राष्ट्रीय अंडर-१७ टेनिस क्रिकेट स्पर्धेसाठी श्लोक वनकरची महाराष्ट्र संघात निवड
गोंडपिपरीतील होतकरू खेळाडू श्लोक आनंद वनकर याची राष्ट्रीय अंडर-१७ टेनिस क्रिकेट स्पर्धेसाठी महाराष्ट्र संघात निवड झाली आहे. या निवडीमुळे श्लोकच्या आयुष्यात नवा आनंद आला आहे.
चंद्रपूर जिल्ह्याच्या क्रीडा क्षेत्रात श्लोकच्या निवडीमुळे आनंदाचे वातावरण आहे. सर्व स्तरांतून त्याच्यावर शुभेच्छांचा वर्षाव होत आहे.
टेनिस क्रिकेट असोसिएशन महाराष्ट्राच्या वतीने राज्यस्तरीय अंडर-१७ टेनिस क्रिकेट स्पर्धा घेण्यात आली होती. त्या स्पर्धेत श्लोकने आपल्या उत्कृष्ट खेळाची छाप पाडली. त्याची कामगिरी, क्रीडा कौशल्य, शिस्त आणि खेळातील सातत्य लक्षात घेऊन त्याची महाराष्ट्र संघासाठी निवड करण्यात आली आहे.
राष्ट्रीय अंडर-१७ टेनिस क्रिकेट स्पर्धा ३ ते ७ ऑक्टोबर २०२६ या कालावधीत मथुरा, उत्तर प्रदेश येथे आयोजित करण्यात येणार आहे. या स्पर्धेत श्लोक महाराष्ट्राचे प्रतिनिधित्व करणार आहे.
गोंडपिपरीतून राष्ट्रीय पातळीवर खेळण्याची संधी मिळाल्यामुळे श्लोकच्या या यशाचे सर्वत्र कौतुक होत आहे. मेहनत, जिद्द आणि सातत्य यांच्या जोरावर राष्ट्रीय स्तरापर्यंत मजल मारणाऱ्या श्लोकच्या यशामुळे तालुक्यातील तरुण खेळाडूंनाही प्रेरणा मिळाली आहे.
