नागपुरच्या कामठीत पोलिसांचा पाठलाग, भरधाव कार बॅरिकेडला धडकून उलटली; तिघे ताब्यात

नागपूरच्या कामठी परिसरात पहाटे पोलीस आणि अमली पदार्थ तस्करीतील वांछित आरोपी यांच्यात एखाद्या सिनेमातल्या अॅक्शन सीनसारखा थरार रंगला. अमली पदार्थ तस्करीच्या प्रकरणात पोलिसांना हवे असलेले तीन आरोपी टाटा हॅरियर कारमधून जात होते. ड्रॅगन पॅलेस टेम्पल मार्गावर पोलिसांनी त्यांना थांबण्याचा इशारा केला. मात्र कार थांबवण्याऐवजी चालकाने वेग वाढवला आणि तो पोलिसांच्या तावडीतून निसटण्याचा प्रयत्न करू लागला. पुढे भरधाव कार मेट्रो रेल्वेच्या बांधकामस्थळी लावलेल्या बॅरिकेडला धडकून उलटली. त्यानंतर पोलिसांनी तिघाही आरोपींना ताब्यात घेतले.

या सगळ्याची सुरुवात एका गुप्त माहितीतून झाली. न्यू कामठी पोलीस स्टेशनचे पोलीस निरीक्षक नितीन राठोड यांना माहिती मिळाली की एनडीपीएस कायद्यांतर्गत दाखल अमली पदार्थ तस्करीच्या प्रकरणात वांछित असलेला आरोपी मो. शारीक मो. रजीक हा आपल्या दोन साथीदारांसह टाटा हॅरियर कारमधून यशोधरा नगर परिसरात आहे.

ही माहिती मिळताच पोलीस सतर्क झाले आणि हालचालीला लागले. पोलिसांच्या पथकाने पहाटे पाच वाजल्यापासून आरोपींना पकडण्यासाठी सापळा रचला. काही वेळाने संशयित कार घोरपड मार्गावरून यशोधरा नगरमार्गे कन्हानच्या दिशेने जाताना दिसली. ड्रॅगन पॅलेस टेम्पल मार्गावर रेल्वे अंडरपासजवळ पोलिसांच्या पथकाने कारला थांबण्याचा इशारा दिला. त्या वेळी कार शारीकच चालवत होता. पोलिसांचे पथक दिसताच त्याने कारचा वेग वाढवला आणि तो कामठीच्या दिशेने पळू लागला.

त्या मार्गावर मेट्रो रेल्वेचे बांधकाम सुरू होते. काही अंतरावरच शारीकचा कारवरचा ताबा सुटला. कार थेट बांधकामस्थळी लावलेल्या बॅरिकेडला जाऊन धडकली आणि उलटली. अपघातात कारचा चक्काचूर झाला. शारीक आणि त्याच्या साथीदारांना पळून जाण्याची संधीही मिळाली नाही. पोलिसांनी तिघांनाही पकडले.

शारीकसोबत कारमध्ये अब्दुल करीम मो. मुकीम (वय 30) आणि गुलाम यशदाणी मो. रशीद अन्सारी (वय 26) हे दोघे होते. हे तिघेही अमली पदार्थ तस्करीच्या प्रकरणात पोलिसांना हवे होते.