फोनवरची तीन बटणं वापरण्याची सोपी ट्रिक, इमर्जन्सीपासून स्क्रीनशॉटपर्यंत होईल काम झटपट
स्मार्टफोनच्या साईडला असलेली तीन बटणं फक्त आवाज कमी-जास्त करण्यासाठी आणि फोन बंद करण्यासाठी नसतात, तर त्यात लपलेल्या काही सिक्रेट ट्रिक्स तुमचं काम एकदम सोपं आणि झटपट करतात.
आपण दिवसभर फोन हातात घेऊन फिरतो, पण त्याच्याच साईडला असलेल्या तीन बटणांकडे कधी नीट लक्ष देत नाही. आवाज कमी-जास्त करायचं एक बटण आणि फोन बंद-चालू करायचं एक बटण, एवढंच काम या बटणांचं आहे असं आपल्याला वाटतं. पण खरं तर या तीन बटणांमध्ये काही सिक्रेट ट्रिक्स लपलेल्या आहेत, ज्यामुळे रोजचं काम एकदम पटापट आणि सोपं होऊ शकतं.
यातली सगळ्यात महत्त्वाची ट्रिक म्हणजे इमर्जन्सी SOS फिचर. महिलांसाठी आणि वयस्कर व्यक्तींसाठी अडचणीच्या वेळी हा फीचर खूप कामाचा ठरतो. कधी अचानक संकट आलं, तर हा फीचर चक्क तुमचे प्राण वाचवू शकतो. यासाठी फक्त फोन बंद करायच्या बटणावर तीनवेळा पटापट दाबायचं. असं केलं की तुमचं लोकेशन थेट जवळच्या माणसांना आणि 112 या नंबरवर म्हणजे पोलिसांना पाठवलं जातं. यामुळे मदत मिळण्याची शक्यता वाढते, त्यामुळे आजच फोनमध्ये ही सेटिंग ऑन करून ठेवलेली बरी.
दुसरी ट्रिक कॅमेऱ्याची. कधी कधी असं होतं की समोर छान सीन येतो आणि फोटो काढायचा असतो, पण फोन अनलॉक करा, कॅमेरा शोधा यात तो क्षण निघून जातो. यासाठी फोन लॉक असतानाच व्हॉल्यूम डाउनचं बटण दोनदा पटापट दाबायचं, कॅमेरा लगेच चालू होतो. ही ट्रिक अँड्रॉइड आणि आयफोन दोन्हीत चालते. आयफोन युजर्स तर त्यांचं Action बटणही कॅमेऱ्यासाठी सेट करू शकतात.
एका हाताने फोटो काढायचा असेल तर मोठा फोन असल्यावर स्क्रीनवरचं बटण दाबताना हात हलतो आणि फोटो खराब येतो. त्यापेक्षा कॅमेरा चालू असताना व्हॉल्यूमच्या दोन्ही बटणांपैकी कोणतंही एक बटण क्लिक करायचं, फोटो चांगला येतो. तेच बटण जरा जास्त वेळ दाबून ठेवलं तर व्हिडिओ रेकॉर्डिंगही सुरू होतं.
स्क्रीनशॉटसाठी अजूनही तीन बोटांनी स्वाइप करत असाल, तर त्यापेक्षा पॉवर बटण आणि व्हॉल्यूम डाउन बटण एकत्र दाबून ठेवा, एका सेकंदात स्क्रीनशॉट तयार होतो. काही फोनमध्ये पॉवर बटण आणि व्हॉल्यूम अप बटण एकत्र दाबलं तर स्क्रीन रेकॉर्डिंग सुरू होतं, हे सेटिंगमध्ये जाऊन चेक करता येतं.
फोन जास्त वापरला किंवा रॅम फुल झाली की फोन हँग होतो आणि स्क्रीन पूर्णपणे बंद पडते, काहीच रिस्पॉन्स मिळत नाही. अशा वेळी घाबरायचं काही कारण नाही, फक्त पॉवर बटण आणि व्हॉल्यूम अप बटण एकत्र 10 ते 15 सेकंद दाबून ठेवायचं. यामुळे फोन जबरदस्तीने बंद होऊन परत चालू होतो, याला Force Restart म्हणतात आणि हँग झालेला फोन लगेच ठीक होतो.
या सगळ्या ट्रिक्स छोट्या वाटत असल्या तरी रोजच्या वापरात खूप कामाच्या आहेत. कंपन्यांनी हे फीचर्स मुद्दाम दिले आहेत, जेणेकरून वेळ वाचेल. तुम्हीही तुमच्या फोनच्या सेटिंगमध्ये जाऊन बटन शॉर्टकटच्या ऑप्शनमध्ये या सगळ्या गोष्टी स्वतःच्या सोयीनुसार सेट करू शकता. एकदा करून बघा, फोन वापरणं आणखी सोपं वाटेल.
