न्हाळेवाडीत बिबट्याच्या हल्ल्यात चिमुकल्याचा मृत्यू; तीन गावांचे ग्रामस्थ जलमंदिर पॅलेसवर, वनविभागाला जाब

सातारा : न्हाळेवाडीत दोन वर्षांच्या जय खंडागळेचा बिबट्याच्या हल्ल्यात मृत्यू झाला. त्यानंतर रविवारी गावात संताप उसळला. घराच्या दारात खेळणाऱ्या लहान मुलालाही सुरक्षित ठेवता येत नसेल, तर वनविभागाच्या उपाययोजना नेमक्या कुणासाठी आहेत, असा सवाल करत मृत बालकाचे नातेवाईक आणि आसपासच्या तीन गावांतील ग्रामस्थ थेट खासदार छत्रपती उदयनराजे भोसले यांच्या जलमंदिर पॅलेसवर गेले.

जय संदीप खंडागळे शनिवारी रात्री साडेसातच्या सुमारास घरासमोर खेळत होता. परिसरात दबा धरून बसलेल्या बिबट्याने अचानक त्याच्यावर झडप घातली. हल्ल्यात तो गंभीर जखमी झाला आणि उपचार मिळण्याआधीच त्याचा मृत्यू झाला. ही बातमी गावात पसरताच भीतीबरोबरच वनविभागाच्या कामाच्या पद्धतीबद्दल संताप वाढत गेला.

एकीकडे घरात चिमुकल्याचा मृतदेह आणि दुसरीकडे गावाभोवती बिबट्याची दहशत, अशी स्थिती होती. अशा वेळी ग्रामस्थांनी प्रशासनाकडे फक्त आर्थिक मदत मागितली नाही. बिबट्याचा तातडीने बंदोबस्त करावा, असा त्यांनी आग्रह धरला. जलमंदिर पॅलेसवर ग्रामस्थ मोठ्या संख्येने पोहोचल्यानंतर वनविभागाचे वरिष्ठ अधिकारी आणि पोलीस प्रशासनही तिथे आले.

ग्रामस्थांनी वनविभागाच्या अधिकाऱ्यांना जाब विचारला आणि बिबट्याला पकडण्यासाठी तातडीने मोहीम सुरू करण्याची मागणी केली. आता आश्वासन नको, कृती दाखवा, अशी ग्रामस्थांची भूमिका होती. बिबट्याला लवकरात लवकर जेरबंद करू, असे आश्वासन अधिकाऱ्यांनी दिले.

दरम्यान, खासदार उदयनराजे भोसले यांच्या उपस्थितीत वनविभागाने जयच्या कुटुंबीयांना १० लाख रुपयांची तातडीची मदत दिली. उरलेले १५ लाख रुपये शासकीय नियमानुसार महिनाभरात देण्याचे आश्वासन देण्यात आले. मात्र या मदतीनंतरही कुटुंबाचा आक्रोश कमी झालेला नाही.

"पैशाने आमचा जय परत येणार नाही. आमच्या मुलाचा जीव गेला; आता दुसऱ्या मुलाचा जीव जाऊ देऊ नका. बिबट्याचा कायमचा बंदोबस्त करा," अशी भावना जयचे वडील संदीप खंडागळे यांनी व्यक्त केली.

न्हाळेवाडी परिसरात वाढत असलेला धोका लक्षात घेऊन उद्या सातारा जिल्हाधिकाऱ्यांच्या उपस्थितीत वनविभागाच्या वरिष्ठ अधिकाऱ्यांची बैठक होणार आहे. या बैठकीत बिबट्याचा बंदोबस्त, नागरिकांच्या सुरक्षेसाठीच्या उपाययोजना आणि पुढे अशा घटना टाळण्यासाठी लागणारे नियोजन यावर चर्चा होईल. मात्र बैठका आणि आश्वासनांपलीकडे प्रत्यक्ष कृती कधी होणार, हा प्रश्न ग्रामस्थांसमोर आहे.

जयचा जीव गेल्यानंतर प्रशासनाने हालचाल सुरू केली असली, तरी या हालचालींचे रूपांतर ठोस कारवाईत झाले नाही, तर न्हाळेवाडीतील संताप आणखी तीव्र होण्याची शक्यता आहे.