नागपुरात 'दृश्यम' स्टाईल हत्या; जंगलात जमिनीत पुरलेला मृतदेह सापडला

नागपूरमध्ये एक धक्कादायक घटना समोर आली आहे. बुटीबोरी पोलीस स्टेशनच्या हद्दीत येणाऱ्या अंजनगावच्या जंगलात जमिनीत पुरलेला एका तरुणाचा मृतदेह आढळल्याने परिसरात एकच खळबळ उडाली आहे. मृत तरुणाचे नाव दर्शन ऊर्फ दिनेश मसराम असे असून तो ३८ वर्षांचा होता. जंगलात मृतदेह पुरून लपवण्यात आला होता, त्यामुळे ही घटना उघडकीस येताच परिसरातील नागरिकांमध्ये भीतीचे आणि उत्सुकतेचे वातावरण पसरले.

पोलिसांनी दिलेल्या प्राथमिक माहितीनुसार, हत्या करून पुरावे लपवण्यासाठीच हा मृतदेह जंगलात पुरण्यात आला असावा, असा संशय व्यक्त केला जात आहे. हा केवळ पोलिसांचा प्राथमिक अंदाज असून याबाबत अद्याप ठोस निष्कर्ष पोलिसांनी काढलेला नाही. मृतदेह पुरण्याची पद्धत आणि घटनास्थळी जी काही वस्तू सापडली, त्यामुळे या प्रकरणाची तुलना थेट दृश्यम या सिनेमातील कथानकाशी केली जात आहे. त्या सिनेमात मृतदेह लपवण्यासाठी अशाच पद्धतीने जमिनीत पुरण्याचा प्रसंग दाखवण्यात आला होता, आणि त्यामुळेच या प्रत्यक्ष घटनेशी ती साम्यता जोडली जात आहे.

मिळालेल्या माहितीनुसार, दर्शनची मानसिक स्थिती गेल्या काही दिवसांपासून ठीक नव्हती. शनिवारी तो घरातून बाहेर पडला होता, मात्र रात्री उशिरापर्यंत तो घरी परतलाच नाही. त्यामुळे घरच्यांनी त्याचा शोध सुरू केला. आजूबाजूच्या अनेक ठिकाणी विचारपूस करूनही दर्शनचा काहीच ठावठिकाणा लागला नाही. अनेक तास शोध घेऊनही काहीच सुगावा न लागल्याने अखेर कुटुंबीयांनी पोलिसांची मदत घेण्याचे ठरवले. सोमवारी सकाळी कुटुंबीय बुटीबोरी पोलीस स्टेशनला गेले आणि त्यांनी दर्शन बेपत्ता असल्याची तक्रार दिली.

याच दरम्यान एका नातेवाइकाने पोलिसांना महत्त्वाची माहिती दिली. दर्शन अंजनगावच्या जंगलात असण्याची शक्यता असल्याचे त्याने पोलिसांना सांगितले. इतकेच नाही, तर त्याची हत्या करून मृतदेह जंगलातच पुरला गेला असण्याची शक्यताही या नातेवाइकाने बोलून दाखवली. या माहितीच्या आधारावर पोलिसांनी वेळ न दवडता लगेच अंजनगावच्या जंगलात शोधमोहीम हाती घेतली.

शोध सुरू असताना पोलिसांना जंगलातील एका जागी जमीन संशयास्पद स्थितीत दिसली. ती जागा खणून पाहिली असता तिथे दर्शनचा मृतदेह पुरलेला आढळला. मृतदेह हाती लागताच बुटीबोरी पोलीस स्टेशनचे पोलीस घटनास्थळी दाखल झाले आणि त्यांनी पुढील कारवाई सुरू केली. या घटनेने संपूर्ण परिसरात भीतीचे आणि संतापाचे वातावरण पसरले आहे.

सध्या पोलिसांनी या प्रकरणाचा तपास हाती घेतला असून हत्येमागचे नेमके कारण आणि यात कोण सामील आहे, याचा शोध सुरू आहे. पुरावे लपवण्यासाठी मृतदेह जंगलात पुरल्याचा संशय पोलिसांनी व्यक्त केला असला, तरी याबाबत अद्याप ठोस निष्कर्षापर्यंत पोलीस पोहोचलेले नाहीत. तपास पुढे सरकत असताना या प्रकरणात आणखी काही धागेदोरे हाती लागतात का, याकडे सगळ्यांचे लक्ष लागले आहे.