माथाडी कायदा कायम राहणार, वडाळ्यात कामगारांना 3000 घरे, वाशी मार्केटचा जागतिक दर्जाचा पुनर्विकास

वाशी येथे झालेल्या एका मोठ्या कामगार मेळाव्यात मुख्यमंत्री देवेंद्र फडणवीस यांनी माथाडी कामगारांना दिलासा देणाऱ्या अनेक घोषणा केल्या. माथाडी कामगारांना सामाजिक सुरक्षा आणि कायदेशीर संरक्षण देणारा माथाडी कायदा कोणत्याही स्थितीत कायम राहील, असं त्यांनी स्पष्टपणे सांगितलं. स्वर्गीय आमदार अण्णासाहेब पाटील यांच्या 93व्या जयंतीनिमित्त हा कार्यक्रम आयोजित करण्यात आला होता.

माथाडी कायदा हे कामगारांचं सुरक्षा कवच आहे, असं मुख्यमंत्री म्हणाले. काही जण हा कायदा संपवला जाईल असा गैरसमज पसरवत असले तरी सरकार तो अधिक मजबूत करेल, संपू देणार नाही, असं त्यांनी ठामपणे सांगितलं. मात्र या कामगार चळवळीच्या नावाखाली काही बोगस टोळ्या तयार झाल्या असून त्या खऱ्या कामगारांचं नुकसान करत आहेत, याकडेही त्यांनी लक्ष वेधलं. अशा अनधिकृत प्रवृत्तींना आळा घालण्यासाठी आणि खऱ्या कामगारांचे हित जपण्यासाठी कामगार नेते आणि संबंधित अधिकाऱ्यांची लवकरच उच्चस्तरीय बैठक घेऊन कठोर पावलं उचलली जाणार आहेत, असं त्यांनी सांगितलं. 50 किलोपेक्षा जास्त वजनाच्या पोत्यांबाबतच्या नियमाची काटेकोर अंमलबजावणी केल्याबद्दल मुख्यमंत्र्यांनी पणन मंत्री जयकुमार रावल आणि कामगार विभागाचं कौतुक केलं.

घरांच्या मुद्द्यावर बोलताना मुख्यमंत्र्यांनी सांगितलं की, वडाळा येथील गृहप्रकल्पातील अडचणी दूर करून आवश्यक एफएसआय आणि परवानग्या देण्यात आल्या आहेत. यामुळे तिथे सुमारे 2850 ते 3000 माथाडी कामगारांना हक्काची आणि आधुनिक घरं मिळणार आहेत. भविष्यातही कामगारांसाठी आणखी गृहप्रकल्प उभारण्याचा सरकारचा प्रयत्न असेल, असं त्यांनी नमूद केलं.

राज्यातील सर्व 36 माथाडी मंडळांचं सक्षमीकरण आणि पुनर्रचना करण्याचं काम हाती घेण्यात आल्याचंही मुख्यमंत्र्यांनी सांगितलं. मंडळांच्या कामकाजात पारदर्शकता यावी यासाठी स्वतंत्र पॅनेलमार्फत ऑडिट केलं जाणार आहे. कामगारांचं वेतन, पीएफ, ग्रॅच्युइटी, बोनस, घरभाडं आणि अपघात नुकसानभरपाई यांसारखे प्रलंबित प्रश्न तातडीनं सोडवले जातील, असं आश्वासनही देण्यात आलं. कामगारांच्या मुलांच्या उच्च शिक्षणासाठी विशेष योजना राबवण्याचीही घोषणा सरकारतर्फे करण्यात आली.

वाशी एपीएमसी मार्केटच्या भविष्याबाबत बोलताना मुख्यमंत्री म्हणाले की, 50 वर्षांपूर्वी उभं राहिलेलं हे मार्केट त्या वेळी आशियातील सर्वात मोठ्या केंद्रांपैकी एक होतं. आता बदलत्या व्यापार पद्धती आणि वाढती उलाढाल लक्षात घेऊन पुढील 50 वर्षांच्या गरजांचा विचार करत या मार्केटचा आंतरराष्ट्रीय दर्जाचा पुनर्विकास केला जाणार आहे. यासाठी जमिनीखाली आणि जमिनीवर आवश्यक तेवढा एफएसआय सरकार उपलब्ध करून देणार आहे. या आधुनिक आणि आंतरराष्ट्रीय बाजारपेठेमुळे माथाडी कामगारांना अधिक मोठ्या प्रमाणात शाश्वत रोजगार मिळेल, असा विश्वास मुख्यमंत्र्यांनी व्यक्त केला.