इमारतीवरून उडी मारून विद्यार्थ्याची आत्महत्या; शाळेतून उशीरा येण्याचे कारण विचारले अन् नंतर...

नागपुरातील बेलतरोडी पोलीस स्टेशनच्या हद्दीत असलेल्या पृथ्वीराजनगर भागात एका चौदा वर्षांच्या मुलाने इमारतीच्या बाराव्या मजल्यावरून उडी मारून आत्महत्या केली. मृत मुलाचे नाव निनाद यतिंद्र विश्वकर्मा असे आहे. ही घटना मॅक्स ग्लोरी अपार्टमेंटमध्ये घडली असून, निनादच्या मृत्यूमागचे नेमके कारण अजून स्पष्ट झालेले नाही. घटनेची माहिती मिळताच बेलतरोडी पोलीस स्टेशनचे पोलीस घटनास्थळी पोहोचले आणि त्यांनी पंचनामा करून पुढील तपासाला सुरुवात केली.

निनाद मॅक्स ग्लोरी अपार्टमेंटच्या ए विंगमध्ये कुटुंबासोबत राहत होता. तो मिहान भागातील दिल्ली पब्लिक स्कूलमध्ये नववीच्या वर्गात शिकत होता. त्याचे वडील यतिंद्र सॉफ्टवेअर इंजिनिअर असून एका खासगी कंपनीत काम करतात. निनाद हा त्यांचा एकुलता एक मुलगा होता, त्यामुळे कुटुंबावर या घटनेचा मोठा आघात झाला आहे.

बुधवारी दुपारी निनादची शाळेची बस नेहमीपेक्षा जवळपास दहा मिनिटे उशिरा आली. बस वेळेवर न आल्याने त्याचे आई-वडील घरी त्याची वाट पाहत बसले होते. दुपारी साडेतीन वाजण्याच्या सुमारास वडील यतिंद्र यांनी घराच्या गॅलरीतून खाली रस्त्यावर नजर टाकली, तेव्हा त्यांना निनाद खाली एका ऑटोचालकाशी बोलताना दिसला. मुलगा खाली दिसताच यतिंद्र लगेच जिना उतरून खाली गेले आणि त्यांनी मुलाला शाळेतून यायला एवढा उशीर का झाला, असे विचारले. त्यावेळी त्यांच्या लक्षात आले की निनादकडे शाळेचे दप्तर नाही.

दप्तराबाबत विचारल्यावर निनादने सांगितले की ते त्याच्या मित्राकडे राहिले आहे. त्यानंतर तो दप्तर आणण्यासाठी इमारतीत जातो असे वडिलांना सांगून आत गेला. वडील तिथेच खाली उभे राहिले. थोड्याच वेळात इमारतीच्या खालच्या बाजूला मोठा आवाज झाला. हा आवाज ऐकताच यतिंद्र लगेच त्या दिशेने धावले. तिथे पोहोचल्यावर त्यांना निनाद गंभीर जखमी अवस्थेत जमिनीवर पडलेला आढळला. त्याला तातडीने जवळच्या रुग्णालयात नेण्यात आले, मात्र डॉक्टरांनी तपासणी करून त्याला मृत घोषित केले.

घटनेच्या प्राथमिक तपासात कोणतीही संशयास्पद बाब समोर आलेली नाही. निनादने असे टोकाचे पाऊल नेमके का उचलले, याचे कारण अद्याप स्पष्ट होऊ शकलेले नाही. मुलाच्या अशा अचानक झालेल्या मृत्यूने आई-वडिलांना जबर धक्का बसला असून, त्या मानसिक धक्क्यातून अद्याप ते सावरलेले नाहीत. त्यामुळे त्यांच्याकडून घटनेबाबत सविस्तर माहिती घेणे पोलिसांना अजून शक्य झालेले नाही. सध्या पोलिसांनी आकस्मिक मृत्यूची नोंद करून पुढील तपास सुरू केला आहे, अशी माहिती बेलतरोडीचे पोलीस निरीक्षक रवींद्र नाईकवाड यांनी दिली.