फ्लायदुबई कॉकपिट हल्ला: आरोपी सह-वैमानिकाला ओमान एअरने 2024 मध्ये केले होते निलंबित
दुबईहून तेल अवीवला निघालेल्या फ्लायदुबईच्या FZ1073 विमानातील हल्ल्याचा आरोप असलेल्या सह-वैमानिकाबद्दल नवी माहिती समोर आली आहे.
दुबईहून इस्रायलमधील तेल अवीवकडे निघालेल्या फ्लायदुबईच्या FZ1073 विमानातील कॉकपिट हल्ल्याच्या प्रकरणाला आता आंतरराष्ट्रीय वळण मिळाले आहे. विमानाचे भारतीय कॅप्टन स्मित मच्छर यांच्यावर हल्ला केल्याचा आरोप असलेल्या ओमानच्या सह-वैमानिकाबद्दल धक्कादायक माहिती समोर आली आहे. समोर आलेल्या माहितीनुसार, हा आरोपी सह-वैमानिक पूर्वी ज्या ओमान एअरमध्ये काम करत होता, त्या कंपनीने राष्ट्रीय आणि विमान वाहतूक सुरक्षेच्या कारणावरून त्याला निलंबित केले होते.
आरोपी सह-वैमानिकाचे नाव हम्माम अल हमामी असे आहे. २०२४ मध्ये तो ओमान एअरमध्ये प्रशिक्षणार्थी सह-वैमानिक म्हणून काम करत होता. त्या काळात झालेल्या सुरक्षा तपासणीत त्याच्या ताब्यात अतिरेकी साहित्य सापडले होते, असे सांगितले जाते. त्यानंतर ओमान एअरने त्याला उड्डाणाच्या कामावरून लगेच निलंबित केले. मात्र त्याला कंपनीतून पूर्णपणे काढून टाकण्यात आले नव्हते. त्याला फक्त प्रशासकीय किंवा डेस्क जॉबच्या भूमिकेत ठेवण्यात आले होते.
अशी पार्श्वभूमी असलेला माणूस फ्लायदुबईसारख्या आंतरराष्ट्रीय एअरलाइनमध्ये फर्स्ट ऑफिसर म्हणून कसा रुजू झाला, हा आता तपासाचा मुख्य मुद्दा बनला आहे. या प्रकारामुळे जगभरातील विमान वाहतूक यंत्रणांची सुरक्षा तपासणी आणि कर्मचाऱ्यांची पार्श्वभूमी पडताळणी (Background Verification) यावर मोठे प्रश्नचिन्ह उभे राहिले आहे.
घटना बुधवारी, ३० सप्टेंबर रोजी घडली. फ्लायदुबईचे FZ1073 हे विमान १८२ प्रवासी आणि कर्मचाऱ्यांना घेऊन दुबईहून तेल अवीवच्या दिशेने उडत होते. विमान हवेत असताना कॉकपिटमध्ये हम्माम अल हमामी याने मुख्य कॅप्टन स्मित मच्छर यांच्यावर चाकूने प्राणघातक हल्ला केल्याचा आरोप आहे. या हल्ल्यात कॅप्टन मच्छर गंभीर जखमी झाले. त्या गोंधळात विमानाचे नियंत्रण सुटले आणि ते वेगाने जमिनीकडे खाली येऊ लागले, त्यामुळे प्रवाशांमध्ये घबराट पसरली.
गंभीर जखमी असतानाही आणि रक्तस्त्राव होत असतानाही कॅप्टन मच्छर यांनी हार मानली नाही. विमान कोसळणार असल्याचे लक्षात येताच त्यांनी स्वतःच्या जिवाची पर्वा न करता कॉकपिटचा दरवाजा उघडला. दरवाजा उघडताच सतर्क प्रवाशांनी आणि केबिन क्रूने आत धाव घेतली आणि हिंसक झालेल्या संशयित सह-वैमानिकाला पकडून बांधून ठेवले. त्यामुळे विमानावर पुन्हा नियंत्रण मिळवता आले.
त्यानंतर विमान सौदी अरेबियातील तबूक (Tabuk) विमानतळाकडे वळवण्यात आले आणि तिथे सुरक्षितपणे इमर्जन्सी लँडिंग करण्यात आले. विमानातील सर्व १८२ प्रवासी आणि कर्मचारी सुरक्षित राहिले, त्यामुळे मोठा अनर्थ टळला. जखमी कॅप्टन मच्छर यांच्यावर लगेच वैद्यकीय उपचार करण्यात आले. भारताचे पंतप्रधान नरेंद्र मोदी यांनी त्यांच्याशी फोनवर बोलून प्रकृतीची चौकशी केली आणि त्यांच्या धैर्याचे कौतुक केले.
गुरुवारी सौदी अरेबियाच्या प्रशासनाने आरोपी हमामी याला संयुक्त अरब अमिराती (UAE) च्या पोलिसांच्या ताब्यात दिले. आता UAE चे सरकारी वकील आणि आंतरराष्ट्रीय तपास यंत्रणा या घटनेचा बारकाईने तपास करत आहेत. हा हल्ला एखाद्या माथेफिरूने केला होता की यामागे एखादी आंतरराष्ट्रीय दहशतवादी संघटना किंवा पूर्वनियोजित कट होता, याचा शोध घेतला जात आहे. ओमान एअरपासून फ्लायदुबईपर्यंतच्या प्रत्येक टप्प्यावरील कागदपत्रे आणि सुरक्षेतील त्रुटी तपासल्या जात आहेत.
