शासकीय वसतिगृहांच्या समस्यांवर अभाविप आक्रमक, प्रशासनाला ११ दिवसांची मुदत

मुंबईतील शासकीय वसतिगृहांमध्ये राहणाऱ्या विद्यार्थ्यांना रोज भेडसावणाऱ्या मूलभूत समस्यांकडे प्रशासनाचे लक्ष वेधण्यासाठी अखिल भारतीय विद्यार्थी परिषदेने, म्हणजेच अभाविपने, उच्च शिक्षण विभागाच्या संयुक्त संचालकांना निवेदन दिले. या वेळी वसतिगृहातील विद्यार्थीही एकत्र येऊन सहभागी झाले आणि त्यांनी आपले प्रलंबित प्रश्न प्रशासनासमोर मांडले. निवेदन दिल्यानंतर संयुक्त संचालकांसोबत या प्रश्नांवर सविस्तर चर्चाही झाली.

निवेदनात अनेक अडचणींचा उल्लेख आहे. शासकीय वसतिगृहांमध्ये विद्यार्थ्यांना पिण्याच्या पाण्याची समस्या भेडसावते, लिफ्ट नीट चालत नाहीत, नियमित स्वच्छता होत नाही, कॅन्टीनमध्ये अस्वच्छता आणि गैरसोयी आहेत, तसेच इमारतींची दुरवस्था झाली आहे, याकडे अभाविपने या निवेदनातून लक्ष वेधले. हे सगळे प्रश्न महत्त्वाचे असल्याचे अभाविपचे म्हणणे आहे.

या अडचणी दूर करण्यासाठी अभाविपने काही मागण्याही केल्या आहेत. उंदीर, कबुतरे आणि ढेकूण यांचा प्रादुर्भाव थांबवण्यासाठी प्रभावी उपाययोजना कराव्यात, प्रत्येक मजल्यावर पिण्याच्या पाण्याची सोय करावी, वाचनालयाचे नूतनीकरण करावे आणि संगणक सुविधा सुरू करावी, अशी मागणी आहे. वसतिगृहात वाय-फाय सुरळीत चालावे, तसेच जेवणाच्या दर्जावर नियंत्रण ठेवण्यासाठी वसतिगृह भोजन समिती स्थापन करावी, असेही निवेदनात म्हटले आहे. विद्यार्थी कल्याण निधी कसा वापरला जातो, यात पारदर्शकता ठेवावी, अशी मागणीही अभाविपने केली आहे.

अभाविपच्या पदाधिकाऱ्यांनी आपली भूमिका मांडताना सांगितले की, विद्यार्थ्यांच्या शिक्षणाच्या प्रवासात वसतिगृहाची भूमिका खूप महत्त्वाची असते. तिथे मूलभूत सुविधा नसल्यामुळे विद्यार्थ्यांच्या रोजच्या जगण्यावर आणि शिक्षणावर परिणाम व्हायला नको. विद्यार्थ्यांना सुरक्षित, स्वच्छ आणि सन्मानाचे वातावरण देणे ही प्रशासनाची जबाबदारी आहे.

संयुक्त संचालकांनी विद्यार्थ्यांनी मांडलेल्या समस्यांची दखल घेतली आणि आवश्यक कार्यवाही करण्याचे आश्वासन दिले. मात्र नुसते आश्वासन नको, प्रत्यक्ष कार्यवाही व्हावी, यासाठी अभाविपने प्रशासनाला ११ दिवसांची मुदत दिली आहे. या काळात मागण्या पूर्ण झाल्या नाहीत, तर वसतिगृहातील विद्यार्थ्यांना सोबत घेऊन तीव्र आंदोलन केले जाईल, असा स्पष्ट इशारा अभाविपने दिला आहे.

या वेळी अभाविपचे मुंबई महानगर मंत्री अभिषेक पवार, मुंबई महानगर वसतिगृह प्रमुख अथर्व, अभाविपचे इतर कार्यकर्ते आणि शासकीय वसतिगृहातील विद्यार्थी उपस्थित होते.

याबाबत बोलताना अभिषेक पवार म्हणाले, "वसतिगृहातील विद्यार्थ्यांना मूलभूत सुविधा मिळणे हा त्यांचा अधिकार आहे. प्रशासनाने ११ दिवसांत या समस्यांचे निराकरण करावे, अन्यथा अभाविप विद्यार्थ्यांना सोबत घेऊन आंदोलन करण्यात येईल. विद्यार्थ्यांच्या हक्कांशी कोणतीही तडजोड केली जाणार नाही."