नागपुरात कोळसा चोरीचा पर्दाफाश, 5 आरोपींना अटक

नागपुरात दगडी कोळशाची चोरी करून त्याची बेकायदा खरेदी-विक्री करणाऱ्या टोळीचा पर्दाफाश क्राइम ब्रांचच्या भू-माफियाविरोधी पथकाने केला आहे. या कारवाईत पोलिसांनी पाच जणांना अटक केली असून त्यांच्याकडून 11.625 टन दगडी कोळसा आणि इतर साहित्य असा एकूण सुमारे 2.30 लाख रुपयांचा मुद्देमाल जप्त केला आहे.

नवीन कामठी पोलीस स्टेशनच्या हद्दीत कामठी रेल्वे क्रॉसिंगपासून गाडा गावामार्गे आवंडी गावाकडे जाणाऱ्या रस्त्यावर गाडा शिवारात एक फर्म आहे, तिचं नाव रहमत एक्झीन असं आहे. या फर्ममध्ये दगडी कोळशाची बेकायदा खरेदी-विक्री सुरू असल्याची गुप्त माहिती क्राइम ब्रांचच्या भू-माफियाविरोधी पथकाला मिळाली होती.

या माहितीच्या आधारे पोलीस पथकाने पहाटे सुमारे चार वाजता पंचांच्या उपस्थितीत या फर्मवर छापा टाकला. झडतीत तिथे मोठ्या प्रमाणात कोळशाचा साठा आढळून आला. यावेळी पोलिसांनी चार दुचाकींसह पाच जणांना ताब्यात घेतले.

अटक करण्यात आलेल्या आरोपींची नावे आहाद फिरोज अहमद, दानिश मोहम्मद अकरम, चेतन रमेश शेंद्रे, कुणाल हरीश राऊत आणि अतुलसिंग अभिमन्युसिंग अशी आहेत.

पोलिसांच्या प्राथमिक तपासात असे समोर आले आहे की चेतन, कुणाल आणि अतुलसिंग हे कन्हान खाणीतून कोळसा चोरत असत आणि तो चोरलेला कोळसा दानिशच्या फर्ममध्ये विक्रीसाठी आणत असत. त्यानंतर या फर्ममध्ये त्या कोळशाची बेकायदा खरेदी-विक्री केली जात असे आणि त्यातून सगळे मिळून आर्थिक फायदा मिळवत असत, असे तपासात पुढे आले आहे.

कारवाईदरम्यान पोलिसांनी एकूण 11,625 किलो कोळसा जप्त केला. याशिवाय 10,500 रुपये रोख रक्कम, कोळसा तोलण्यासाठी वापरला जाणारा वजन काटा, चार दुचाकी आणि दोन मोबाईल फोनही जप्त करण्यात आले आहेत. या जप्त करण्यात आलेल्या एकूण मुद्देमालाची किंमत सुमारे 2.30 लाख रुपये असल्याचे सांगण्यात आले आहे.

या प्रकरणी नवीन कामठी पोलीस स्टेशनमध्ये गुन्हा दाखल करण्यात आला आहे. अटक करण्यात आलेल्या पाचही आरोपींना आणि जप्त केलेला सगळा मुद्देमाल पुढील कायदेशीर कारवाईसाठी नवीन कामठी पोलिसांच्या ताब्यात देण्यात आला आहे. या संपूर्ण प्रकरणाचा तपास अजूनही पोलिसांकडून सुरू आहे.