पाकिस्तानच्या महिला संघाचा सरावाचा विचित्र व्हिडिओ व्हायरल, आकाश चोप्रा यांची टीका

पाकिस्तानच्या महिला क्रिकेट संघाचा सरावाचा एक विचित्र आणि मजेशीर व्हिडिओ सध्या इंटरनेटवर चांगलाच गाजतोय. पाकिस्तानच्या पुरुष संघाच्या लष्करी पद्धतीच्या विचित्र प्रशिक्षणाच्या आणि मैदानातल्या खराब क्षेत्ररक्षणाच्या गोष्टी नेहमीच समोर येत असतात. आता त्यात महिला संघाच्या या व्हिडिओची भर पडली आहे.

हा व्हिडिओ पाहिल्यावर भारताचे माजी क्रिकेटपटू आणि प्रसिद्ध समालोचक आकाश चोप्रा यांनी पाकिस्तान क्रिकेट बोर्डाच्या प्रशिक्षण पद्धतींवर टीका केल्याशिवाय राहिले नाहीत. सोशल मीडियावर मोठ्या प्रमाणात शेअर होत असलेल्या या व्हिडिओत चार खेळाडू एकमेकींचे हात आणि पाय धरून एक विचित्र मानवी साखळी तयार करताना दिसतात. एक खेळाडू खाली बसलेली आहे, दुसरी हवेत लटकलेली आहे आणि बाकीच्या दोघी तिला आधार देत आहेत.

हा व्हिडिओ पाहणारे चाहते विचारत आहेत की, असा व्यायाम किंवा सर्कसमधला स्टंट यांचा क्रिकेटमधील टायमिंग, झेल किंवा फिटनेसशी काय संबंध आहे? सुरुवातीला हा वरिष्ठ महिला संघाचा सराव असल्याचे वृत्त होते. मात्र मिळालेल्या माहितीनुसार, हे दृश्य पाकिस्तानच्या १९ वर्षांखालील महिला संघाच्या सराव सत्रातले आहे.

याआधी पाकिस्तानच्या पुरुष संघाचा असाच विचित्र सरावाचा व्हिडिओ व्हायरल झाला होता. आता महिला संघानेही असाच व्हिडिओ केल्याने त्यावर अत्यंत वाईट पद्धतीने जोरदार ट्रोलिंग सुरू असल्याचे दिसत आहे.

आपल्या स्पष्ट मतांसाठी सोशल मीडियावर ओळखल्या जाणाऱ्या आकाश चोप्रा यांनी या व्हिडिओवरून पाकिस्तान क्रिकेटच्या नव्या प्रयोगांवर टीका केली. त्यांनी गमतीने म्हटले की, पाकिस्तान क्रिकेट आता खेळापेक्षा विनोदाचा विषय जास्त होत चालले आहे. पाकिस्तानचा पुरुष संघ त्यांच्या अनोख्या शिबिरांमुळे आणि क्षेत्ररक्षणाच्या सरावामुळे आधीच ट्रोल झाला आहे, आणि आता महिला संघानेही त्याचेच अनुकरण केल्यासारखे दिसते, असे ते म्हणाले.

चोप्रा यांनी अशीही टिप्पणी केली की, जग चंद्रावर पोहोचले आहे, पण पाकिस्तान जिथे आहे तिथेच अडकले आहे. चाहते चोप्रा यांचा हा व्हिडिओ मोठ्या प्रमाणावर शेअर करत आहेत.

पाकिस्तान क्रिकेटमधल्या अशा विचित्र घटनांच्या व्हिडिओमुळे क्रिकेट तज्ज्ञ आणि चाहत्यांना मीम्स तयार करण्याची पुन्हा एकदा भरपूर संधी मिळाली आहे.