पिंपरी चिंचवड करंडक: सह्यांद्री किंग्ज् आणि विन टेंपल क्लब उपांत्य फेरीत

पिंपरी चिंचवड शहर क्रिकेट असोसिएशनने आयोजित केलेल्या 'पिंपरी चिंचवड करंडक' आंतरक्लब खुल्या गटाच्या टी-२० स्पर्धेत सह्यांद्री किंग्ज् आणि विन टेंपल क्लब हे दोन संघ उपांत्य फेरीत पोहोचले आहेत. दोघांनीही आपापल्या उपांत्यपूर्व फेरीच्या सामन्यात प्रतिस्पर्धी संघाला हरवले. हिंजवडी येथील फोर स्टार क्रिकेट मैदानावर ही स्पर्धा सुरू आहे.

पहिल्या सामन्यात सह्यांद्री किंग्ज् संघाने २नाईन स्पोर्ट्‌स क्लब पुणे यांचा पाच गडी राखून पराभव केला. आधी फलंदाजी करणाऱ्या २नाईन स्पोर्ट्‌स क्लबचा डाव १९.५ षटकांत ११९ धावांवर आटोपला. प्रद्युम्न आटपाडकर यांनी ३३ आणि हिमांशु यादव यांनी १९ धावा करून संघाचा डाव सावरण्याचा प्रयत्न केला. सह्यांद्री किंग्ज्कडून लोकेश चौधरी यांनी २५ धावांत तीन गडी बाद केले, तर सईश शिंदे आणि मयुर गोखले यांनी प्रत्येकी २२ धावा देऊन दोन गडी टिपले.

११९ धावांचे लक्ष्य सह्यांद्री किंग्ज्ने ११.१ षटकांत पाच गडी गमावून पार केले. त्यांच्या १२३ धावांमध्ये सुशील जाधव यांचा वाटा सर्वात मोठा होता. त्यांनी ३६ चेंडूंत ५ चौकार आणि ६ षटकारांसह ६४ धावा फटकावल्या आणि विजय पक्का केला. सुशांत अभंग यांनी १८ धावा केल्या. २नाईन स्पोर्ट्‌सकडून सारंग बावळे यांनी ८ धावांत दोन गडी बाद केले. सुशील जाधव सामनावीर ठरले.

दुसऱ्या सामन्यात विन टेंपल क्लबने अव्दिका स्पोर्ट्‌स क्लबचा ९१ धावांनी सहज पराभव केला. प्रथम फलंदाजी करताना विन टेंपल क्लबने २० षटकांत आठ गडी गमावून २३१ धावांचा डोंगर उभा केला. सुहेल श्रीखंडे यांनी ३० चेंडूंत ६ चौकार आणि ५ षटकारांसह ६६ धावांची खेळी केली. त्यांच्याशिवाय संकेत माने यांनी ४५, हरी सावंत यांनी ३२ आणि हर्षल हाडके यांनी २१ धावांची भर घातली. अव्दिका स्पोर्ट्‌सकडून पुष्कर बोऱ्हाडे यांनी ४३ धावांत दोन आणि देवराज बेर्डे यांनी ६१ धावांत दोन गडी बाद केले.

एवढ्या मोठ्या लक्ष्याचा पाठलाग करताना अव्दिका स्पोर्ट्‌स क्लबचा डाव १७.५ षटकांत १४० धावांवर संपला. देवराज बेर्डे यांनी ६६ धावा करून एकटे झुंज दिली, तर विशाल गव्हाणे यांनी २९ धावा केल्या. विन टेंपलकडून हरी सावंत यांनी ३२ धावांत चार गडी बाद केले, वेदांत कानपीळे यांनी २५ धावांत तीन आणि राकेश जे. यांनी २४ धावांत दोन गडी टिपले. सुहेल श्रीखंडे यांना सामनावीर म्हणून गौरवण्यात आले.