मुंबईकरांना आधी पाणी द्या, मग पेंग्विन; किशोरी पेडणेकर यांची सत्ताधाऱ्यांवर टीका

मुंबईत पेंग्विन आणण्याच्या मुद्द्यावरून सध्या राजकीय आरोप-प्रत्यारोप सुरू आहेत. याच दरम्यान शिवसेनेच्या (उद्धव बाळासाहेब ठाकरे) नेत्या आणि मुंबईच्या माजी महापौर किशोरी पेडणेकर यांनी सत्ताधाऱ्यांवर टीका केली आहे.

पेडणेकर यांच्या म्हणण्यानुसार पेंग्विन आणण्याची कल्पना आदित्य ठाकरे यांची होती. त्या वेळी जे लोक विरोध करत होते, तेच आता त्याचे श्रेय घेण्याचा प्रयत्न करत आहेत, असे त्या म्हणाल्या. सध्या पेंग्विन आणण्यापेक्षा मुंबईकरांना पाणी देण्याला प्राधान्य दिले पाहिजे, असेही त्यांनी सुनावले.

पेडणेकर यांनी सांगितले की पेंग्विनची संख्या आता 25 झाली आहे. त्यातील काही जोड्या म्हैसूरला पाठवण्याची चर्चा आहे आणि त्यासाठी काही अधिकारी भेट देऊन गेल्याचेही समजते. त्याऐवजी मुंबईत जिराफ आणि सिंह आणले जाणार असल्याची माहिती मिळत असल्याचेही त्यांनी सांगितले.

पेंग्विन मुंबईत आणले तेव्हा याच लोकांनी त्यावरून मोठे राजकारण केले होते, असे पेडणेकर यांचे म्हणणे आहे. एका पेंग्विनचा मृत्यू झाल्यानंतरही टीका करण्यात आली, असे त्यांनी सांगितले. आज मात्र हेच पेंग्विन मुंबईकरांच्या मनोरंजनाचे साधन बनले आहेत आणि मुंबईच्या तिजोरीतही मोठ्या प्रमाणात भर घालत आहेत, असे त्या म्हणाल्या. प्राणी-पक्ष्यांची देवाणघेवाण ही काही नवीन गोष्ट नाही, असे त्यांनी स्पष्ट केले.

मुंबई सध्या पाणीटंचाईला तोंड देत आहे, याकडे पेडणेकर यांनी लक्ष वेधले. दिवाळीनंतर निर्माण झालेल्या या प्रश्नावर प्रशासन आणि सत्ताधाऱ्यांचे लक्ष दिसत नाही आणि नागरी सुविधांच्या प्रश्नांवरही चर्चा होत नाही, असे त्या म्हणाल्या. पक्षी आणले पाहिजेत, त्याला आमचा विरोध नाही, पण ही त्याची वेळ नाही, असे सांगून त्यांनी म्हटले की सध्या मुंबईकरांच्या तोंडचे पाणी पळाले आहे. त्यामुळे त्यांना पेंग्विनपेक्षा पाणी महत्त्वाचे आहे, अशा शब्दांत त्यांनी नाराजी व्यक्त केली.

पेडणेकर यांनी महापालिकेतील परिस्थितीचाही उल्लेख केला. गेली साडेचार ते पावणेपाच वर्षे मुंबई महापालिकेत नगरसेवकांची लोकनियुक्त सभा नव्हती. आता नगरसेवक निवडून आले आहेत आणि महापौरही विराजमान झाले आहेत. अशा वेळी मुंबईकरांच्या मूलभूत प्रश्नांवर लक्ष देण्याऐवजी सीए आणा, पेंग्विन आणा, अशा विषयांवर चर्चा सुरू आहे, अशी टीका त्यांनी केली.

पेंग्विन आणण्याची संकल्पना आदित्य ठाकरे यांची होती आणि ती इतकी यशस्वी ठरली की आता तिची दखल घ्यावी लागत आहे, असे पेडणेकर म्हणाल्या. मात्र त्याचे श्रेय घेऊन मिरवण्याची ही वेळ नाही. मुंबईकरांच्या पाण्याच्या प्रश्नावर आधी चिंता व्यक्त करा, असा टोला त्यांनी लगावला.

मुंबईकरांचे आरोग्य, वाढते प्रदूषण आणि नागरी समस्यांवरही सत्ताधाऱ्यांनी बोलले पाहिजे, असे पेडणेकर यांनी म्हटले. मुंबईत वायुप्रदूषण, जलप्रदूषण, ध्वनिप्रदूषण आणि दृश्य प्रदूषण वाढत आहे, असे त्या म्हणाल्या. राजकारणातही प्रदूषण निर्माण झाले असून या महत्त्वाच्या प्रश्नांकडे दुर्लक्ष होत आहे, अशी टीकाही त्यांनी केली.