सेकंड हँड किंवा रिफर्बिशड आयफोन घेताय? खरेदीआधी अशी तपासा वॉरंटी
सेकंड हँड किंवा रिफर्बिशड आयफोन घेण्याचा विचार असेल, तर खरेदीआधी डिव्हाईस वॉरंटीमध्ये आहे की नाही हे तपासणं अत्यंत गरजेचं आहे. त्यासाठी सोप्या स्टेप्स आहेत.
सध्या अनेकजण महागडा नवा आयफोन घेण्यापेक्षा सेकंड हँड किंवा रिफर्बिशड आयफोन घेणं पसंत करतात. कारण नवा आयफोन घ्यायचा तर जास्तीचे पैसे खर्च करावे लागतात. जुना किंवा रिफर्बिशड फोन मात्र कमी किमतीत आणि आपल्या बजेटमध्ये मिळू शकतो. असा फोन घेण्याचा विचार असेल, तर खरेदीआधी एक गोष्ट तपासणं अत्यंत गरजेचं आहे, ती म्हणजे डिव्हाईस वॉरंटीमध्ये आहे की नाही.
अनेकजण वॉरंटीची स्थिती न बघताच असा फोन घेतात. नंतर डिव्हाईसच्या हार्डवेअरमध्ये काही बिघाड झाला, की दुरुस्तीसाठी मोठ्या प्रमाणात खर्च करावा लागतो. म्हणूनच सेकंड हँड किंवा रिफर्बिशड आयफोन घेताना डिव्हाईसची वॉरंटी आणि एप्पल केअरची स्थिती योग्य पद्धतीने तपासून घ्यावी. असं केलं तर नंतर कोणताही पश्चाताप करण्याची वेळ येणार नाही. आता आयफोनची वॉरंटी कशी तपासायची, ते पाहू.
वॉरंटी तपासण्याची सर्वात सोपी पद्धत फोनच्या सेटिंगमधूनच आहे. सर्वात आधी आयफोनची सेटिंग उघडा. नंतर खाली स्क्रोल करून जनरल हा पर्याय निवडा. तिथे तुम्हाला ॲपलकेयर अँड वॉरंटी हा ऑप्शन दिसेल. त्यावर क्लिक केलं की तुमच्या समोर स्क्रीनवर डिव्हाईसचे सगळे डिटेल्स येतात.
तुम्ही किंवा आधीच्या यूजरने आयफोनमध्ये एप्पल अकाऊंटने साईन इन केलेलं असेल, तर फोनची अधिकृत वॉरंटी किंवा एक्सटेंडेड प्लॅन कधीपर्यंत व्हॅलिड आहे, हेही स्क्रीनवर दिसतं. सेकंड हँड किंवा रिफर्बिशड आयफोन घेताना वॉरंटी पाहण्याची ही सर्वात सोपी पद्धत आहे.
पण अनेकदा असं घडतं की सेटिंग उघडून वॉरंटी पाहण्याची संधीच मिळत नाही. अशा वेळी सिरीअल नंबरचा वापर करून वॉरंटी स्टेटस तपासता येतो. त्यासाठी ब्राऊझरमध्ये ॲपलच्या अधिकृत चेक कव्हरेज वेबसाईटवर जावं लागतं. तिथे एक बॉक्स दिसेल. त्यात आयफोनचा यूनिक सीरियल नंबर पेस्ट करायचा आहे. हा यूनिक सीरियल नंबर फोनच्या अबाऊट सेक्शनमध्ये दिसतो.
बॉक्समध्ये यूनिक सीरियल नंबर टाकल्यानंतर स्क्रीनवर कॅप्चा कोड दिसतो. तो भरून सबमिट करा. त्यानंतर डिव्हाईस वॉरंटीमध्ये आहे की नाही, याची माहिती एप्पल देते. ऑनलाइन मार्केटप्लेसवरून सामान मागवणाऱ्यांसाठी ही पद्धत फायद्याची आहे, कारण त्यांना पेमेंट करण्याआधी डिव्हाईसची वॉरंटी पाहायची असते.
थोडक्यात, कमी किमतीत आणि बजेटमध्ये सेकंड हँड किंवा रिफर्बिशड आयफोन घेणं फायदेशीर ठरू शकतं. पण त्याआधी सेटिंगमधून किंवा सिरीअल नंबरने वॉरंटी स्टेटस तपासणं गरजेचं आहे.
