पालघरला वादळी पावसाचा तडाखा, घरांची पडझड, झाडे आणि वीजखांब कोसळले, संसार उघड्यावर

बरेच दिवस पावसाने उघडीप दिल्यानंतर बुधवारी रात्री पालघर तालुक्याच्या पूर्व भागात अचानक वादळी पाऊस आला. विजांचा कडकडाट आणि सोसाट्याचा वारा यांच्यासह आलेल्या या पावसाने मनोर परिसरासह पालघर आणि विक्रमगड तालुक्यातील ग्रामीण भागात मोठ्या प्रमाणावर नुकसान केले.

अनेक घरांवरील पत्रे वाऱ्याच्या तडाख्यात उडून गेली. काही ठिकाणी घराजवळची झाडे उन्मळून पडली आणि त्यामुळे घरांचेही नुकसान झाले. मनोर, सावरखंड, टाकवहाल, पोळे, कोसबाड आणि नवी दापचरी या भागांना वादळाचा मोठा फटका बसला. घरांवरील छताचे पत्रे उडाल्याने नागरिकांना नुकसान सोसावे लागले आहे.

विक्रमगड तालुक्यातील नाळशेत, शीलशेत, केव, म्हसरोळी आणि बोरांडा परिसरातही वादळी वाऱ्याने मोठी हानी झाल्याची माहिती आहे. अनेक ठिकाणी झाडे रस्त्यावर कोसळल्याने वाहतुकीला अडथळा निर्माण झाला.

वीज वितरण यंत्रणेलाही मोठा फटका बसला. वीजवाहिन्या तुटल्या आणि काही खांब जमीनदोस्त झाले, त्यामुळे विविध गावांतील वीजपुरवठा खंडित झाला. महावितरणच्या पथकांनी कोसळलेले खांब उभे करण्याचे आणि वीजवाहिन्यांची दुरुस्ती करण्याचे काम सुरू केले आहे.

नुकसानीचा प्राथमिक आढावा घेण्यासाठी महसूल विभागाने गावपातळीवर पंचनामे सुरू केले आहेत. प्रत्यक्ष नुकसानीची माहिती गोळा झाल्यानंतर बाधित नागरिकांना मदतीबाबत पुढील कार्यवाही केली जाणार आहे.

काही दिवस पाऊस नसल्याने भात पीक दाणे भरण्याच्या अवस्थेत असलेल्या शेतकऱ्यांची चिंता वाढली होती. पिकांना पावसाची गरज असताना बुधवारी रात्रीच्या पावसाने त्यांना काहीसा दिलासा मिळाला. मात्र त्याच पावसासोबत आलेल्या जोरदार वाऱ्यामुळे ग्रामीण भागातील घरांचे आणि वीजयंत्रणेचे मोठे नुकसान झाले आणि लोकांच्या अडचणी वाढल्या आहेत.

बुधवारी सायंकाळी अचानक आलेल्या वादळी वाऱ्याने म्हसरोली परिसरातही मोठे नुकसान झाले. वाऱ्याचा वेग प्रचंड असल्याने अनेक घरांवरील पत्रे उडून गेली. काही घरांच्या भिंती कोसळल्या, तर काही घरांवर झाड पडल्याने नुकसान झाले.

या नैसर्गिक आपत्तीत प्रामुख्याने गरीब आदिवासी कुटुंबांच्या घरांचे मोठे नुकसान झाले असून संसारोपयोगी साहित्यही खराब झाले आहे. अनेक कुटुंबे उघड्यावर आली आहेत.

नुकसानग्रस्त कुटुंबांना तातडीने मदत मिळावी, अशी मागणी म्हसरोली येथील ग्रामस्थ आणि पीडित कुटुंबीयांकडून होत आहे. विक्रमगडचे तहसीलदार आणि तहसील कार्यालयाने तातडीने म्हसरोली गावात येऊन नुकसानीचा पंचनामा करावा, शासनाकडे अहवाल सादर करावा आणि नुकसानग्रस्तांना आर्थिक मदत द्यावी, असे त्यांचे म्हणणे आहे.