून काढलेली तांब्याची तार (पंधरा हजार रुपये) असा एकूण दोन लाख चार हजार रुपयांचा मुद्देमाल जप्त करून सावंगी मेघे पोलिस स्टेशनने दोन गुन्हे उघडकीस आणले.
पोलिस अधीक्षक सौरभकुमार अग्रवाल, अपर पोलिस अधीक्षक सदाशिव वाघमारे आणि उपविभागीय पोलिस अधिकारी सुनील महाडिक यांच्या मार्गदर्शनाखाली ठाणेदार पोलिस निरीक्षक विनोद गिरी यांच्या नेतृत्वाखाली हेड कॉन्स्टेबल संजय पंचभाई, विरेंद्र कांबळे, अनिल वैद्य, निखिल फुटाणे, हर्षवर्धन मून आणि अमोल जाधव यांनी ही कारवाई केली. या प्रकरणाचा पुढील तपास पोलिस हेड कॉन्स्टेबल संजय पंचभाई करत आहेत.
